ءاليحان سمايىلوۆ ورىنباسارلارى اراسىندا مىندەتتەردى ءبولۋ تۋرالى وكىمگە قول قويدى

نۇر-سۇلتان. قازاقپارات - ءاليحان سمايىلوۆ پرەمەر-ءمينيستردىڭ ورىنباسارلارى اراسىندا مىندەتتەردى ءبولۋ تۋرالى وكىمگە قول قويدى، دەپ حابارلايدى قازاقپارات ۇكىمەتتىڭ باسپا ءسوز قىزمەتىنە سىلتەمە جاساپ.

قۇجاتقا سايكەس، پرەمەر-ءمينيستردىڭ ءبىرىنشى ورىنباسارى رومان سكلياردىڭ مىندەتتەرىنە كولىك ينفراقۇرىلىمىن جانە لوگيستيكانى، قۇرىلىستى دامىتۋ جانە ت ك ش جاڭعىرتۋ ماسەلەلەرى ەنگىزىلدى.

سونداي-اق ر. سكليار ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ، جاڭارتىلاتىن ەنەرگيا كوزدەرىن، كومىر، اتوم ونەركاسىبىن جانە يادرولىق ەنەرگەتيكانى دامىتۋ، ونەركاسىپ، يننوۆاتسيالار، تەحنيكالىق رەتتەۋ، ەلەكتر ەنەرگەتيكاسى، گەولوگيا جانە جەر قويناۋىن پايدالانۋ، مۇناي حيمياسى، ەكسپورتتىق باقىلاۋ، قورشاعان ورتانى قورعاۋ، اگروونەركاسىپتىك كەشەن، جىلۋ بەرۋ ماۋسىمدارىنا دايىندىق جانە ولاردى وتكىزۋ، توتەنشە جاعداي جانە جۇمىلدىرۋ جۇمىسى، عارىش قىزمەتى، بايلانىس جانە باسقا ماسەلەلەرگە جەتەكشىلىك ەتەدى. پرەمەر-ءمينيستردىڭ ورىنباسارى ەرالى توعجانوۆ ءبىلىم مەن عىلىمدى دامىتۋ، دەنساۋلىق ساقتاۋ، الەۋمەتتىك جاڭعىرتۋ، جۇمىسپەن قامتۋ، مادەنيەت پەن سپورتتى، ءتۋريزمدى دامىتۋ، مەملەكەتتىك جاستار جانە وتباسى ساياساتى، قوعامدىق سانانى جاڭعىرتۋ، كونفەسسياارالىق جانە ەتنوسارالىق كەلىسىمدى قامتاماسىز ەتۋ، مەملەكەتتىك ءتىلدى دامىتۋ، دەموگرافيالىق جانە كوشى- قون ساياساتى ماسەلەلەرىنە جاۋاپتى.

سونداي-اق ۇيلەستىرىلەتىن ماسەلەلەر قاتارىندا مەملەكەت پەن ازاماتتىق قوعامنىڭ ءوزارا ءىس-قيمىلى ماسەلەلەرى بار. پرەمەر-ءمينيستردىڭ ورىنباسارى مۇحتار تىلەۋبەردى سىرتقى ساياسي باعداردى ىسكە اسىرۋ، سىرتقى ەكونوميكالىق ساياساتتى جۇزەگە اسىرۋ جانە حالىقارالىق شارتتاردىڭ جاسالۋىن ۇيلەستىرۋ، ونىڭ ىشىندە ق ر مەملەكەتتىك شەكاراسىن مەجەلەۋ، شەگەندەۋ، سىرتقى ينۆەستيتسيالاردى تارتۋ، قازاقستان رەسپۋبليكاسىنىڭ شەت مەملەكەتتەرمەن جانە حالىقارالىق ۇيىمدارمەن ساۋدا-ەكونوميكالىق، قارجىلىق، عىلىمي جانە عىلىمي-تەحنيكالىق، مادەني، سونداي-اق باسقا دا بايلانىستارىن كەڭەيتۋ ماسەلەلەرىمەن اينالىسادى.

سونىمەن قاتار كوشى-قون سالاسىنداعى حالىقارالىق ىنتىماقتاستىق، شەت ەلدەرمەن ۇكىمەتارالىق كوميسسيالاردىڭ قىزمەتىن ۇيلەستىرۋ دە كىرەدى.

پرەمەر-ءمينيستردىڭ ورىنباسارى باقىت سۇلتانوۆ ساۋدا ساياساتى، تاريف ساياساتى، ەۋرازيالىق ەكونوميكالىق وداق اياسىنداعى ىنتىماقتاستىق، دۇنيەجۇزىلىك ساۋدا ۇيىمى شەڭبەرىندەگى ىنتىماقتاستىق ماسەلەلەرىنە جەتەكشىلىك ەتەدى.

پرەمەر-ءمينيستردىڭ ورىنباسارى ەرۇلان جاماۋبايەۆ قارجى سەكتورى، ماكروەكونوميكالىق ساياسات، بيۋجەت، سالىق جانە كەدەن ساياساتى، مەملەكەتتىك جوسپارلاۋ جۇيەسى، شاعىن جانە ورتا كاسىپكەرلىكتى دامىتۋ، كونتسەسسيا ماسەلەلەرىن قوسا العاندا، مەملەكەتتىك-جەكەشەلىك ارىپتەستىكتى دامىتۋ ماسەلەلەرىن ۇيلەستىرەدى.

سونداي-اق ينۆەستيتسيالىق ساياسات، ستاتيستيكا، جوبالىق باسقارۋدى دامىتۋ، كاسىپكەرلەر ءۇشىن اكىمشىلىك كەدەرگىلەردى ازايتۋ («Doing Business» ماسەلەلەرى)، حالىقارالىق قارجى ينستيتۋتتارىن ۇيلەستىرۋ ماسەلەلەرى بەكىتىلدى.

بۇعان قوسا ەكونوميكانى مونوپولياسىزداندىرۋ، كۆازيمەملەكەتتىك سەكتور سۋبەكتىلەرىنىڭ قىزمەتىن رەفورمالاۋ، بيزنەستىڭ پروبلەمالىق ماسەلەلەرىن قاراۋ جانە شەشۋ قىزمەتتەرىن رەتتەيدى.