قازاقستاننىڭ كۇنباعىس تۇقىمىنا، ۇن مەن استىعىنا ەكسپورتتىق سۇرانىس ارتادى
بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.
«ءدال قازىرگى ۋاقىتتا كۇنباعىس تۇقىمىنا، بارلىق مايلى داقىلدارعا، بيدايعا، ۇنعا جانە ودان جاسالاتىن بارلىق ءونىم تۇرلەرىنە سۇرانىستىڭ ارتاتىندىعىنا باتىل بولجام جاساي الامىز. ءبىزدىڭ مىندەتىمىز - وسى سۇرانىسقا دايىن بولۋ جانە ەڭ الدىمەن قازاقستاندىقتاردىڭ وزىندىك تۇتىنۋىن تولىعىمەن قامتاماسىز ەتۋ ءۇشىن ۇلكەن كولەمدە ءوندىرۋ ءارى ارتىق ءونىمدى شەتەلگە شىعارىپ، ەكسپورتتاۋ»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، كۇنباعىس مايىنىڭ، ءداندى داقىلداردىڭ، سونىمەن قاتار ۇننىڭ باعاسى قىمباتتاپ كەلەدى.
«وسى ورايدا باعا ءوسىمى ءبىزدىڭ اۋىل شارۋاشىلىعى تاۋارلارىن وندىرۋشىلەرگە قولايلى بولماق. بيىل ءبىز جاعدايدى، قولايلى كونيۋكتۋرانى جانە قازاقستاندا شىعارىلاتىن اۋىل شارۋاشىلىعى تاۋارلارىنىڭ نەگىزگى توبىنىڭ باعاسى وسىمىنە قاتىستى بولجامدى بارىنشا ءتيىمدى پايدالانىپ قالۋىمىز قاجەت. بارلىق الاڭدى مۇمكىندىگىنشە يگەرىپ، مول ءونىم الۋىمىز كەرەك. بارلىق اگروتەحنولوگيالار مەن اۋىل شارۋاشىلىعى تاۋارلارىن وندىرۋشىلەردى ءتيىمدى پايدالانا وتىرىپ، بيىل مول تابىس تابۋعا وتە جاقسى مۇمكىندىك بار»، - دەدى ول.
سونىمەن قاتار مينيستر ب ا ق وكىلدەرىنىڭ ساۋالىنا وراي گەرمانياداعى كۇنباعىس مايىنىڭ كۇرت قىمباتتاۋىنا قاتىستى پىكىر ءبىلدىردى.
«ەڭ الدىمەن ءوز نارىعىمىزدى مولىقتىرىپ الۋعا ءتيىسپىز. ءبىرىنشى مىندەت - مۇنداي جاعدايدىڭ قازاقستاندا قايتالانباۋى، ەلىمىزدە كۇنباعىس مايىنىڭ 2-3 ەسە قىمباتتاماۋى. بۇل رەتتە ەگەر كۇنباعىس تۇقىمىن وندىرۋشىلەردى شامادان تىس قىسىپ جىبەرسەك، وندا ولار كەلەسى جىلى سەپپەيدى. ءبىزدىڭ مىندەتىمىز - كۇنباعىس مايى مەن كۇنباعىس تۇقىمىن وندىرۋشىلەردىڭ ىمىرا تابۋى جانە باعانىڭ قازاقستاننىڭ ىشىندە جوعارى بولماۋى، سونىمەن قاتار بۇل باعانىڭ زاۋىتتىڭ دا، كۇنباعىس تۇقىمىن وندىرۋشىلەردىڭ دە كىرىستىلىگىن قامتاماسىز ەتۋى. بولجامعا قاراعاندا بيىل كۇنباعىس تۇقىمى سەبىلەتىن الاڭ، شارۋاشىلىقتار ارتىپ كەلەدى. وسى باعىتتا جۇمىس ىستەپ جاتىرمىز»، - دەدى ەربول قاراشوكەيەۆ.
