قازاقستاندا فەرمەرلەردى قارجىلاندىرۋ كولەمى ارتتى
بۇل تۋرالى ءماجىلىستىڭ جالپى وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.
«وزدەرىڭىزگە ءمالىم، سوڭعى ۋاقىتتا اۋىل شارۋاشىلىعى وندىرىسىنە ارنالعان تاۋارلىق- ماتەريالدىق قۇندىلىقتاردىڭ بىرنەشە ەسە قىمباتتاۋى بايقالۋدا. وسىعان بايلانىستى، قازىرگى ۋاقىتتا كوكتەمگى دالا جانە ەگىن جيناۋ جۇمىستارىن قارجىلاندىرۋ كولەمىن قوسىمشا 70 ميلليارد تەڭگەگە ۇلعايتىپ، بيۋدجەتتىك كرەديت بەرۋدىڭ جالپى كولەمىن 140 ميلليارد تەڭگەگە جەتكىزۋ ماسەلەسى پىسىقتالۋدا. ازىق- تۇلىك كەلىسىمشارت كورپوراتسياسىنىڭ فورۆاردتىق ساتىپ الۋ باعدارلاماسى ارقىلى 80 ميلليارد تەڭگە كولەمىندە جەڭىلدەتىلگەن كرەديتپەن قامتاماسىز ەتىلگەن. بۇل رەتتە، اعىمداعى جىلى فورۆاردتىق ساتىپ الۋ كولەمى 2 ەسەگە ارتتى»، - دەدى ە. قاراشوكەيەۆ.
سونىمەن قاتار ول 1-ساۋىردەگى جاعداي بويىنشا «كەڭ دالا» باعدارلاماسى بويىنشا 63,1 ميلليارد تەڭگە سوماسىنا وتىنىمدەر قارجىلاندىرىلعانىن ايتتى. مۇنىمەن قوسا، سونداي-اق ازىق- تۇلىك كەلىسىمشارت كورپوراتسياسى 57,2 ميلليارد تەڭگە سوماسىنا وتىنىمدەردى قارجىلاندىردى. بۇدان باسقا، 200 مىڭ توننا كولەمىندە جەمدىك استىق قورىن قالىپتاستىرۋ ءۇشىن فورۆاردتىق ساتىپ الۋعا 20 ميلليارد تەڭگە ءبولۋ ماسەلەسى پىسىقتالىپ جاتىر. 2021 -جىلعى قۇرعاقشىلىق قايتالانعان جاعدايدا، مال مەن قۇس باسىنىڭ ساقتالۋىن قامتاماسىز ەتەدى. اكىمدىكتەردىڭ دەرەكتەرى بويىنشا 2022 -جىلى جالپى ەگىس كولەمى 23,1 ميلليون گەكتاردى قۇرايدى، بۇل 2021 -جىلمەن سالىستىرعاندا 125 مىڭ گەكتارعا ارتىق. ايتا كەتەيىك، بۇگىن ءماجىلىستىڭ جالپى وتىرىسىندا وڭىرلەرگە شىعۋ بارىسىندا ق ر پارلامەنتى ءماجىلىسىنىڭ دەپۋتاتتارىنا كەلىپ تۇسكەن ازاماتتاردىڭ وتىنىشتەرىن مەملەكەتتىك ورگانداردىڭ قاراۋ ناتيجەلەرى تالقىلانىپ جاتىر. دەپۋتاتتاردىڭ وڭىرلەرگە ساپارلارى بارىسىندا كوتەرىلگەن ەكى مىڭعا جۋىق سۇراق ۇكىمەت تاراپىنان جان- جاقتى ساراپتالىپ، قارالدى.
