بيۋجەت شىعىستارى ورتاشا جىلدىق ءوسۋ قارقىنىنان اسپاۋى كەرەك – مينيسترلىك
وندا بيۋجەت شىعىستارى ورتاشا جىلدىق ءوسۋ قارقىنىنان اسپاۋى كەرەك، دەپ حابارلايدى قازاقپارات ءتىلشىسى.
«مەملەكەت باسشىسىنىڭ 2021-جىلعى 1- قىركۇيەكتەگى قازاقستان حالقىنا جولداۋىندا «بلوكتى» بيۋجەت ەلەمەنتتەرىن ەنگىزۋ جونىندەگى زاڭ جوباسىن ازىرلەۋدى تاپسىردى. بيۋجەتتىك باعدارلامالاردى ىرىلەندىرۋگە، بيۋجەتتىك راسىمدەردى وڭايلاتۋعا، بيۋجەت قاراجاتىن باسقارۋداعى يكەمدىلىكتى، سونداي-اق بيۋجەت قاراجاتىن پايدالانۋدىڭ تيىمدىلىگىن قامتاماسىز ەتۋگە بايلانىستى نەگىزگى مىندەتتەردى شەشۋگە باعىتتالعان تاسىلدەر پىسىقتالدى»، - دەدى ا. ءامرين سەناتتا بيۋجەت ماسەلەسىن تالقىلاۋ كەزىندە.
ونىڭ ايتۋىنشا، ليميتتەردى 4 بلوكقا ءبولۋ ارقىلى تۇراقتاندىرۋ ۇسىنىلىپ وتىر.
«ءبىرىنشى بلوك - ول شارتسىز شىعىستار، ياعني تۇراقتى سيپاتتاعى. ەكىنشى بلوكتا ۇلتتىق جوبالاردىڭ ءىس-شارالارىن ىسكە اسىرۋعا ارنالعان شىعىستار قامتىلعان. ءۇشىنشى بلوك - رەزەرۆتەردى قالىپتاستىرۋعا ارنالعان شىعىستار، ال ءتورتىنشىسى باستاپقى ءۇش بلوكقا جاتقىزىلماعان شىعىستار، ولار ءبىرجولعى سيپاتتاعى شىعىستاردى قامتيدى. بۇدان باسقا، شىعىستار ليميتتەرىن بازالىق شىعىستار بويىنشا ليميتتەردى جانە جاڭا باستامالارعا ليميتتەردى بولە وتىرىپ بەلگىلەۋ ۇسىنىلادى. ليميتتەر جوسپارلى كەزەڭگە جىل سايىن جىلجىمالى نەگىزدە بەلگىلەنەدى جانە بيۋجەتتىك باعدارلامالار اكىمشىلەرىنە 1- شىلدەگە دەيىن جەتكىزىلەدى»، - دەدى ۆيتسە-مينيستر.
«جاڭا باستامالار بويىنشا ليميتتەر بيۋجەت شىعىستارىنىڭ ءوسۋ قارقىنى نەگىزىندە ايقىندالاتىن بولادى، ياعني كونترتسيكلدى بيۋجەت ەرەجەسى ەسكەرىلەدى. وندا بيۋجەت شىعىستارى ورتاشا جىلدىق ءوسۋ قارقىنىنان اسپاۋى كەرەك ەكەنى اتاپ وتىلگەن»، - دەدى ا. ءامرين.
بۇدان بۇرىن حابارلانعانداي، بيۋجەتتىك باعدارلامالار اكىمشىلەرىنە ۇلتتىق جوبالار بويىنشا پايدالانىلماعان قاراجاتتى كەلەسى جىلى تولىق پايدالانۋ قۇقىعىن بەرۋ ۇسىنىلىپ وتىر.
