قىز جولى

None
None
نۇر-سۇلتان.قازاقپارات - «قىزدىڭ قىرىق جانى بار» دەگەن قازاقتىڭ عيبراتتى ءسوزىنىڭ كەنەپتەگى كورىنىسى وسى بولار.

«قىز - قوناق» دەپ قادىرلەگەن بابامىز، ونى الداعى عۇمىرىندا سان تاراۋلى جولدار كۇتىپ تۇرعانىن الدىن الا اڭداعان- اۋ! قىزدارىنا مەيىرىمىن اياماعان دانا حالقىمىز بارىنشا ەرتەڭگى ءومىرىنىڭ باياندى بولۋىن تىلەگەن. ءبىز ۇسىنعان كارتيناداعى شۇباتىلىپ جاتقان جولدار ءاربىر سۇلۋدىڭ اتتاپ وتەر بەلەسىندەي ءيىر دە ءيىر.

فيلوسوفيالىق مانگە يە «قىز جولى» كارتيناسى جاس سۋرەتشى اسەمقۇل بەيبىتتىڭ شىعارماسى. ول ادەتتەگىدەي ءومىردىڭ شىنايى بەينەسىن، پوستمودەرنيستىك كەزەڭ مەن قوعامداعى ءتۇرلى پروبلەمالاردى وي- ەلەگىنەن وتكىزىپ، ءوز تۋىندىسىنا ارقاۋ ەتكەن. يدەيا، مازمۇن، فورما جانە ءتۇس ءوزارا جۇپتاسىپ، تۋىندىنىڭ تاريحي كەلبەتىن كوركەمدەي تۇسەدى.

گرافيكامەن اۋەستەنگەن جاس ونەرپاز ءوزىن جاڭا قىرىنان اشىپ، عاجايىپ كەسكىندەمەلەردى ومىرگە اكەلدى. شەشەسىنىڭ ومىرىمەن بايلانىستى كورىنىستەر ارقاۋ بولعان جۇمىستارىندا، اۆتور جانىنا جاقىن انا جانە وتباسى تاقىرىبىن قامتيدى. ولار اق قاعاز بەتىندە كومىر مەن سوۋستى قولدانۋ ارقىلى جازىلعان. وسى قاراپايىم تاسىلمەن ورىندالعانىنا قاراماستان، بۇل گرافيكالىق پاراقتاردا سۋرەتشىنىڭ ەموتسيونالدىق كۇيزەلىستەرى مەن ىشكى جان- تەبىرەنىسىنىڭ سەزىمدەرى ايقىندالعان. سول تۋىندىلارىنىڭ ءبىرى وسى - «قىز جولى» شىعارماسى. اۆتوردىڭ 2016 -جىلى جازىلعان كارتيناسى ونەرتانۋشىلاردىڭ ىستىق ىقىلاسىنا يە بولدى.

شىنىندا، بۇل جۇمىستىڭ ماعىناسى تەرەڭ، مازمۇنى اۋقىمدى، حالىقتىق رۋحقا تولى. ءتورت بۇرىشتى پاراقتا ءتۇرلى تارماقتارعا تارالعان، الۋان اسۋلاردان تۇراتىن شەكسىز جول. كومپوزيتسيانىڭ استىڭعى، ناق ورتاڭعى بولىگىندە وسى ومىردە ءوز جولىن، دۇرىس جول تاڭداۋ ۇستىندەگى قىز بەينەسى. ەكىنشى جاعىنان «ءومىر داراعى» بەينەسىن ەسكە ءتۇسىرىپ، اعاش بۇتاقتارى ءومىردىڭ سوقپاقتارى سىندى ايقىندالا تۇسەدى. اۆتور كەڭىستىكتى تەكەمەت سەكىلدى شەشەدى، قازاقتىڭ تەكەمەتتەرىندەگى ءىرى ءمودۋلدى اق جانە قارا فورمالارى ءوزارا بايلانىسادى. بۇل ءبىزدى ەركىمىزدەن تىس ۇلتتىق ونەرىمىزگە جەتەلەيدى.

اسەمقۇل بەيبىتتىڭ گرافيكالىق پاراقتارىنان اۆتوردىڭ جان- تولعانىس سەزىمدەرى مەن ەموتسيالىق كۇيزەلىستەرىن كورۋگە بولادى. سونداي- اق ول ءوزىنىڭ جەكە الەمىن جاساۋ ارقىلى، جالپى ءومىردىڭ فيلوسوفياسىن ۇعىنۋعا تىرىسادى.

مۇحتار كۇمىسبەك

egemen.kz

سوڭعى جاڭالىقتار