جاينا سلامبەك قىزى «حابار» ارناسىنىڭ ديرەكتورى قىزمەتىنە تاعايىندالدى
بۇل تۋرالى «حابار» اگەنتتىگىنىڭ باسقارما ءتوراعاسى بەرىك ءۋالي فەيسبۋكتەگى پاراقشاسىندا ءمالىم ەتتى.
«بۇگىننەن باستاپ جاقسىلىقوۆا جاينا سلامبەك قىزى «حابار» ارناسىنىڭ ديرەكتورى لاۋازىمىنا تاعايىندالدى. جاينا جۋرناليستيكانىڭ ءوز جاۋىنگەرى. كورەرمەن قاۋىم ونى ساراپتامالىق باعدارلامالاردىڭ اۆتورى ءارى جۇرگىزۋشىسى رەتىندە جاقسى تانيدى. ارىپتەسىمدى جاڭا قىزمەتىمەن شىن جۇرەكتەن قۇتتىقتاپ، ساتتىلىك تىلەيمىن! «حاباردىڭ» دامۋىنا قوسار ۇلەسىڭىز زور بولادى دەپ سەنەمىن!» دەلىنگەن حابارلامادا.
جاينا سلامبەك قىزى 1974 -جىلى 12-قاراشادا قىزىلوردا وبلىسى، قارماقشى اۋدانى، قۋاڭداريا اۋىلىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن اياقتاعان. ەڭبەك جولىن ۋنيۆەرسيتەت بىتىرگەن 1996 -جىلى جازدا «حابار» اگەنتتىگىندە ءتىلشى بولىپ باستاعان.
2014 -جىلدىڭ اقپانىنا دەيىن كوممەنتاتور، اتقارۋشى پروديۋسەر، تەلەجۇرگىزۋشى، اقپاراتتىق- ساراپتامالىق باعدارلامالار ديرەكسياسىنىڭ ديرەكتورى بولىپ جۇمىس ىستەدى. 2014 -جىلدىڭ اقپانىنان 2019 -جىلدىڭ شىلدەسىنە دەيىن «استانا» تەلەارناسىندا «ءبىزدىڭ ۋاقىت» اقپاراتتىق- ساراپتامالىق باعدارلاماسىنىڭ اۆتورى ءارى جۇرگىزۋشىسى بولدى.
2019 -جىلدىڭ تامىزىنان «Qazaqstan» ۇلتتىق تەلەارناسىندا «Apta» باعدارلاماسىنىڭ جەتەكشىسى جانە جۇرگىزۋشىسى بولدى. جاينا سلامبەك قىزى - قازاقستان جۋرناليستەر وداعى سىيلىعىنىڭ لاۋرەاتى (1999 ج). وتاندىق تەلەجۋرناليستيكانىڭ دامۋىنا قوسقان ۇلەسى ءۇشىن ق ر پرەزيدەنتى سىيلىعىمەن ماراپاتتالدى (2019 ج)، سونىمەن بىرگە «تۇمار» ۇلتتىق تەلەۆيزيا سىيلىعىنىڭ يەگەرى (2020 ج).
