باسسەيننىڭ پايداسى مەن زيانى

استانا. قازاقپارات - باسسەيننىڭ ادام دەنساۋلىعىنا پايداسى زور. سپورتتىڭ كەز كەلگەن ءتۇرى اعزاعا ءارقالاي ىقپال ەتەدى.

ءجۇزۋ - سپورتتىڭ ماڭىزدى ءبىر ءتۇرى، ويتكەنى ول دەنەنى قاتايتادى، بۇلشىقەتتى قالپىنا كەلتىرىپ، بويدان بۇكىل جاعىمسىز ەنەرگيانى شىعارۋعا جاقسى كومەكتەسەدى. سونداي- اق ءمىنسىز ءمۇسىن يەسى اتانۋىڭىزعا سەپتىگىن تيگىزەدى.

ءجۇزۋ - دەنساۋلىققا پايدالى

سۋدىڭ ىشىندە تۇرىپ جاتتىعۋ جاساۋ اسا پايدالى. ويتكەنى دەنەگە كوپ سالماق تۇسپەيدى. وسىنىڭ ارقاسىندا دەنەنىڭ بەلگىلى ءبىر بۇلشىق ەتىمەن جۇمىس ىستەۋگە بولادى. ءجۇزۋ جۇرەكتىڭ جۇمىسىن كۇشەيتىپ، ەرتە قارتايۋدىڭ الدىن الادى. ودان باسقا دا پايداسى كوپ. كۇنىنە 30-40 مينۋت جۇزۋمەن اينالىسقان ادام وتە قىسقا مەرزىمدە ارتىق سالماعىنان ارىلادى. ءجۇزۋ ادامدى كۇيزەلىستەن قۇتقارىپ، دەنەنى تىنىشتاندىرادى، جانعا راحات سىيلاپ، ەنەرگيا بەرەدى. باسسەينگە كەز كەلگەن ادام بارىپ، جاتتىعا الادى. ءجۇزۋ قان قىسىمىن رەتتەپ، قان اينالىمدى قالپىنا كەلتىرەدى. باسسەيننەن شىققان ادام جۇگىرۋ مەن سەكىرۋدەن كەيىن سەزىنەتىن اۋىرلىق سەزىمىن باستان وتكەرمەيدى. ءجۇزۋ كەزىندە وكپە جۇمىسى جاقسارىپ، تىنىس الۋ مۇشەلەرى جاتتىعادى. سۋعا تۇسكەن ادام توڭسا دا، تەرلەمەيدى. باسسەينگە بارىپ سپورتپەن شۇعىلدانۋ ءساندى ءارى دەنەنى تازالىقتا ۇستايدى. باسسەين ومىرتقاعا وتە پايدالى. اسىرەسە كۇنى بويى وتىرىپ جۇمىس ىستەيتىن ادامدار ءجۇزۋ ارقىلى دەنساۋلىعىن ءبىرقالىپتى ۇستاي الادى.

باسسەيننىڭ زيانى بار ما؟

زيانى سول، باسسەينگە حلور سەبىلەتىندىكتەن، ول ادامنىڭ شاشىنا، تەرىسىنە، تىرناعىنا كەرى اسەر ەتەدى. ارنايى كوزىلدىرىكسىز ءجۇزۋ كوزگە دە زيان. باسسەينگە كوپ ادام تۇسەتىندىكتەن، سۋىنىڭ قانشالىقتى ءجيى اۋىسىپ تۇراتىنىن سۇراڭىز. باسسەينگە بارۋ ءۇشىن نە كەرەك؟ سۇلگى، جۇزۋگە ارنالعان كيىم، جۇزۋگە ارنالعان باس كيىم، ارنايى كوزىلدىرىك، سۇيرەتپە اياق كيىم، شاش كەپتىرگىش كەرەك.

باسسەينگە بارۋ ادەبى

ادەتتە باسسەين دۋشىمەن، مونشاسىمەن بىرگە قىزمەت كورسەتەدى. باسسەينگە كىرمەس بۇرىن جانە باسسەيننەن شىققاندا دەنەنى سابىنداپ جۋۋ كەرەك. وزىڭىزبەن بىرگە جۋىنۋ قۇرالدارىن (سابىن، سۋسابىن، دەنەگە ارنالعان گەل) الىپ بارىڭىز. ەگەر جاقسى جۇزە الماساڭىز، باسسەيننىڭ تەرەڭ جەرىنە بويلاماڭىز. سۋ جىلى بولسا دا، كەز كەلگەن ۋاقىتتا دەنە قارىسىپ قالۋى مۇمكىن. باسسەيندە ادام كوپ بولاتىندىقتان، جولدا جۇرگەندەي جولاقتىڭ وڭ جاعىمەن ءجۇزىڭىز. سۋعا تۇسكەندە باياۋ، ۇقىپتى قيمىلداڭىز. باسسەيننەن كەيىن ىستىق شاي ءىشىڭىز. باسسەين ەكىقابات ايەلدەرگە دە پايدالى. بالا ەمىزەتىن ايەل ادامدار باسسەينگە تۇسكەندە ومىراۋىنا سۋىق ءتيىپ قالماۋىن قاداعالاۋ كەرەك.

باعاسى قانشا؟

باسسەينگە ءبىر رەت بارۋ قۇنى ءارقالاي، 1500 تەڭگەدەن باستالادى. ءبىر ايعا، جارتى جىلعا، ءبىر جىلعا كۋپون ساتىپ الساڭىزدار دا بولادى. ول ءۇشىن قالاڭىزداعى ءجۇزۋ ورتالىعىمەن بايلانىسىڭىز.

باسسەيندەگى جاتتىعۋ

جۇزە المايتىن ادامدار سۋعا باتىرمايتىن قورعانىس قۇرالدارى ارقىلى باسسەيننىڭ ىشىنە ءتۇسىپ، جاتتىعۋ جاساي الادى. جاتتىعۋدى ءوزىڭىز دە، ترەنەردىڭ كومەگىمەن دە جاساۋعا بولادى. ادەتتە ءجۇزۋ ورتالىعىنىڭ ترەنەرلەرى جاتتىعۋدى كورسەتىپ تۇرادى، ال ءسىز ونى قايتالايسىز.

سۋدىڭ ىشىندە جاسالاتىن وڭاي جاتتىعۋلار:

- سۋدىڭ ىشىندە جۇگىرىڭىز. ەكى قولىڭىزدى ەكى جاققا تىكە ۇستاپ، ەكى اياعىڭىزدى كەزەك- كەزەك قوزعالتىڭىز.

- اياعىڭىزدى بۇگىپ، قايتا تىكتەپ، وڭعا، سولعا، ارتقا، العا بۇرىلىپ شىعىڭىز. جاتتىعۋدى وڭ جاعىڭىزبەن دە، سول جاعىڭىزبەن دە 4 رەت قايتالاڭىز.

- ءىشىڭىزدى بوساڭسىتىپ، جامباس بۇلشىق ەتىنە كۇش سالىپ ءبىر اياعىڭىزدى ەكىنشى اياعىڭىزعا قويىپ، سۋعا وتىرىڭىز. ەكى اياعىڭىزبەن بىردەي قايتالاڭىز.

- ەكى اياعىڭىزدى ەكى جاققا كوتەرىپ، قايتا ءتۇسىرىڭىز. جاتتىعۋدى 4 رەت قايتالاڭىز.

- ەكى الاقانىڭىزدى ءبىر- بىرىنە تيگىزىپ، ەكى قولىڭىزدى ەكى جاققا جايىڭىز. جاتتىعۋدى 10 رەت قايتالاڭىز. بۇل ۋاقىتتا اياقتى باياۋ قيمىلداتىڭىز. مىنا سۋرەتتەگى جاتتىعۋلاردى جاساۋعا بولادى.

Massaget.kz