ا ق ش-تا اۋىر جۇك كولىگىن جۇرگىزەتىن اقتوبەلىك ارۋ ايلىق تابىسى قانشا ەكەنىن ايتتى - فوتو

نۇر-سۇلتان. قازاقپارات – ا ق ش- تا جۇكتىڭ 70 پايىزى جۇك كولىكتەرى ارقىلى تاسىمالدانادى. ەلدەگى كولىك ينفراقۇرىلىمىنىڭ دامۋى مەن وسى سالاعا كىرەتىن كىرىستىڭ كوپتىگى جۇك تاسىمالداۋ قىزمەتىنە دەگەن سۇرانىستى ارتتىرعان.

وسىنداي قىزمەت تۇرىمەن قازاق قىزى اسسول مۇحامەدجانوۆا اينالىسىپ ءجۇر. ونىڭ ايتۋىنشا، امەريكادا اۋىر جۇك كولىگىن جۇرگىزۋ قيىن بولعانىمەن تابىسى وتە جوعارى. سوڭعى ءبىر جىلدان بەرى ول ا ق ش- تىڭ تۇكپىر- تۇكپىرىنە جۇك تاسىمالدايدى.

Azattyq R‎hy ءتىلشىسى اقتوبە تۋماسىمەن سۇحباتتاسىپ، امەريكاداعى جۇمىسى، تابىس كوزى، جولداعى قيىندىقتار مەن قىزىقتار جايىندا سۇراپ ءبىلدى.

اسسولدىڭ نەگىزگى ماماندىعى - ينجەنەر- جوبالاۋشى. امەريكاعا قونىس اۋدارعانىنا ءتورت جىل بولعان وتانداسىمىز اتالعان جۇمىسقا قالاي ورنالاسقانىن، جۇك تاسۋشىعا قويىلاتىن باستى تالاپتار جونىندە ايتتى.

«امەريكا قۇراما شتاتتارىندا ۇلكەن جۇك كولىكتەرىن جۇرگىزۋ ارقىلى شىنىمەن دە جاقسى تابىس تابۋعا بولادى. مەنى قىزىقتىرعانى دا تابىس كوزى بولدى. جۇمىسقا تۇرۋ ءۇشىن ايتارلىقتاي قاتاڭ تالاپتار قويىلمايدى، تەك دەنساۋلىعىڭىز دۇرىس بولۋى كەرەك. جۇك كولىگىن جۇرگىزۋدى ارنايى مەكتەپتە وقىتادى. جول ءجۇرۋ قاعيدالارىن سول جەردە تولىق ۇيرەتەدى. كەيىن كۇردەلى ەمتيحان تاپسىرىپ، اتالعان قىزمەتكە ورنالاسا الاسىز. مەنىڭ ويىمشا، جۇك كولىگىن جۇرگىزۋدە ەڭ قيىنى - كولىكتى دۇرىس تۇراق ورنىنا قويا ءبىلۋ. كەيدە وتە كىشكەنتاي قويمالار كەزدەسەدى، ال تىركەمەسى بار جۇك كولىگىنىڭ ۇزىندىعى جوق دەگەندە 20 مەتردەن اسادى. سوندىقتان تۇراققا قويۋ كەزىندە بارىنشا مۇقيات بولۋ قاجەت.

ۇزاق ساپار كەزىندە اۋا رايىنىڭ قولايسىزدىعىنا بايلانىستى جۇمىس قيىنداپ كەتەتىن كەزدەر بولادى. ءبىراق، مۇندا جۇرگىزۋشىنىڭ تاۋلىگىنە 11 ساعاتتان ارتىق كولىك جۇرگىزبەۋى قاداعالانادى»، - دەيدى اسسول.

وتانداسىمىزعا قازىرگى جۇمىسى وزىنە ۇنايتىنىپ ايتىپ، جولدا بولاتىن قىزىقتارمەن ءبولىستى. ايتۋىنشا، امەريكادا جۇك كولىگىن جۇرگىزەتىن قىزداردى كەزدەستىرۋ قالىپتى جاعداي.

«جۇمىس بارىسىندا ا ق ش-تىڭ تۇكپىر- تۇكپىرىنە بارامىن. جولدا ماعان ۇنايتىنى - تابيعاتتى تاماشالاۋ. ءوزىڭىز بىلەسىز، امەريكانىڭ تابيعاتى سان الۋان. جول ۇستىندە ءتۇرلى جان- جانۋارلاردى كەزدەستىرۋگە بولادى. تابيعاتتىڭ سۇلۋلىعى شارشاعانىڭدى بىردەن ۇمىتتىرادى.

دەسە دە، جولدىڭ ءوز قيىندىعى بار. اسىرەسە جاۋىن- شاشىن، جولداعى جوندەۋ جۇمىستارى جانە قالىڭ تۇماندا جول ءجۇرۋ قيىندايدى، ءبىراق جوعارىدا ايتقانىمداي جولدا 11 ساعاتتان ارتىق بولمايمىن. سوندىقتان دەمالۋعا، سپورتپەن شۇعىلدانىپ، قالاعانىمشا كوڭىل كوتەرۋگە ۋاقىت تابامىن»، - دەيدى جۇرگىزۋشى قىز.

اسسول جۇك تاسىپ، ايىنا شامامەن 10 مىڭ دوللار تابادى. تەڭگەگە شاققاندا ايلىق تابىسى 5 ميلليون تەڭگەنى قۇرايدى. قازاقستانداعى جۇك تاسۋشىلاردىڭ تابىسىمەن ءتىپتى سالىستىرۋعا كەلمەيدى. ءبىر قاراعاندا، قىز بالاعا مۇلدە قولايسىز جۇمىس كورىنگەنىمەن ول جولدىڭ بارلىق قيىندىعىنا ەتى ۇيرەنگەنىن ايتتى.

«الەۋمەتتىك جەلىدە ماعان ءجيى قويىلاتىن سۇراقتاردىڭ باسىم كوپشىلىگى تابىس كوزى جايىندا. ەڭ الدىمەن ايتقىم كەلەتىنى، ءسىز بەلگىلى ءبىر كومپانيادا جالدامالى جۇرگىزۋشى بولىپ نەمەسە ءوز كولىگىڭىزبەن جەكە تاسىمالداۋشى رەتىندە دە جۇمىس ىستەي الاسىز. سايكەسىنشە تاباتىن تابىسىڭىز دا ءار ءتۇرلى بولادى. جالپىلاي العاندا، جۇك تاسمالداۋشى بولىپ وتە جاقسى تابىس تابۋعا مۇمكىندىك بار.

كەي كەزدەرى تۇنگى ۋاقىتتا جولعا شىعامىن، سونداي ساتتەردە جاقىندارىم جۇمىستىڭ اۋىرلىعىن ايتىپ ۋايىمداپ جاتادى. دەسە دە، ولار مەنىڭ مىنەزىمدى جاقسى بىلەدى. ءوزىم دە بارىنشا ۇقىپتى، ساق بولۋعا تىرىسامىن. الەۋمەتتىك جەلىدەگى وقىرماندارىم مەنىڭ جۇك كولىگىن ايداعانىمدى كورىپ، تاڭعالىپ جاتادى.

«ۇنەمى جولدا جۇرۋگە قورىقپايسىز با، دەنساۋلىققا زيان ەمەس پە؟» دەگەن سۇراقتى ءجيى ەستەيمىن. ايتارىم، ەگەر ءسىز شىنىمەن قالاساڭىز، كەز- كەلگەن جۇمىستى ىستەپ شىعۋعا بولادى. جاراتىلىسىمىز نازىك بولعانىمەن بۇل ءوزىڭ قالاعان جۇمىستى ىستەۋگە ەش كەدەرگى كەلتىرمەيدى»، - دەيدى وتانداسىمىز.

اسسول لوس- اندجەلەس قالاسىندا كۇيەۋىمەن بىرگە قۇرادى. جولداسىمەن سول ەلدە تانىسىپ، سوندا وتاۋ قۇرعان. جىگىت تە اسسول سەكىلدى ا ق ش-قا «باقىتتى ءومىر» ىزدەپ بارعان.

«جولداسىمنىڭ ۇلتى - ورىس، ءبىراق ءوزى وزبەكستاندا تۋعان. امەريكادا بۇرىننان تۇرادى. دەسە دە، ءبىزدىڭ مادەنيەتىمىز، سالت-ءداستۇرىمىزدى جاقسى بىلەدى، تۇسىنەدى. سوندىقتان ەلگە كەلىپ قوناق بولىپ تۇرامىز»، - دەيدى قازاق قىزى.

اسسول امەريكادا ءوزى سەكىلدى باسقا ەلدەن كەلگەندەرگە جۇمىس تابۋ وڭاي ەكەنىن ايتتى. كەيىپكەرىمىز بولاشاقتا ءدال وسى باعىتتا جەكە كاسىبىن اشقىسى كەلەتىنىن جەتكىزدى.

«امەريكادا كەز-كەلگەن سالادا جۇمىس ىستەۋگە مۇمكىندىك بار. ەڭ باستىسى ءبىلىم الۋعا، جاڭا دۇنيەنى ۇيرەنۋدەن قورىقپاساڭىز بولعانى. ءبارى ادامنىڭ وزىنە جانە قويعان ماقساتىنا، جوسپارىنا بايلانىستى. امەريكادا جالاقى وتە جاقسى تولەنەتىن جۇمىس - ءتىس دارىگەرى. اتالعان سالادا ءبىلىمىڭىز بەن تاجىريبەڭىز بولسا جۇمىستى قينالماستان تاباسىز.

بىرەۋگە تاڭ قالارلىق كورىنۋى مۇمكىن، ءبىراق ءدال وسى جۇك تاسۋ قىزمەتىن دامىپ، بولاشاقتا جۇك تاسۋمەن اينالىساتىن ءوز كومپانيامدى اشقىم كەلەدى. قازىر وسى باعىتتا ءوزىمدى شىڭداپ جاتىرمىن.

شەتەلدە جۇمىس ىستەگىسى كەلەتىن جاندار ءاردايىم ۆيزا الۋعا، ستۋدەنتتىك باعدارلامالاردى ىزدەۋگە، ۇنەمى ساياحاتتاۋعا تىرىسۋ كەرەك. ەلگە ءارقاشان ورالۋعا بولادى، ءبىراق الەمدى ارالاۋ ارقىلى جاڭا ورتا، جاڭا دوس تابا الاسىز. باعا جەتپەس تاجىريبە جيناپ، تاۋەكەلگە بارۋدى ۇيرەنەسىز. ءومىردىڭ ءوزى وسىنداي مۇمكىندىكتەردى پايدالانۋدان تۇرادى دەپ ويلايمىن» - دەيدى اسسول مۇحامەدجانوۆا.