قازاقستان حالقى دۇرىس تاماقتانبايتىن ەلدەردىڭ قاتارىنا ەنىپ وتىر

نۇر-سۇلتان. قازاقپارات - قازاقستاندىقتار تۇزدى تىم كوپ، جەمىس-جيدەكتى وتە از تۇتىنادى. ۇكىمەت وتىرىسىندا دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىن كەلتىرگەن ق ر دەنساۋلىق ساقتاۋ ءمينيسترى اجار عينيات وسىنداي مالىمدەمە جاسادى، دەپ حابارلايدى قازاقپارات ءتىلشىسى.

«دۇنيەجۇزىلىك دەنساۋلىق ساقتاۋ ۇيىمىنىڭ زەرتتەۋلەرى بويىنشا، ەر ادامدار ءۇشىن الكوگولدى تۇتىنۋ دەڭگەيى جىلىنا 25 ليتردى، ايەلدەر ءۇشىن - شامامەن 9 ليتردى قۇرايدى. وكىنىشكە وراي، وسى كورسەتكىش بويىنشا قازاقستان الكوگولدىك ىشىمدىكتەردى تۇتىنۋ دەڭگەيى جوعارى ەلدەرگە جاتادى. كوپ جاعدايدا جول-كولىك وقيعالارى، جاراقاتتار، زورلىق-زومبىلىقتان بولعان ءولىم، ۋلانۋ، سۋعا باتۋ سياقتى سىرتقى سەبەپتەردەن بولاتىن ءولىم-ءجىتىم كورسەتكىشتەرى الكوگولدىك ىشىمدىكتەردى تۇتىنۋدىڭ سالدارى بولىپ وتىر»، - دەدى اجار عينيات.

سونىمەن قاتار، ول قازاقستاندىقتار اراسىندا تۇزدى تاعامدى پايدالانۋ دەڭگەيى تىم جوعارى ەكەنىنە الاڭداۋشىلىق ءبىلدىردى.

«دۇنيەجۇزىلىك دەنساۋلىق ساقتاۋ ۇيىمى ۇسىنعان نورما بويىنشا حالىق تاعام قۇرامىندا تاۋلىگىنە 5 گرام تۇز تۇتىنۋى قاجەت. قازاقستاندا بۇل كورسەتكىش 18 گرام ەكەنىن اتاپ وتكىم كەلەدى. VI ۇلتتىق ءومىر سالتىن زەرتتەۋ دەرەكتەرى بويىنشا كوكونىستەر مەن جەمىستەردى تۇتىنۋ - تاۋلىگىنە 200-230 گرامدى قۇرايدى. ال دۇنيەجۇزىلىك دەنساۋلىق ساقتاۋ ۇيىمى ۇسىنعان نورما - تاۋلىگىنە 400-500 گرامدى قۇراۋ كەرەك. قازاقستان ورتالىق ازيا مەن ەۋروپانىڭ دۇرىس تاماقتانبايتىن 21 ەلىنىڭ اراسىندا 9-ورىندا تۇر»، - دەدى مينيستر.