ەلوردادا كۇيشى- كومپوزيتور نۇرلان بەكەنوۆتىڭ «كوڭىل سازى» شىعارماشىلىق كەشى وتەدى
«قازاقستان» ورتالىق كونسەرت زالىنىڭ كامەرالىق زالىندا وتكەلى تۇرعان بۇل باسقوسۋدا قازاقتىڭ دومبىرا اسپابى جانە كۇي ونەرى تۋرالى سىر شەرتىلەتىن بولادى.
- دومبىرانىڭ بەس بۇراۋى تۋرالى ويلار ورتاعا سالىنادى. ياعني، شالىس بۇراۋ، قالىس بۇراۋ، تەل بۇراۋ، وڭ بۇراۋ جانە تەرىس بۇراۋ جونىندە ماعلۇماتتار بەرىلىپ، وسى بەس بۇراۋدا كۇيلەر ورىندالادى. باستى ماقساتىمىز - قازاق دومبىراسىنىڭ بەس بۇراۋىن ناسيحاتتاۋ، حالىققا كەڭىنەن تانىستىرۋ. سونىمەن قاتار دومبىرانىڭ تۇرلەرى جۇرتشىلىق نازارىنا ۇسىنىلادى. ونىڭ ىشىندە ۇلتتىق اسپابىمىزدىڭ تۇمار دومبىرا، شىڭكىلدەك دومبىرا، قالاق دومبىرا جانە قوزىقۇيرىق دومبىرا دەپ بولىنەتىن ءتورت ءتۇرىنىڭ ورىنداۋ ەرەكشەلىكتەرىن كورسەتەمىز.
بۇنى ءاربىر قازاقتىڭ بىلگەنى ءجون دەسەك، ال جاس ۇرپاق ءۇشىن مۇنداي قۇندىلىقتارىمىزدى ءبىلىپ، كورە ءبىلۋى وتە ماڭىزدى، - دەيدى كۇيشى- كومپوزيتور نۇرلان بەكەنوۆ.
بۇل كەشتە قازاقستاننىڭ ەڭبەك سىڭىرگەن قايراتكەرلەرى امانتاي جۇماشيەۆ پەن انار مۇزداحانوۆا جانە «قۇرمەت» وردەنىنىڭ يەگەرى جانار ءجۇسىپوۆا ونەر كورسەتەدى. مادەنيەت سالاسىنىڭ ۇزدىگى جانار قاسىموۆا جەتەكشىلىك ەتەتىن، بيىل قۇرىلعان «بويتۇمار» قوبىزشىلار كۆينتەتى، قارلىعا نيحانبايەۆا جەتەكشىلىگىمەن «جاس ورەن» بالالار ءانسامبلى جانە «اقجانبەك- ارىس» دومبىراشىلار ءانسامبلى ءتۇرلى دومبىرامەن كۇي ورىنداپ بەرەدى.
ايتا كەتۋ كەرەك، نۇرلان بەكەنوۆتىڭ اقىن تاۋباي ساقتاعان ۇلىنا ارناعان «اقىن ارمانى نەمەسە تاۋباي تولعاۋى» اتتى كۇيى تۇڭعىش رەت كورەرمەندەر نازارىنا ۇسىنىلماق. سونىمەن قاتار ايتقالي جايىموۆتىڭ «جەلدىرمە»، «قوسباسار» دەگەن كۇيلەرى كورەرمەندەر نازارىنا ۇسىنىلماق.
قازاقستان پرەزيدەنتى قاسىم- جومارت توقايەۆتىڭ اكەسى - جازۋشى كەمەل توقايەۆتىڭ «ۇياسىنان بەزگەن قۇس» رومانىنىڭ جەلىسىندە شىققان «ۇياسىنان بەزگەن قۇس» اتتى كۇي ساحنادا العاش رەت ورىندالعالى تۇر. كۇيدىڭ اۆتورى - نۇرلان بەكەنوۆ.
سونداي- اق جەتىسۋ كۇي ونەرىنىڭ بەلگىلى وكىلى سىبانقۇلدىڭ «ءتۇسىپحاننىڭ زارى» دەگەن كۇيى شەرتىلەدى. ءتۇسىپحان ابايدىڭ تۋىسقانى بولىپ كەلەدى، 25 جاسىندا ومىردەن ەرتە وزعان. سونىمەن قاتار قۇرمانعازى، داۋلەتكەرەي، تاتتىمبەتتىڭ كۇيلەرى ورىندالادى. كەشتى اقىن قۋات ەجەمبەك پەن جاس ونەرپاز ايساۋلە الدانىشباي جۇرگىزەدى. كۇيلەردىڭ شىعۋ تاريحى مەن ەرەكشەلىكتەرى تۋرالى ءسوز قوزعالادى جانە ولەڭدەر وقىلادى.
اۆتور: ەلجان ەرالى
