ادام جەگىش جۇماعاليەۆ تۋرالى فيلم جارىق كوردى

الماتى. قازاقپارات - ادام جەگىش نيكولاي جۇماعاليەۆ تۋرالى «ءۇش» اتتى فيلم كورەرمەنگە جول تارتتى، دەپ حابارلايدى قازاقپارات ءتىلشىسى.

فيلمنىڭ رەجيسسەرى رۋسلان پاك. ول وڭتۇستىك كورەيادا تۇرادى. «ءۇش» ونىڭ قازاقستاندا تۇسىرگىسى كەلگەن ەكىنشى تولىقمەتراجدى فيلمى.

«مەن بالا كۇنىمدە فيلمدەگى باستى كەيىپكەر مانياك جۇماعاليەۆ تۋرالى ءجيى ەستىدىم. جاقىندا مەن وسى قىلمىسكەردى ۇستاۋ وپەراتسياسىن باسقارعان ادامدى كەزدەستىردىم. مەن ودان كوپتەگەن جاعا ۇستارلىق مالىمەتتەردى ەستىپ، ءبىلدىم. بۇل كينەماتوگرافيالىق وقيعا ەكەنىن ءتۇسىندىم»، - دەدى رۋسلان پاك.

تۋىندىدا تۇتاس كەڭەس ۇكىمەتىن ۇرەي قۇشاعىندا ۇستاعان قانىشەردىڭ جاعا ۇستاتار قىلمىستارى كورسەتىلەدى. ءتىپتى اۆتورلار جۇرتتى ءدۇر سىلكىندىرگەن ءىستىڭ ەل بىلە بەرمەيتىن دەرەكتەرىن دە تۋىندىعا قوسقان. فيلمنىڭ سسەناريى 80-جىلدارى بولعان جانتۇرشىكتىرەر وقيعالارعا نەگىزدەلگەن.

تۋىندىدا ميليتسيانىڭ ارنايى بولىمشەسىنە تاجىربيەدەن وتۋگە كەلگەن سادىقوۆتىڭ ءومىرى باياندالادى. جۇمىسقا كىرىسكەن العاشقى كۇننەن- اق جاس تەرگەۋشى قاندى قىلمىستاردى اشۋمەن اينالىساتىن توپقا ىلەسىپ، بۇرىن- سوڭدى كورمەگەن سۇمدىقتاردىڭ كۋا بولادى.

«فيلمدە ورىمدەي قىزداردىڭ جانىن الىپ، قانىن ءىشىپ، ەتىن جەگەن اتىشۋلى نيكولاي جۇماعاليەۆتىڭ قىلمىستارى كورسەتىلەدى. ءتارتىپ ساقشىلارى ءۇيىن ءتىنتۋ كەزىندە بولشەكتەلگەن ادامداردىڭ ءمايىتىن تابادى. الايدا قانىپەزەردىڭ ءوزى قاشىپ قۇتىلىپ كەتەدى. مانياكتىڭ كەلەسى قۇربانى - سادىقوۆتىڭ ۇلكەن اپكەسى بولادى. سادىقوۆ ءۇشىن مانياكتى ۇستاۋ قىزمەتتىك پارىزى عانا ەمەس، جەكە كەك الۋعا اينالادى»، - دەيدى رەجيسسەر.

فيلمدە باستى رولدەردى اسقار ءىلياسوۆ، سامال ەسلياموۆا، ەرجان ءتۇسىپوۆ، نۇرجان سادىبەكوۆ جانە رەسەيلىك اكتەر يگور ساۆوچكين سومدايدى.

«مەن اكتەرلەردىڭ بەينەسىنە قاراپ، ىرىكتەۋدەن وتكىزدىم. ولارمەن كورىسىپ، سويلەسىپ، كىمنىڭ قانداي وبرازعا ساي كەلەتىنىنە بايلانىستى تاڭدادىم. ءبىز فيلمدى ءبىر ايدىڭ ىشىندە 24 ءتۇسىرىلىم كۇنىندە بىتىردىك. مۇنداي ۇلكەن كولەمدەگى تۋىندىعا بۇل وتە از ۋاقىت. سەبەبى، ءتۇسىرىلىم توبى ۇيلەسىمدى جۇمىس ىستەپ، بارلىعى جەڭىل ءتۇسىرىلدى»، - دەيدى فيلمنىڭ رەجيسسەرى رۋسلان پاك.

فيلم وسىدان ءۇش جىل بۇرىن الماتىدا ءتۇسىرىلىپ، ءبىر جىلدان كەيىن پۋسانداعى حالىقارالىق كينوفەستيۆالدە ارنايى سىيلىقپەن ماراپاتتالدى. قازاقستانداعى پرەمەرادان كەيىن «ءۇش» فيلمى كورەيادا كەڭ پروكاتقا شىعادى.

اۆتور: الما مۇقانوۆا