جۇك ۇشاعى كوستا- ريكا اۋەجايىنا شۇعىل قونعان كەزدە ەكىگە ءبولىنىپ كەتتى
اپات «DHL» كومپانياسىنا تيەسىلى Boeing 757-200 جۇك ۇشاعىنىڭ قاتىسۋىمەن بولعان. اۋە كەمەسىنىڭ ەكى ۇشقىشى ەۆاكۋاتسيالاندى. ەكەۋى دە جاراقات العان جوق. سونىمەن قاتار، DHL «ەكيپاجدىڭ ءبىر مۇشەسى ساقتىق شاراسى رەتىندە مەديتسينالىق تەكسەرۋدەن وتەدى» دەپ مالىمدەدى.
كوستا- ريكا بيلىگىنىڭ حابارلاۋىنشا، گۆاتەمالاعا بەت العان ۇشاقتىڭ گيدراۆيكالىق جۇيەسى ىستەن شىققان. سول سەبەپتى ۇشقىش سان- حوسە اۋەجايىنا شۇعىل قونۋعا ءماجبۇر بولعان. اپاتتى قونۋ كەزىندە ۇشاق ۇشۋ- قونۋ جولاعىنان شىعىپ كەتىپ، ارتقى بولىگى جۇلىنىپ تۇسكەن، دەپ حابارلايدى Reuters.
اتالعان وقيعادان كەيىن «حۋان سانتاماريا» حالىقارالىق اۋەجايى بىرنەشە ساعاتقا جابىلعان. اۋە ايلاعى وپەراتورىنىڭ ايتۋىنشا، اپات اقش، ورتالىق امەريكا، مەكسيكا، كانادا جانە ەۋروپاعا باعىت العان 57 كوممەرتسيالىق جانە جۇك رەيستەرىنە، سونداي- اق 8500 جولاۋشىعا اسەرىن تيگىزگەن. «DHL» كومپانياسى ءتيىستى ورگاندارمەن تەرگەۋدى باستاۋعا ۋادە بەرىپ، وقيعاعا ارەكەت ەتۋ توبىن ىسكە قوسقانىن حابارلادى.
