ۇيىرمە قىزمەتىن ۇسىنۋشىلار ءۇشىن بالا سانى شەكتەلەدى

None
None
نۇر- سۇلتان. قازاقپارات - ق ر مادەنيەت جانە سپورت ءمينيسترى داۋرەن ابايەۆ ۇكىمەت وتىرىسىندا ۇيىرمە قىزمەتىن ۇسىنۋشىعا سپورت ءتۇرى، اينالىساتىن توپتار مەن بالا سانى بويىنشا شەكتەۋ ورناتۋدى ۇسىندى، دەپ حابارلايدى قازاقپارات ءتىلشىسى.

«2021 -جىلدىڭ 1 - مامىرىنان باستاپ سپورتتىق سەكسيالاردى جان باسىنا قارجىلاندىرۋ مەحانيزمى ەنگىزىلدى. سونىڭ ناتيجەسىندە 4 پەن 17 جاس ارالىعىنداعى 217 مىڭ بالا مەن جاسوسپىرىم تەگىن سپورت سەكسيالارىنا قاتىسىپ ءجۇر. الايدا بۇل مەحانيزم ءالى دە جەتىلدىرۋدى قاجەت ەتەدى. مۇنى ۋاقىتىندا شەشپەسەك، پرەزيدەنتتىڭ تىكەلەي تاپسىرماسىن ورىنداي الماۋىمىز مۇمكىن جانە الەۋمەتتىك نارازىلىق تا ارتۋى ىقتيمال»، - دەدى داۋرەن ابايەۆ.

ونىڭ مالىمەتى بويىنشا، ءبىرقاتار ايماق ءبىر جىلعا بولىنگەن اقشانى ءبىر توقساندا جۇمساپ تاستاعان. « artsport.kzپورتالىنىڭ جۇمىسىنا قاتىستى ماسەلەلەر دە جەتەرلىك. جەرگىلىكتى اتقارۋشى ورگاندارمەن قاتار، قىزمەت ۇسىنۋشىلار دا پورتالدى تەرىس پايدالاناتىن جاعدايلار كەزدەسەدى»، - دەگەن مينيستر تۋىنداپ وتىرعان ماسەلەنى شەشۋ ءۇشىن بىرنەشە شارانى قولعا الۋدى ۇسىندى.

«بىرىنشىدەن، قىزمەت ۇسىنۋشىلاردىڭ ءوتىنىمىن قاراستىرۋ مەرزىمىن 5 جۇمىس كۇنىنەن 10 جۇمىس كۇنىنە دەيىن ۇزارتۋدى ۇسىنامىز. قازىر اكىمدىك قىزمەتكەرلەرىنە كۇنىنە 100 وتىنىمگە دەيىن تۇسەدى. بۇل ءوتىنىمدى ساپالى تۇردە قاراستىرۋعا مۇمكىندىك بەرمەيدى. ەكىنشىدەن، عيماراتتىڭ سىيىمدىلىعى مەن جاتتىقتىرۋشى سانىنا قاراي وتىرىپ، ءبىر قىزمەت ۇسىنۋشىعا سپورت ءتۇرى، اينالىساتىن توپتار مەن بالا سانى بويىنشا شەكتەۋ ورناتۋدى ۇسىنامىز»، - دەدى مادەنيەت جانە سپورت ءمينيسترى.

«تاعى ءبىر ماڭىزدى ماسەلە - جەرگىلىكتى بيۋدجەتتىڭ جالپى سپورتقا جۇمسالاتىن شىعىنىنىڭ جىل سايىنعى ليميتىن بەلگىلەۋ. ونىڭ كەم دەگەندە 10 پايىزى جان باسىنا قارجىلاندىرۋعا باعىتتالۋىن ۇسىنامىز. شىعىن از بولسا، مەحانيزم ءارى كەتسە جارتى جىل جۇمىس ىستەيدى. جان باسىنا قارجىلاندىرۋ مەحانيزمى شىنايى پايدا اكەلمەسە، وعان ادامدار سەنىمسىزدىك تانىتا باستايدى»، - دەدى ول ۇكىمەت وتىرىسىندا.

سونداي- اق، ول سپورت سەكسيالارى مەن شىعارماشىلىق ۇيىرمەلەرىن جان باسىنا قارجىلاندىرۋدى حالىقتىڭ وڭ باعالاپ وتىرعانىن ايتتى.

«ءجۇز مىڭداعان بالا مەن جاسوسپىرىم ۋاقىتىن ساپالى وتكىزۋگە مۇمكىندىك الدى. الداعى ون جىلدىڭ كولەمىندە ءبىز مۇنىڭ زور ناتيجەسىن كورەمىز»، - دەدى مينيستر.

ونىڭ ايتۋىنا قاراعاندا، قازىر ەلىمىزدە 500 مىڭنان استام ادام «قازاق كۇرەسى»، «توعىزقۇمالاق»، «اسىق اتۋ» سياقتى ۇلتتىق سپورت تۇرلەرىمەن اينالىسىپ ءجۇر.

«2021 -جىلدان باستاپ دەنە شىنىقتىرۋ ساباقتارىنا ۇلتتىق سپورت تۇرلەرى مىندەتتى كومپونەنت بولىپ ەنگىزىلدى. قازىر وقۋشىلار اراسىندا «قازاق كۇرەسى»، «توعىزقۇمالاق» پەن «اسىق اتۋ» سياقتى سپورتتىق ويىندار كەڭىنەن تانىمال. 2021 -جىلى 57 مىڭ ادام ۇلتتىق سپورتپەن اينالىسا باستاعان. قازىر ەلىمىزدە ءتول سپورت تۇرلەرىمەن شۇعىلداناتىن ادامدار سانى 500 مىڭنان اسادى»، - دەدى داۋرەن ابايەۆ.

«ەلىمىزدە ورتا ەسەپپەن حالىقتىڭ %35- كە جۋىعى سپورتپەن شۇعىلدانادى. ماڭعىستاۋ، اتىراۋ جانە اقمولا وبلىستارىنىڭ كورسەتكىشتەرى جوعارى. ال، ەڭ تومەنگى كورسەتكىشتەر نۇر- سۇلتان، الماتى جانە شىمكەنت قالالارىندا تىركەلىپ وتىر. 2025 -جىلى ءبىز سپورتپەن اينالىساتىنداردىڭ ۇلەسىن % 50- كە دەيىن جەتكىزۋىمىز كەرەك. ول ءۇشىن سالاۋاتتى ءومىر سالتى مەن سپورتتىڭ پايداسى كەڭىنەن ناسيحاتتالۋى ءتيىس»، - دەدى ۇكىمەت باسشىسى ءاليحان سمايىلوۆ.

سونداي- اق، ول سپورت ينفراقۇرىلىمىن دامىتىپ، بۇقارالىق سپورتقا بولىنەتىن قاراجاتتى كوبەيتۋ كەرەكتىگىن باسا ايتتى.

«بۇل رەتتە مەملەكەت باسشىسىنىڭ تاپسىرماسى بويىنشا شامامەن 21 ميلليارد تەڭگەنى كاسىبي سپورت تۇرىنەن الىپ، بۇقارالىق سپورتقا قايتا باعىتتادىق. ونىڭ 6 ميلليارد تەڭگەسى مەملەكەتتىك سپورتتىق تاپسىرىستى قارجىلاندىرۋعا جۇمسالدى. وسىنىڭ ارقاسىندا مىڭداعان بالا سپورت سەكسيالارىنا تەگىن بارۋعا مۇمكىندىك الدى. وتكەن جىلى رەسپۋبليكا بويىنشا 162 مىڭ بالا قاتىستى، ال بيىل 275 مىڭى قامتىلادى. تەگىن شۇعىلداناتىن بالالاردىڭ ەڭ كوپ ۇلەسى الماتى قالاسى مەن الماتى وبلىسىندا تىركەلگەن. ازىرگە اقتوبە جانە سولتۇستىك قازاقستان وبلىستارى كوش سوڭىندا قالىپ وتىر»، - دەدى ءاليحان سمايىلوۆ.


سوڭعى جاڭالىقتار