قوسشى ساۋناسىندا ايەلدى ۇرعان ەلوردالىقتىڭ ۇستىنەن قىلمىستىق ءىس قوزعالدى - ۆيدەو
ەر ادامنىڭ ۇستىنەن قىلمىستىق ءىس قوزعالدى، دەپ حابارلايدى قازاقپارات ءتىلشىسى.
وبلىستىق پوليتسيا دەپارتامەنتىنىڭ مالىمەتىنشە، وقيعا 2-ءساۋىر كۇنى قوسشى قالاسىنداعى ساۋنالاردىڭ بىرىندە بولعان. وسىعان بايلانىستى قىلمىستىق كودەكستىڭ 293-بابى 1-بولىگى «بۇزاقىلىق» بويىنشا سوتقا دەيىنگى تەرگەۋ امالدارى جۇرگىزىلۋدە.
«الەۋمەتتىك جەلىدە تاراعان بەينەجازباداعى ازاماتتار ساۋنادا بولىپ، ىشىمدىك ىشكەن. ساعات 07:30 شاماسىندا مەكەمەنىڭ باسقارۋشى ديرەكتورى، قوسشى قالاسىنىڭ تۇرعىنى كەلۋشىلەردەن ەسەپشوتتىڭ تولەنبەۋ سەبەبىن انىقتاماقشى بولعان. سول كەزدە كليەنتتەردىڭ ءبىرى ايەلگە قول كوتەرىپ، باس جانە دەنە تۇسىنان سوققى جاساعان»، - دەلىنگەن ۆەدومستۆو حابارلاماسىندا. وقيعاعا قاتىستى 3 ادام انىقتالعان.
«قوسشى قالاسىنىڭ 44 جاستاعى تۇرعىنى مەن 36 جاستاعى ەلوردالىقتىڭ ورتاشا دارەجەدەگى ماس ەكەنى انىقتالدى. ولار ايىقتىرعىشىنا قامالدى. ال ساۋنا ديرەكتورىنا دەنە جاراقاتىن سالعان كۇدىكتى - 37 جاستاعى ەر ادام ۋاقتىشا ۇستاۋ ورتالىعىنا قامالدى. سوتقا دەيىنگى تەرگەۋ شارالارى جالعاسۋدا»، - دەپ تولىقتىردى پوليتسيا.
