ۆ. زەلەنسكي رەسەي ب ا ق وكىلدەرىنە سۇحبات بەردى
وندا ۋكراينا پرەزيدەنتى 1 جارىم ساعات بويى ونلاين تۇردە «مەدۋزا» اقپارات اگەنتتىگى، «دوجد» تەلارناسىنىڭ باس رەداكتورلارى يۆان كولپاكوۆ جانە تيحون دزيادكومەن، سونىمەن قاتار ءتىلشى ءارى جازۋشى ميحايل زىگار مەن «كوممەرسانت» گازەتىنىڭ ارنايى جۋرناليسى ۆلاديمير سولوۆيەۆپەن جانە «نوۆايا گازەتا» باس رەداكتورىمەن سۇحباتتاستى.
شارادا تىلشىلەر كەلىسسوز تالاپتارى جايىندا ءسوز قوزعادى. ايتا كەتەيىك، اتالعان بۇقارالىق اقپارات قۇرالدارىنىڭ كەيبىرەۋلەرى رەسەيدە رەسمي تۇردە شەتەلدىك اگەنت بولىپ تانىلعان.
ۆلاديمير زەلەنسكي، ۋكراينا پرەزيدەنتى:
- بىرىنشىدەن قارۋسىزداندىرۋ جانە ناتسيزمنەن باس تارتۋ كەرەك دەگەن شارتتى ءبىز مۇلدەم تالقىلامايمىز. ءتىپتى ءبىر ۇستەل باسىنا دا وتىرمايمىز. قارۋسىزداندىرۋ جانە ناتسيزمنەن باس تارتۋ دەگەندى تۇسىنبەيمىن. مەن كەلىسسوزدەرگە قارسى ەمەسپىن. باستىسى ناتيجە بولسا دەيمىن. بىزدە يادرولىق قارۋ جوق. قالاساق تا جوق. ورىس ءتىلى ماسەلەسىنە توقتالساق. سوعىس جالعاسا بەرسە، تۇرعىنداردىڭ ورىس تىلىنە دەگەن كوزقاراسى وزگەرەتىنى بەلگىلى. حالىق ونى قالامايتىن بولادى. ورىس تىلىندە وقىپ، سويلەپ، كينو كورۋدەن باس تارتا باستايدى. ال قاۋىپسىزدىك پەن بەيتاراپ جانە يادروسىز ستاتۋس ماسەلەسى بويىنشا بۇل ءبىز ءۇشىن ەڭ ماڭىزدى شارت بولىپ تابىلادى.
