حالىققا ءتىرى ءسوز، جاندى ءسوز كەرەك - پروفەسسور نەگيموۆ
ال حالىقتىڭ رۋحانياتىن كوتەرۋ ءۇشىن بىلگەنىڭدى جەتكىزە ءبىلۋ كەرەك، دەپ حابارلايدى قازاقپارات ءتىلشىسى.
«قازىرگى زامانعا كەرەگى - اڭگىمەشىلدىك. ول - جاي اڭگىمەشىلدىك ەمەس، كادىمگىدەي مانىمەن، مازمۇنىمەن، تەرەڭدىگىمەن ايتىلاتىن اڭگىمە. ءبىزدىڭ زيالىلارىمىزدا وسى جاعى كەمشىن. ول - بارشامىزدىڭ كەمىستىگىمىز. ۇرپاقتى قالاي تاربيەلەۋ كەرەك؟ بۇگىنگى جاستارعا «انا كىتاپتى وقى، مىنا كىتاپتى وقى» دەپ ايتقان دۇرىس. ءبىراق سەن دە سونى ەلىكتىرە ءبىلۋىڭ كەرەكسىڭ. مىسالى، اباي قۇنانبايەۆ، سپانديار كوبەيەۆ، بەكەت وتەتىلەۋوۆ، قۇدايبەرگەن جۇبانوۆ، احمەت بايتۇرسىنوۆ، مۇحتار اۋەزوۆ، قاجىم جۇماليەۆ - وسىلاردىڭ ءبارى بىلگەندەرىن تاماشا ەتىپ جەتكىزە بىلگەن عوي. مىنە، مەكتەپ پەن ءداستۇردىڭ بولۋى وسىعان بايلانىستى. سوندىقتان ۇلكەن ءبىر جاۋاپكەرشىلىك كەرەك. كەزىندە كوردىك قوي، ءسابيت مۇقانوۆتار، عابيت مۇسىرەپوۆتەر، كەشەگى سالىق زيمانوۆتار بۇكىل ءبىر اۋديتوريانى ۇيىتىپ، ءتىل تابىسىپ كەتەتىن. مارقۇم ءابىش كەكىلبايەۆتار قانداي بولدى. بىزگە قازىر ءتىرى ءسوز كەرەك، ادامنىڭ جۇرەگىنە جەتەتىن جاندى ءسوز كەرەك»، - دەدى سەرىك نەگيموۆ قازاقپارات تىلشىسىنە بەرگەن سۇحباتىندا.
عالىمنىڭ ايتۋىنشا، ۇلى دالانىڭ بۇرىنعى جىراۋلارى، اقىندارى، كۇيشىلەرى، تەرمەشىلەرى، سال- سەرىلەرى اڭگىمەشىلدىك ونەردىڭ دارابوزدارى بولعان. سولاردىڭ ارقاسىندا حالىقتىڭ رۋحانياتى كوتەرىلدى. «ءبىز وقىدىق پا، تىڭدادىق پا، سونى قولدانا ءبىلۋىمىز كەرەك. ماسەلەن، ابايدى بىلەسىڭ، شاكارىمدى بىلەسىڭ، ماعجاندى بىلەسىڭ، سۇلتانماحمۇتتى بىلەسىڭ، ءبىراق ونى ءوز ىسىڭدە قولدانۋىڭ كەرەك قوي. مىنە، سوندا قوعام رۋحاني جاعىنان جەتىلەدى»، - دەپ اتاپ كورسەتتى عالىم.
اۆتور: ارمان اسقاروۆ
