تانىمال ديكتور ءابدىرالى بولەباي ومىردەن وزدى
ءابدىرالى بولەباي جامبىل وبلىسى جامبىل اۋدانىنىڭ ەرنازار اۋىلىندا دۇنيەگە كەلگەن. الماتىداعى 46№ قالالىق كاسىپتىك تەحنيكالىق ۋچيليشەنى، قۇرمانعازى اتىنداعى كونسەرۆاتوريانى بىتىرگەن.
ەڭبەك جولىن «قازاق فيلم» كينوستۋدياسىندا رەجيسسەردىڭ كومەكشىسى بولىپ باستاعان.
قازاق راديوسىندا، قازاق تەلەديدارىندا ديكتور، ديكتورلار توبىنىڭ جەتەكشىسى، «حابار» اگەنتتىگىندە «جەتى كۇن» اقپاراتتى ساراپتاۋ باعدارلاماسىنىڭ جانە «جاڭالىقتار» قىزمەتىنىڭ جۇرگىزۋشىسى، «قازاقستان» ۇلتتىق ارناسى استانا فيليالىنىڭ ديكتورى، ق ر پرەزيدەنتى تەلەراديوكەشەنىنىڭ پروديۋسەرى، ق ر ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ (قارجى پوليتسياسى) باسپا ءسوز حاتشىسى بولىپ قىزمەت اتقاردى.
بەلگىلى ديكتور ءومىرىنىڭ سوڭىنا دەيىن قازاق راديوسىندا ديكتورلىق قىزمەت ەتتى.
ول تەلەراديودا ديكتورلىق ونەردىڭ قىر-سىرىن تەرەڭ مەڭگەرگەن، داۋىس ءۇنى وزگەشە، شەبەرلىگى تولىسقان بىلىكتى مامان بولدى.
«ونىڭ وقىعان تەلەراديوحابارلارىنان وزگەشە ءبىر تىنىس، كەڭ اۋقىم، بيازىلىق پەن پاراساتتىلىق لەبى ەسەدى. ءجۇزى جىلى، جايدارلى، قاراپايىم. بۇل تەڭەۋ قازاق تەلەۆيزياسى مەن راديوسى تاريحىنان ويىپ تۇرىپ ورىن العان ءابدىرالى بولەباي تۋرالى ايتىلعان. كەز كەلگەن اقپاراتتىڭ شىرايىن شىعارىپ وقيتىن ءابدىرالى اعامىزدىڭ بەينەسى كوزى قاراقتى كورەرمەننىڭ جادىندا ماڭگى قالارى ءسوزسىز. ءابدىرالى اعامىزدىڭ التىن داۋىسى قازاق راديوسىنىڭ «التىن قورىندا» ساقتاۋلى»، - دەپ اتاپ وتەدى راديودان.
