قايرات ساتىبالدىنىڭ باقىلاۋىنداعى ەكى كومپانيانىڭ باسشىلارى قاماۋعا الىندى

نۇر- سۇلتان. قازاقپارات - سىبايلاس جەمقورلىققا قارسى قىزمەت ق. ساتىبالدى، گ. ساتىبالدى جانە باسقا دا تۇلعالارعا قاتىستى تەرگەۋدى جالعاستىرۋدا، دەپ حابارلايدى اتالعان ۆەدومستۆونىڭ باسپا ءسوز قىزمەتى.

«تەرگەۋ بارىسىندا ق. ساتىبالدى ۇلىنىڭ باقىلاۋىنداعى كاسىپورىنداردىڭ - كىرمە تەمىرجول جەلىلەرى (سوڭعى شاقىرىم) يەلەرىنىڭ ۇرلىعىنىڭ قوسىمشا فاكتىلەرى انىقتالدى. اتالعان تۇلعالار مەملەكەتتىك ورگانداردىڭ لاۋازىمدى تۇلعالارىنىڭ كومەگىمەن ەلدىڭ قالا قۇراۋشى كاسىپورىندارىنا كىرمە جولداردىڭ قىزمەتتەرىنە تاريفتى نەگىزسىز كوتەرۋ ارقىلى كوپ ميللياردتىق پايدا تاپقان. بۇل ءوز كەزەگىندە ازاماتتار ءۇشىن تىرشىلىكتى قامتاماسىز ەتۋ قىزمەتتەرىنىڭ باعالارىنىڭ ارتۋىنا باعىتتالعان» دەلىنگەن حابارلامادا.

مالىمەتكە ساي، ق. ساتىبالدى ۇلى باقىلاۋىنداعى ەكى كومپانيانىڭ باسشىلارى ۇستالىپ، سوت سانكسياسىمەن قاماۋعا الىندى. كىنالىلىك تۋرالى قورىتىندى شەشىمدى سوت انىقتايدى. وزگە اقپارات تەرگەۋ مۇددەسىندە جاريا ەتۋگە جاتپايدى.