قۇرىلىسشىلار وداعى «ەڭبەك» پارتياسىن قۇرماق
«ءبىز 31-ناۋرىز كۇنى وداعىمىزدىڭ جىلدىق ەسەپ بەرۋ كونفەرەنتسياسىن وتكىزدىك جانە وعان ەلىمىزدىڭ 16 وڭىرىندەگى مۇشەلەرىمىز قاتىستى. ءبىزدىڭ قۇرىلىمدا 16 ءوڭىر بار جانە قۇرىلىس سالاسىندا جۇمىس ىستەيتىن 1200-دەن استام كومپانيا جانە 500 مىڭنان استام مۇشەمىز بار. سول ەسەپتىك كونفەرەنتسيادا ءبىزدىڭ قۇرىلىسشىلار «ەڭبەك» پارتياسىن قۇرۋ جونىندە ۇسىنىس بەردى. ارينە، مەن وسى قۇرىلىس وداعىنىڭ ءتوراعاسى بولعاندىقتان، ۇسىنىستاردى ەستىپ، قولداۋ كورسەتتىك. وزدەرىڭىز دە كورىپ وتىرسىزدار، قازىرگى ۋاقىتتا ءتۇرلى رەفورمالار قاجەت. ءبىراق وكىنىشكە وراي، سوڭعى 10-20 جىلدا قۇرىلىس، ەكونوميكا سالالارىنداعى رەفورمالاردىڭ تيىمدىلىگى تومەن بولدى. سوندىقتان، ەكونوميكامىز دامىسىن دەپ، ءوزىمىز دە قۇرىلىسشىلار رەتىندە وندىرىسپەن اينالىساتىن، جول سالاتىن، ينفراقۇرىلىم سالاتىن مەكەمەلەرمەن، جوبالاۋشىلارمەن بىرگە ساياسي پارتيا قۇرۋدى ۇيعاردىق»، - دەدى تالعات ەرعاليەۆ «Park Inn» قوناق ۇيىندە وتكەن باسپا ءسوز كونفەرەنسياسىندا.
تالعات ەرعاليەۆ تىلشىلەرمەن سۇحباتىندا قازىرگى تاجىريبەلى پارتيالارمەن قالاي باسەكەلەسەتىنى تۋرالى سۇراققا جاۋاپ بەردى.
«ول پارتيالار بىرنەشە جىل جۇمىس ىستەدى جانە ناتيجە بەرمەدى دەپ ويلايمىن. جاڭا ادامدارعا، پارتيالارعا جول بەرەتىن ۋاقىت كەلدى، ولار الدىڭعى قاتەلىكتەر مەن تۇجىرىمدارعا سۇيەنە وتىرىپ، باسقاشا كوزقاراسپەن قارايدى. باعدارلامامىز بار. ءاربىر قازاقستاندىقتى باسپانامەن قامتۋ - باستى ماقساتتارىمىزدىڭ ءبىرى. (...) ءبىز ەڭبەك ادامدارىمىز، ەڭبەك ەتكىمىز كەلەدى. ءبىزدىڭ مىندەتىمىز - ازاماتتاردى تۇرعىن ۇيمەن قامتاماسىز ەتۋ. جەتى جىل بۇرىن كەزەكتە 450 مىڭ ادام تۇرعان. قازىر ءبىز 15-17 ميلليون شارشى مەتردەن تۇرعىن ءۇي سالىپ جاتىرمىز، ءبىراق ولاردىڭ سانى ازايعان جوق. تاۋەلسىزدىك العانىمىزعا 30 جىل بولدى، ءبىراق 20 جىل بۇرىن وزەكتى بولعان پروبلەمالار ءالى دە شەشىلگەن جوق. سوندىقتان ءبىز بىرىگىپ، پارتيا اشىپ جاتىرمىز. مەنىڭ ويىمشا، بۇل ناتيجە بەرەدى. ءبىز ءالى ءوتىنىش بەرگەن جوقپىز. پارتيا قۇرۋ تۋرالى جاريالادىق، ەندى ءوزىمىز دايىندالامىز جانە وڭىرلەردى دايىندايمىز. كۇزگە قاراي پارلامەنت كونستيتۋتسيالىق تۇزەتۋلەردى، پارتيالار تۋرالى زاڭدى قابىلدايدى جانە ءبىز پرەزيدەنت ءوز جولداۋىندا اتاپ وتكەندەي، ەلىمىزدىڭ دامۋى ءۇشىن ەڭبەكتەنۋدى جالعاستىرامىز»، - دەدى ت. ەرعاليەۆ.
