اعزاداعى ارتىق سۋدى شىعارۋ جولدارى
بۇل كەزدە دەنە ءوز تونۋسىن جوعالتقان سەكىلدى كورىنەدى. نە ءۇشىن اعزادا سۇيىقتىق جينالادى جانە ونى قالاي شىعارۋعا بولادى؟
ەگەر ەش سەبەپسىز ىسىنەتىنىڭىزدى ءجيى بايقاساڭىز، دارىگەرگە كورىنگەن ءجون. بىردەن جۇرەك پەن بۇيرەكتەردى تەكسەرتىپ، مۇمكىن پاتولوگيالاردى انىقتاپ الۋ كەرەك. سونداي- اق، ايەلدەردە ەتەككىر كەزىندە اعزا سۇيىقتىقتى قارقىندى جينايدى. كوپشىلىك ونى وسى كەزدەگى تاماققا تابەتتىڭ جوعارى بولۋىمەن بايلانىستىرادى، الايدا شىندىعىندا ول گورموندارعا بايلانىستى: ەستروگەن مەن پروگەستەرون سۇيىقتىق الماسۋعا اسەر ەتىپ، تارازىدان ارتىق 1-3 ك گ بايقايسىز. بۇل قالىپتى جاعداي، بىرنەشە كۇننەن سوڭ ءىسىنۋ وزدىگىنەن كەتەدى، ونىمەن بىرگە ارتىق كيلوگرامدار دا جوعالادى.
ءىسىنۋدىڭ تاعى ءبىر سەبەبى — دۇرىس تاماقتانباۋ. كەي سۋسىندار مەن ازىق- تۇلىك توپتارى اعزاداعى سۇيىقتىقتى توقتاتا الادى.
اعزاداعى ارتىق سۇيىقتىقتى شىعارۋ جولدارى
ءبىر قىزىعى، ىسىنۋدەن ارىلۋدىڭ ەڭ جاقسى ءادىسى — اعزانى جەتكىلىكتى سۋ مولشەرىمەن قامتاماسىز ەتۋ. كۇنىنە 2,5 ليتر سۋ ىشۋگە تىرىسۋ كەرەك. اعزا سۋدا ەش كەمشىلىك جوعىنا ۇيرەنگەن كەزدە ول سۇيىقتىقتى ۇستاۋدى دوعارادى.
اعزاداعى ارتىق سۋدى شىعارۋدىڭ تاعى ءبىر ءادىسى — راتسيوننان تۇزدى الىپ تاستاۋ نەمەسە ونىڭ مولشەرىن بارىنشا ازايتۋ. تاماققا جانە سالاتقا قوساتىن تۇزدان باسقا، دۇكەندە ساتىلاتىن دايىن ونىمدەردىڭ قۇرامىندا دا تۇز وتە كوپ بولاتىنىن ەسكەرىڭىز.
راتسيونعا كوبىرەك قاراپايىم جانە تابيعي تاماق قوسىڭىز: جەمىستەر، كوكونىستەر، جارمالار مەن ءىرى تارتىلعان ۇننان جاسالعان نان ءمازىردى تۇرلەندىرۋگە كومەكتەسىپ، پايدالى ەمەس تاماقتاردى اۋىستىرا الادى. قۇس ەتى مەن بالىق، جۇمىرتقا جانە ءسۇت قىشقىلدى ونىمدەر اقۋىزدىڭ تاۋلىكتىك نورماسىن الۋعا جانە ۇزاققا دەيىن تويىمدى جۇرۋگە كومەكتەسەدى.
شوپتەردەن جاسالعان شاي ءىشۋ ارقىلى اعزاداعى سۇيىقتىقتى جىلدام شىعارۋعا بولادى. جالبىز، جاۋجاپىراق (مەليسسا) ، يتمۇرىن، قىزىلجيدەك، زيرە، المانىڭ كەپكەن قابىعى جانە قايىڭ جاپىراعى ىسىنۋدەن ارىلۋعا ىقپال ەتەدى. ول ءۇشىن ولاردان شاي قايناتىپ، ونى كۇنى بويى ءىشۋ جەتكىلىكتى. بۇيرەككە ارنالعان شايلار اياعىش اسەرىمەن بەلگىلى جانە جاناما اسەر تۋدىرمايدى. كوكونىستەردەن قاجەت اسەردى قيار، كادى، قىزىلشا، ورامجاپىراق، كارتوپ، اسقاباق جانە بايالدى بەرەدى. ىسىنۋگە قارسى جەمىستەر — الما، شابدالى، قۇلپىناي، بۇلدىرگەن. كەپكەن ورىك، مەيىز جانە ورىك سەكىلدى كەپكەن جەمىستەر دە كومەكتەسەدى.
تۇز قوسىلعان ۆاننا دەمالۋعا جانە بوساڭسۋعا ىقپال ەتىپ قانا قويماي، اعزانىڭ ارتىق سۋدان ارىلۋىنا كومەكتەسەدى. جاقسى اسەر بولۋى ءۇشىن ۆاننا قابىلدارعا دەيىن ەكى ساعاتتاي ەشتەڭە جەمەگەن جانە ىشپەگەن دۇرىس. ۆاننانى 38 گرادۋستان اسپايتىن سۋعا تولتىرىپ، وعان جارتى كيلوگرامم تۇز نەمەسە 200 گرامم اس سوداسىن سالۋ ۇسىنىلادى. مۇنداي ۆاننادا شامامەن 10 مينۋت جاتۋ كەرەك. پروتسەدۋرا اياقتالعان سوڭ دەنەنى سۇلگىمەن شامالى قۇرعاتىپ، كورپەنىڭ استىندا 40 مينۋت جاتۋ كەرەك. سودان سوڭ دۋشقا شايىنىپ الىڭىز. تاعى دا ءبىر ساعاتتاي ەشتەڭە جەمەۋ جانە ىشپەۋ كەرەك. ادەتتە، مۇنداي ۆاننادان سوڭ دەنە جارتى ليتردان كوپ سۇيىقتىق جوعالتادى.
ارتىق سۇيىقتىقتان ارىلۋعا كومەكتەسەتىن تاعى ءبىر ءتيىمدى ءادىس — مونشاعا بارۋ. مونشادا دەنە ۇساق تەسىكتەر ارقىلى ءبىراز سۇيىقتىق جوعالتادى. سۋسىزدانۋ بولماس ءۇشىن سۋ تەپە- تەڭدىگىن قالپىنا كەلتىرۋدى ۇمىتپاڭىز: ول ءۇشىن پروتسەدۋرالار اراسىندا شوپتەر شايىن ءىشىڭىز. مونشا الدىندا زالدا جاتتىعىپ الساڭىز، وتە جاقسى ناتيجە بايقايسىز.
