ەلىمىزدە اتىس قارۋىن زاڭسىز ۇستاۋ ماسەلەسى قالاي شەشىلىپ جاتىر

نۇر-سۇلتان. قازاقپارات - قازاقستاندا زاڭسىز يەمدەنگەن قارۋ- جاراقتى تاركىلەۋ شاراسى ءجۇرىپ جاتىر، دەپ حابارلايدى قازاقپارات ءتىلشىسى.

«بيىل اقپان ايىنان بەرى ەل اۋماعىندا «قارۋ» جەدەل الدىن الۋ ءىس-شاراسى ءوتىپ جاتىر. شارا قارۋدى قولدانۋ ارقىلى جاسالاتىن قىلمىستاردىڭ الدىن الۋعا باعىتتالعان. بۇگىندە پوليتسيا ورگاندارىندا 235 مىڭعا جۋىق ازاماتتىق قارۋ يەسى جانە 2 مىڭنان استام قىزمەتتىك قارۋ سۋبەكتىسى ەسەپتە تۇر. قابىلدانعان شارالاردىڭ ناتيجەسىندە 2-ايدا زاڭسىز اينالىمنان 1000 بىرلىكتەن استام اتىس قارۋى الىندى. سونداي-اق، 7 مىڭنان استام قارۋ وعى تاركىلەندى»، - دەدى ق ر ءى ءى م وكىلى شۇعىلا تۇرلىبەك بريفينگ بارىسىندا.

ونىڭ ايتۋىنشا، جەدەل الدىن الۋ شاراسى اياسىندا ەلىمىزدە 1900-گە جۋىق زاڭدى تۇلعا جانە 92 قارۋ- جاراق دۇكەنى تەكسەرىلدى.

«ودان بولەك، شارا بارىسىندا 73 مىڭنان استام فەرمەرلىك، شارۋا قوجالىقتارى تەكسەرىلىپ، 205 مىڭنان استام ازاماتتىق قارۋ يەلەرى تۇرعىلىقتى جەرى بويىنشا قارالدى. تەكسەرۋ ناتيجەسىندە 4,8 مىڭ زاڭبۇزۋشىلىق انىقتالدى. ونىڭ ىشىندە قارۋدى ساقتاۋ جانە الىپ ءجۇرۋ 3200، ال ونى تىركەۋ جانە قايتا تىركەۋ ءتارتىبى بويىنشا 1,5 مىڭ ەرەجە ساقتالماعان»، - دەيدى ول.

سونداي- اق، ءى ءى م وكىلى قارۋ مەن وق-دارىلەردى زاڭسىز ساقتاعانى ءۇشىن قىلمىستىق جانە اكىمشىلىك جاۋاپكەرشىلىكتىڭ بارىن ەسكە سالدى.

«قارۋ- جاراقتى زاڭسىز ساقتاعانى جانە الىپ جۇرگەنى ءۇشىن قىلمىستىق جاۋاپكەرشىلىكتى كوزدەيتىن 325 ماتەريال تىركەلدى. سول سياقتى 519 ازامات اكىمشىلىك جاۋاپكەرشىلىككە تارتىلدى. ەستەرىڭىزگە سالا كەتەيىن، زاڭسىز ساقتالعان قارۋدى، وق- دارىلەردى جانە جارىلعىش زاتتاردى ءوز ەركىمەن تاپسىرعان ادامنىڭ وزگە قىلمىسى بولماسا، جاۋاپكەرشىلىكتەن بوساتىلادى»، - دەيدى وكىل. وسى ورايدا ءى ءى م قازاقستاندىقتاردان زاڭسىز ساقتالعان قارۋ-جاراق، وق-ءدارى، جارىلعىش زاتتار جانە ارنايى قۇرالداردى ءوز ەركىمەن تاپسىرۋعا شاقىرادى.