پرەزيدەنت ەنەرگەتيكالىق نىسانداردا اپاتتاردىڭ جيىلەپ كەتكەنىن ايتتى

نۇر-سۇلتان. قازاقپارات - پرەزيدەنت قاسىم-جومارت توقايەۆ ەنەرگەتيكا ءمينيسترى بولات اقشولاقوۆتى قابىلدادى، دەپ حابارلايدى قازاقپارات ءتىلشىسى اقوردا سايتىنا سىلتەمە جاساپ. مەملەكەت باسشىسىنا ەلىمىزدىڭ وتىن-ەنەرگەتيكا كەشەنىن دامىتۋدىڭ نەگىزگى كورسەتكىشتەرى، سونداي-اق كاسپي قۇبىر كونسورتسيۋمىندا (ك ق ك) قالىپتاسقان جاعدايعا بايلانىستى قابىلدانعان شارالار جونىندە ەسەپ بەرىلدى.

ەنەرگەتيكا ءمينيسترى پرەزيدەنتكە گاز سالاسىن دامىتۋدىڭ كەشەندى جوسپارىنىڭ پىسىقتالۋ بارىسى تۋرالى باياندادى.

اتالعان جوسپار حالىقتىڭ الەۋمەتتىك جاعدايى تومەن توپتارى ءۇشىن باعانى ۇستاپ تۇرۋدى ەسكەرە وتىرىپ، سۇيىتىلعان گازعا باعا بەلگىلەۋ ءىسىن جەتىلدىرۋدى، رەسۋرستار بازاسىن ۇلعايتۋدى، وڭىرلەردى ودان ءارى گازبەن قامتاماسىز ەتۋدى، قازاقستاننىڭ گاز تاسىمالداۋ جۇيەسىن جاڭعىرتۋدى جانە كەڭەيتۋدى كوزدەيدى.

قاسىم-جومارت توقايەۆ ەنەرگەتيكا مينيسترىنە ەلىمىزدەگى جىلۋ ەنەرگەتيكالىق نىسانداردا اپاتتاردىڭ جيىلەپ كەتۋىنە، اتاپ ايتقاندا، پەتروپاۆلداعى ەكىنشى ج ە و- داعى جاعدايعا قاتىستى ماسەلەمەن اينالىسۋدى تاپسىردى.