ەرجان بايتانايەۆ: «ستەلس-وميكرون» شتامىنان قورعانۋدىڭ جالعىز جولى - ريەۆاكسيناتسيا
«كوروناۆيرۋستىڭ جاڭا ءتۇرى «ستەلس-وميكرون» قىتايدا بەلەڭ الا باستادى. سونىڭ اسەرىنەن شانحايدا ءتۇرلى سالادان 2000 عا جۋىق مەديتسينا قىزمەتكەرى تارتىلىپ، قالا تۇرعىندارىن تەستىلەۋدەن وتكىزىپ جاتىر. بۇل شتام بىزگە كەلۋى مۇمكىن بە؟»، - دەپ سۇرادى جۋرناليست.
«بارشاڭىزعا ايان، ەلىمىزدە جالپى ەپيدەميولوگيالىق احۋال تۇراقتى. كۇنىنە 20 عا جۋىق ادام كوروناۆيرۋس ينفەكسياسىنا شالدىعۋدا. بۇل نەنىڭ اسەرى؟ بىزدە قازىرگى ۋاقىتتا ۇجىمدىق يممۋنيتەتتىڭ بار ەكەنى وزدەرىڭىزگە ايان. 10,5 ميلليونعا جۋىق ازامات تولىق ۆاكسينالاۋدان ءوتتى. سونىمەن قاتار، 3,5 ميلليون ازامات ريەۆاكسيانتسيادان ءوتتى. اۋەل باستا ايتقانىمىزداي، ءبىز كوروناۆيرۋس ينفەكسياسىمەن ءومىر ءسۇرۋىمىز كەرەك، ساقتانۋىمىز كەرەك. ءيا، ۆەدومستۆوارالىق كوميسسيانىڭ شەشىمىمەن، باس سانيتارلىق دارىگەردىڭ قاۋلىسى بويىنشا بۇگىندە بۇكىل تالاپتار الىنىپ تاستالدى. سوعان قاراماستان، ءبىز ازاماتتارعا ەڭ ءبىرىنشى ادام كوپ توپتاسقان ورىنداردا ماسكا تاعۋعا كەڭەس بەرەمىز. ەگەر ۆاكسيناتسيادان، ريەۆاكسيناتسيادان باس تارتساق، جاعداي ۋشىعىپ كەتۋى مۇمكىن. بۇگىنگى جەتىستىگىمىز - 10,5 ميلليون ادامنىڭ سانالى تۇردە ۆاكسيناتسيادان وتكەنى، ۇجىمدىق يممۋنيتەتتىڭ قالىپتاسقانى»، - دەدى كوميەتتىڭ رەسمي وكىلى.
ونىڭ ايتۋىنا قاراعاندا، ەپيدەميولوگيالىق احۋالدىڭ تۇراقتانۋى بۇدان بىلاي ۇجىمدىق يممۋنيتەتتى ساقتاۋدىڭ قاجەتى جوق دەگەندى بىلدىرمەيدى.
«كوپ ادام كارانتين شەكتەۋلەرى الىنىپ تاستالعانىن «ۆيرۋستى جەڭدىك، ەندى ۆاكسينا الماسام دا بولادى» دەپ ءتۇسىنىپ جاتىر. بۇل ۇلكەن قاتەلىك. وسىدان ءبىر جىل بۇرىن، ءتىپتى جارتى جىل بۇرىن ۆاكسينا العان ادامدار ريەۆاكسيناتسيادان وتپەگەن جاعدايدا مۋتاتسيالىق شتامدار ەلگە كەلگەن كەزدە ءبىرىنشى جۇقتىرۋى مۇمكىن. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، بۇگىندە «ستەلس-وميكرون» شتامىنان قۇتقاراتىن بىردەن-ءبىر جول، جۇقتىرعاننىڭ وزىندە جەڭىل وتكەرۋدىڭ جولى - ۆاكسيناتسيا مەن ريەۆاكسيانتسيا. ۆاكسينا الساق قانا ءبىز ۆيرۋستى جۇقتىرعاننىڭ وزىندە اۋرۋحاناعا تۇسپەيمىز، جاساندى تىنىستاندىرۋ اپپاراتىنا تاڭىلمايمىز. بۇگىندە ازاماتتارىمىز ساناسىن وياتىپ، مىندەتتى تۇردە ريەۆاكسيناتسيادان ءوتۋى كەرەك. قولدا بار ۇجىمدىق يممۋنيتەتتى ساقتاپ قالۋىمىز كەرەك»، - دەدى ەرجان بايتانايەۆ.
ەسكە سالساق، بۇگىندە قازاقستاندىقتارعا Pfizer- مەن ريەۆاكسيناتسيا جاساۋ مۇمكىندىگى ۇسىنىلىپ وتىر.
