مەملەكەت ءوزىنىڭ الەۋمەتتىك مىندەتتەمەلەرىن تولىق جانە ۋاقتىلى ورىندايدى - ءاليحان سمايىلوۆ
«بۇگىن الەمدىك ساياسي- ەكونوميكالىق جاعدايدى ەسكەرە وتىرىپ، وسى جىلعا ارنالعان ماكروەكونوميكالىق كورسەتكىشتەردىڭ ناقتىلانعان بولجامىن قارادىق. مەملەكەت ءوزىنىڭ الەۋمەتتىك مىندەتتەمەلەرىن تولىق كولەمدە جانە ۋاقىتىلى ورىندايدى. سونداي- اق قازىرگى جاعدايدا ەكونوميكانىڭ ساپالى جانە ورنىقتى دامۋىن قامتاماسىز ەتەدى. رەسپۋبليكالىق بيۋدجەت جوباسى ءبىرىنشى كەزەكتە وسىعان باعىتتالىپ وتىر. بيۋدجەت تەڭگەرىمدىلىگىن قامتاماسىز ەتۋ ءۇشىن ۇلتتىق قوردان تۇسەتىن كەپىلدەندىرىلگەن ترانسفەرت مولشەرىنە تۇزەتۋ ەنگىزىلەتىن بولادى»، - دەدى پرەمەر-مينيستر ءاليحان سمايىلوۆ.
ونىڭ اتاپ وتۋىنشە، قوسىمشا شىعىستار مەملەكەت باسشىسى قاسىم-جومارت توقايەۆتىڭ قاڭتار ايىنداعى، سونداي-اق ۇكىمەتتىڭ كەڭەيتىلگەن وتىرىسىندا جانە قازاقستان حالقىنا جولداۋىندا بەرگەن تاپسىرمالارىن ىسكە اسىرۋعا جۇمسالادى. سونىمەن بىرگە وسىعان دەيىن قابىلدانعان شۇعىل مىندەتتەمەلەردى ورىنداۋعا باعىتتالادى.
«قاراجاتتى قاڭتار وقيعاسىنان كەيىن مەملەكەتتىك مۇلىك پەن قالالاردىڭ ينفراقۇرىلىمىن قالپىنا كەلتىرۋگە، قارجى- ەكونوميكالىق تۇراقتىلىقتى قامتاماسىز ەتۋگە جانە حالىقتى، بيزنەس پەن ەكونوميكانىڭ ناقتى سەكتورىن قولداۋعا جۇمساۋ جوسپارلانۋدا» دەدى - ءاليحان سمايىلوۆ.
وسىدان كەيىن ۇكىمەت مۇشەلەرى ناقتىلانعان الەۋمەتتىك- ەكونوميكالىق دامۋ بولجامى مەن بيىلعى جىلعى رەسپۋبليكالىق بيۋدجەتتى ناقتىلاۋ بويىنشا تاسىلدەردى ماقۇلدادى. بيىلعى جىلعى رەسپۋبليكالىق بيۋدجەتتى ناقتىلاۋ تۋرالى جانە ۇلتتىق قوردان كەپىلدەندىرىلگەن ترانسفەرتتى ناقتىلاۋ تۋرالى زاڭ جوبالارىنا قولداپ داۋىس بەردى.
«ۇلتتىق ەكونوميكا جانە قارجى مينيسترلىكتەرى پرەمەر- مينيستر كەڭسەسىمەن بىرلەسىپ، زاڭ جوباسى مەن الەۋمەتتىك- ەكونوميكالىق دامۋ بولجامىن پارلامەنتكە ەنگىزۋدى قامتاماسىز ەتسىن» ، - دەدى ءاليحان سمايىلوۆ.
