مەملەكەتتىك ورگان باسشىلارىنىڭ حالىقپەن كەزدەسۋ وتكىزۋ ءتارتىبى بەلگىلەندى

None
None
نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ ورتالىق اتقارۋشى ورگاندار باسشىلارىنىڭ حالىقپەن كەزدەسۋ وتكىزۋ ءتارتىبى تۋرالى جاڭا جارلىققا قول قويدى، دەپ حابارلايدى اقوردانىڭ باسپا ءسوز قىزمەتى.

«قازاقپارات» وقىرمان نازارىنا قۇجاتتىڭ تولىق ءماتىنىن ۇسىنادى.

***

ورتالىق اتقارۋشى ورگاندار باسشىلارىنىڭ حالىقپەن كەزدەسۋلەرىن وتكىزۋ تۋرالى

2022 -جىلعى 08- ءساۋىر «قازاقستان رەسپۋبليكاسىنىڭ پرەزيدەنتى تۋرالى» قازاقستان رەسپۋبليكاسى كونستيتۋتسيالىق زاڭىنىڭ 10، 17 جانە 21-باپتارىنا سايكەس جانە قازاقستاندىق قوعامدى ودان ءارى دەموكراتيالاندىرۋ، حالىقتىڭ ەلدە جۇرگىزىلىپ جاتقان رەفورمالار تۋرالى حاباردار بولۋىن ارتتىرۋ، اتقارۋشى ورگانداردىڭ حالىق الدىنداعى جاۋاپتىلىعى مەن ەسەپتىلىگىن كۇشەيتۋ، مەملەكەتتىك باسقارۋ پروتسەسىنە حالىقتى كەڭىنەن تارتۋ ماقساتىندا قاۋلى ەتەمىن:

ورتالىق اتقارۋشى ورگانداردىڭ (قازاقستان رەسپۋبليكاسىنىڭ قورعانىس، سىرتقى ىستەر مينيسترلىكتەرىن قوسپاعاندا) باسشىلارى جىل بويى حالىقپەن تۇراقتى كەزدەسۋلەر وتكىزسىن. ورتالىق اتقارۋشى ورگاندار باسشىلارىنىڭ حالىقپەن كەزدەسۋلەرىنىڭ كەستەسىن (بۇدان ءارى - كەستە) قالىپتاستىرۋ مەن بەكىتۋدىڭ مىناداي ءتارتىبى بەلگىلەنسىن:

1) جىل سايىن 1- جەلتوقسانعا دەيىن ورتالىق اتقارۋشى ورگاندار الداعى كۇنتىزبەلىك جىلعا ارنالعان كەستەنى قالىپتاستىرۋ ءۇشىن اقپاراتقا قول جەتكىزۋ سالاسىنداعى ۋاكىلەتتى ورگانعا ۇسىنىستار جىبەرسىن؛

2) جىل سايىن 15- جەلتوقسانعا دەيىن اقپاراتقا قول جەتكىزۋ سالاسىنداعى ۋاكىلەتتى ورگان كەستەنىڭ جوباسىن قازاقستان رەسپۋبليكاسى پرەمەر- ءمينيسترىنىڭ كەڭسەسىنە ەنگىزسىن؛

3) جىل سايىن 10- قاڭتارعا دەيىن قازاقستان رەسپۋبليكاسىنىڭ ۇكىمەتى كەستەنى بەكىتسىن.

ورتالىق اتقارۋشى ورگانداردىڭ (قازاقستان رەسپۋبليكاسىنىڭ قورعانىس، سىرتقى ىستەر مينيسترلىكتەرىن قوسپاعاندا) باسشىلارى:

1) قانداي دا ءبىر وڭىردە جەتەكشىلىك ەتەتىن سالادا جاعدايدىڭ ناشارلاۋ تاۋەكەلدەرى بولجانعان نە تۋىنداعان جاعدايدا، حالىقپەن كەستەدەن تىس كەزدەسۋ وتكىزسىن؛

2) تەحنيكالىق مۇمكىندىكتەردى ەسكەرىپ، حالىقتىڭ الەۋمەتتىك جەلىلەردەگى رەسمي اككاۋنتتاردا پىكىر ءبىلدىرۋ مۇمكىندىگىن مىندەتتى تۇردە بەرە وتىرىپ، ونلاين- ترانسلياتسيالار، سونداي- اق قاجەت بولعان جاعدايدا بەينەكونفەرەنتس بايلانىس ۇيىمداستىرۋ ارقىلى كەزدەسۋلەر وتكىزۋدى قامتاماسىز ەتسىن؛

3) كەزدەسۋ ءۇشىن جوسپارلانعان ۋاقىتتىڭ تورتتەن بىردەن اسپايتىن بولىگىن - باياندامانى تانىستىرىپ، ۋاقىتتىڭ قالعان بولىگىن «سۇراق- جاۋاپ» فورماتىندا وتكىزسىن؛

4) كەزدەسۋلەر وتكىزۋدىڭ بارلىق كەزەڭىندە اقپاراتقا قول جەتكىزۋ سالاسىنداعى ۋاكىلەتتى ورگانمەن تۇراقتى اقپاراتتىق ءوزارا ءىس- قيمىلدى قامتاماسىز ەتسىن؛

5) حالىقپەن كەزدەسۋ وتكىزگەنگە دەيىن: حالىقتىڭ پىكىرىن ەسكەرە وتىرىپ، ونى وتكىزۋ كۇنى مەن ۋاقىتىن ايقىنداۋدى؛

رەسمي ينتەرنەت- رەسۋرستارعا، ورتالىق اتقارۋشى ورگاندار باسشىلارىنىڭ بلوگ- پلاتفورماسىنا، كوممۋنيكاتسيانىڭ باسقا دا نىساندارىنا جانە اكىمدەردىڭ حالىقپەن كەزدەسۋلەرىنىڭ قورىتىندىلارى بويىنشا حالىقتان كەلىپ تۇسكەن سۇراۋ سالۋلار مەن ۇسىنىستاردى جيناۋدى، تالداۋدى قامتاماسىز ەتسىن؛

6) حالىقپەن كەزدەسۋ وتكىزۋ شەڭبەرىندە: ازاماتتارعا جەكە قابىلداۋ جۇرگىزۋدى؛ كوممەرتسيالىق ەمەس ۇيىمدارمەن كەزدەسۋلەردى؛ بۇقارالىق اقپارات قۇرالدارىنا ارنالعان بريفينگتى قامتاماسىز ەتسىن؛

7) حالىقپەن كەزدەسۋ وتكىزگەننەن كەيىن: ايتىلعان بارلىق پروبلەمالىق ماسەلەلەردى جۇيەلەۋدى؛ كەزدەسۋلەر مەن ازاماتتاردى قابىلداۋ اياقتالعان كۇننەن باستاپ كۇنتىزبەلىك ون كۇننەن كەشىكتىرمەي، وتكىزىلگەن كەزدەسۋلەردىڭ قورىتىندىلارى تۋرالى اقپاراتتى، پروبلەمالىق ماسەلەلەردىڭ تىزبەسىن، پروبلەمالىق ماسەلەلەردى شەشۋدىڭ ناقتى مەرزىمدەرىن، جاۋاپتى ورىنداۋشىلاردى كورسەتە وتىرىپ، ولاردى شەشۋ جونىندەگى ءىس- قيمىل جوسپارىن بۇقارالىق اقپارات قۇرالدارىندا، ونىڭ ىشىندە رەسمي ينتەرنەت- رەسۋرستاردا ورنالاستىرۋدى؛

كەزدەسۋلەردە حالىق كوتەرگەن پروبلەمالىق ماسەلەلەردى شەشۋ بارىسى تۋرالى اقپاراتتى ورتالىق اتقارۋشى ورگاننىڭ رەسمي ينتەرنەت- رەسۋرسىندا توقسان سايىن ورنالاستىرۋدى قامتاماسىز ەتسىن.

بارلىق دەڭگەيدەگى اكىمدەر:

1) ورتالىق اتقارۋشى ورگاندار باسشىلارىنىڭ حالىقپەن كەزدەسۋلەرىنە قاتىسسىن؛

2) كەزدەسۋلەر وتكىزۋدى، ونىڭ ىشىندە بۇقارالىق اقپارات قۇرالدارىندا جانە اكىمدىكتەردىڭ (اكىم اپپاراتتارىنىڭ) رەسمي اككاۋنتتارىندا، الەۋمەتتىك جەلىلەردە جانە جالپىعا بىردەي قولجەتىمدى جەرلەردە اقپاراتتىق- ناسيحات جۇمىستارىن ۇيىمداستىرۋدا ورتالىق اتقارۋشى ورگاندارعا قولداۋ كورسەتسىن؛

3) اكىمدەردىڭ حالىقپەن كەزدەسۋلەرىنىڭ قورىتىندىلارى بويىنشا ءوڭىردىڭ ورتالىق اتقارۋشى ورگاندار، ۇلتتىق حولدينگتەر مەن كومپانيالار دەڭگەيىندە شەشۋدى تالاپ ەتەتىن جۇيەلى پروبلەمالارىن جيناقتاپ- قورىتسىن جانە كەزدەسۋلەر وتكىزۋ كەزىندە ەسەپكە الۋ ءۇشىن جارتى جىلدا ءبىر رەت قۇزىرەتى بويىنشا ورتالىق اتقارۋشى ورگاندارعا جىبەرسىن.

اقپاراتقا قول جەتكىزۋ سالاسىنداعى ۋاكىلەتتى ورگان:

1) رەسپۋبليكالىق بۇقارالىق اقپارات قۇرالدارىندا كەزدەسۋلەر وتكىزىلەتىنىن حابارلاۋدى جانە ولاردىڭ وتكىزىلۋ بارىسى مەن ناتيجەلەرىن كەڭىنەن اقپاراتتىق جاريا ەتۋدى؛

2) ورتالىق اتقارۋشى ورگاندار قىزمەتىنىڭ تيىمدىلىگىن جىل سايىنعى باعالاۋ شەڭبەرىندە كەزدەسۋلەر وتكىزۋ ناتيجەلەرىن ەسەپكە الۋدى؛

3) حالىقپەن كەزدەسۋلەر وتكىزۋ جونىندەگى ادىستەمەلىك ۇسىنىمداردى بەكىتۋدى جانە ورتالىق اتقارۋشى ورگانداردىڭ نازارىنا جەتكىزۋدى قامتاماسىز ەتسىن.

قازاقستان رەسپۋبليكاسىنىڭ ۇكىمەتى:

1) كەزدەسۋلەر وتكىزۋدىڭ قورىتىندىلارىن جارتىجىلدىق نەگىزدە قاراسىن؛

2) الەۋمەتتىك شيەلەنىستىڭ جانە قوعامدىق- ساياسي جاعدايدىڭ تۇراقسىزدانۋىنىڭ جوعارى تاۋەكەلدەرى بولعان جاعدايدا، ورتالىق اتقارۋشى ورگانداردىڭ كەزدەسۋلەرىنە قازاقستان رەسپۋبليكاسى پرەمەر- ءمينيسترى ورىنباسارلارىنىڭ قاتىسۋىن قامتاماسىز ەتسىن؛

3) ورتالىق اتقارۋشى ورگانداردىڭ ءبىرىنشى باسشىلارى ورىنباسارلارىنىڭ جانە ۆەدومستۆولارى ءتوراعالارىنىڭ حالىقپەن تۇراقتى كەزدەسۋلەر وتكىزۋىن قامتاماسىز ەتسىن؛

4) وسى جارلىقتى ىسكە اسىرۋ جونىندە وزگە دە شارالار قابىلداسىن. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

وسى جارلىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ پرەزيدەنتى ق. توقايەۆ

نۇر- سۇلتان، اقوردا، 2022 -جىلعى 7- ءساۋىر № 863

سوڭعى جاڭالىقتار