قاسيەتتى رامازان ايى باستالدى: قازاقستاننىڭ بۇكىل ءوڭىرى بويىنشا ورازا كەستەسى
ورازا تۇتۋ - يگى مۇسىلمان قاۋىمىنىڭ بەس پارىزىنىڭ ءبىرى. جالپى «ورازا» ءسوزىنىڭ ماعىناسى - ءبىر نارسەدەن الىستاۋ، بەلگىلى ءبىر ۋاقىت ارالىعىندا ءىشىپ-جەۋدەن، ءناپسى قالاۋلارىنان تىيىلۋ دەگەندى بىلدىرەدى.
سارەسىن ءىشۋ تاڭ نامازىنىڭ ۋاقىتى كىرۋىنە 10 مينۋت قالعاندا توقتاتىلادى. بيىل رامازان ايىنىڭ ءبىرىنشى كۇنى 2 -ساۋىرگە تۋرا كەلەدى. 30 كۇن اۋىز بەكىتىلەدى. قاسيەتتى قادىر ءتۇنى - 27 -ساۋىردەن 28 -ساۋىرگە قاراعان ءتۇن. ال 1 -مامىر - ورازا ايتتىڭ ءبىرىنشى كۇنى.
ورازاعا نيەت: «اللا تاعالانىڭ رازىلىعى ءۇشىن تاڭنان كۇن باتقانعا دەيىن رامازان ايىنىڭ ورازاسىن ۇستاۋعا نيەت ەتتىم». اۋىزاشار دۇعاسى: «ۋا، جاراتقان يەم! سەنىڭ رازىلىعىڭ ءۇشىن ورازا ۇستادىم، ساعان يمان كەلتىردىم، ساعان تاۋەكەل ەتتىم، سەن بەرگەن ريزىقپەن اۋىز اشتىم. ۋا، كەشىرىمدى اللا! مەنىڭ الدىڭعى جانە سوڭعى كۇنا- كەمشىلىكتەرىمدى كەشىرە گور!»
ءپىتىر ساداقانى رامازان ايىنىڭ باسىنان ايت نامازىنا دەيىن بەرۋگە بولادى. ەلىمىز بويىنشا ءپىتىر ساداقاسىنىڭ مولشەرى ءار ادامعا 500 تەڭگە بولىپ بەكىتىلگەن.
بۇل - ءپىتىر ساداقانىڭ ەڭ تومەنگى مولشەرى. بۇل مولشەردەن اسىرىپ، كوبىرەك بەرۋگە دە رۇقسات. ءپىتىر- ساداقادان تۇسكەن قاراجات ەسەبىنەن مۇگەدەكتەر مەن قارتتارعا، جەسىر ايەلدەر مەن جەتىمدەرگە، الەۋمەتتىك تۇرمىسى تومەن وتباسىلارعا قايىرىمدىلىق كومەك كورسەتىلەدى. ساداقانى ءبىرقاتار بانكتىڭ موبيلدى قوسىمشالارى جانە قازپوشتا ارقىلى اۋدارۋعا بولادى.
جۇكتى، ومىراۋدا بالاسى بار نەمەسە حايىز، نيفاس كەزىندەگى ايەلدەرگە، جولاۋشىلارعا، ناۋقاس جاندارعا ورازا ۇستاۋ - پارىز ەمەس. ساپاردا جۇرگەندەرگە ورازا ۇستاماۋعا بولادى.
ءبىراق باسقا كۇندەردە سانىن تولتىرىپ، اۋىز بەكىتەدى. ەگەر ساپار قيىندىق تۋعىزباسا، ابزالى - اۋىز بەكىتۋ.
اۆتور: مارلان جيەمباي
