قازاقستاندا ەشقانداي استىق تاپشىلىعى جوق - ا ش م

نۇر- سۇلتان. قازاقپارات - ق ر اۋىل شارۋاشىلىعى ءبىرىنشى ۆيتسە- ءمينيسترى ايداربەك ساپاروۆ ەلدەگى ۇن تاپشىلىعى جونىندەگى جاريالانىمدارعا جاۋاپ بەردى، دەپ حابارلايدى قازاقپارات ءتىلشىسى.

«وزدەرىڭىزگە بەلگىلى، ب ا ق بەتتەرىندە ءبىرقاتار ديىرمەننىڭ شيكىزات دەفيتسيتىنە بايلانىستى جۇمىسى توقتاعانى جازىلىپ جاتىر. مۇندا بىردەن ايتقىم كەلەتىنى - ەلدە ەشقانداي استىق تاپشىلىعى جوق. رەسپۋبليكادا جەتكىلىكتى مولشەردە استىق بار. بارشاڭىزدى دۇرلىكپە تۋدىرماۋعا جانە جەكە مۇددەنى حالىقتىڭ جالاقىسىمەن جاسىرماۋعا شاقىرامىن»، - دەدى ا. ساپاروۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

الدىن الا ستاتيستيكا دەرەگىنە سايكەس، 1- ساۋىردەگى جاعداي بويىنشا رەسپۋبليكادا 6,4 ميلليون توننا استىق بولعان.

«بۇل كولەم ىشكى تۇتىنۋدى قامتاماسىز ەتۋگە جانە ءبىر بولىگىن ەكسپورتقا، ونىڭ ىشىندە ۇن تۇرىندە جىبەرۋگە دە جەتكىلىكتى. اتاپ وتكەن ءجون، جىل سايىن ءبىز شامامەن 3 ميلليون توننا ۇن وندىرەمىز، ءبىراق بۇل كولەمنىڭ جارتىسى ەكسپورتقا جىبەرىلەدى. وسىلايشا، وندىرىلەتىن ۇننىڭ بارلىعى ىشكى نارىققا كەتپەيتىنىن ءتۇسىنۋ كەرەك. ال كەيبىر ديىرمەندەر تەك ەكسپورتقا جۇمىس ىستەيدى»، - دەدى ايداربەك ساپاروۆ.

بۇعان دەيىن استىق وڭدەۋشىلەر وداعى ەلىمىزدە ءبىر جارىم اپتاعا عانا جەتەرلىك بيداي قورى قالعانىن مالىمدەگەن ەدى. استىق وسىرۋشىلەر مەن وڭدەۋشىلەر بيدايدى بولىسە الماي داۋ تۋعانى، بيداي تاۋسىلسا بارلىق ديىرمەندەر جۇمىسىن توقتاتۋعا ءماجبۇر ەكەنى ايتىلعان.

اۆتور: ايجان سەرىكجان قىزى