مينيستر: بالالاردى بۋللينگتەن قورعاۋ زاڭناماسى - ءسوز بوستاندىعىن شەكتەۋ ەمەس
«بىرىنشىدەن، بۇل تۇزەتۋلەردى قابىلداۋ قازاقستانداعى ءسوز بوستاندىعىن شەكتەۋ ەمەس. شىن مانىندە زاڭ جوباسىنا ۇسىنىلىپ وتىرعان تۇزەتۋلەر ءبىزدىڭ ەلىمىزدەگى ءسوز بوستاندىعىن ەشبىر جاعدايدا شەكتەمەيدى، كەرىسىنشە، ق ر اۋماعىنداعى الەۋمەتتىك جەلىلەر مەن مەسسەندجەرلەر قىزمەتىن زاڭنامالىق رەتتەۋدى كوزدەيدى. باسقاشا ايتقاندا، ءبىز شەتەلدىك كومپانيالاردىڭ دا ەلىمىزدە قىزمەت ەتىپ وتىرعان كەز كەلگەن كاسىپكەرلىك سۋبەكتىلەرى سياقتى ق ر زاڭدارىن ساقتاۋىن قامتاماسىز ەتكىمىز كەلەدى. زاڭداردا ءتيىستى باپتار بولماعاندىقتان Meta، Telegram جانە ت. ب. ساندىق الپاۋىتتار فيزيكالىق تۇرعىدان قازاقستان تەرريتورياسىندا بولماعاندىقتان ءبىز ولاردان زاڭدارىمىزدى ساقتاۋدى تالاپ ەتە المايمىز. زاڭدى وكىلدى تاعايىنداۋ وسى جاعدايدى تۇزەتۋگە مۇمكىندىك بەرەدى» دەپ جازدى اسقار ۋماروۆ Facebook پاراقشاسىندا.
مينيسترلىك سوڭعى جىلدارى حالىقارالىق الەۋمەتتىك جەلىلەردىڭ يەلەرىمەن بەلسەندى ىنتىماقتاستىق ورناتىپ جاتىر.
«ۆكونتاكتە»، «ودنوكلاسسنيكي»، «Mail.ru» ،«Livejournal» ،«Facebook» ،«instagrams» ،«Tik tok»، «Linkedin» ،«Telegram» مەسسەندجەرلەرى بۇل باستامانى قۇپتادى جانە وسى نورمالاردى ورىنداۋعا كەلىسىم بەردى. قازىرگى ۋاقىتتا شەتەلدىك الەۋمەتتىك جەلىلەر زاڭدى وكىلدى انىقتاۋ جانە تاعايىنداۋ بويىنشا جۇمىس جۇرگىزۋدە.
«بۇل تۇزەتۋلەر قاراپايىم پايدالانۋشىلارعا ەشقانداي اسەر ەتپەيدى، ويتكەنى زاڭسىز ماتەريالداردى تاراتۋعا جاۋاپكەرشىلىك قولدانىستاعى زاڭنامادا قاراستىرىلعان، ولار وزگەرىسسىز قالادى. ەكىنشىدەن، 24 ساعات ىشىندە زاڭسىز كونتەنتتى جويۋ تالاپتارى. بەلگىلى بولعانداي، اكىمشىلىكتەرى ەشقانداي جاۋاپكەرشىلىككە تارتىلمايتىندىقتان جابىق توپتار مەن قاۋىمداستىقتار جەكە پاراقشالارىندا جەكە تۇلعالاردىڭ سوڭىنا ءتۇسۋ، قۋدالاۋ، قورلاۋ، جەكە باسقا ءتيىسۋ فاكتىلەرىن توقتاتپاي وتىر. ولارمەن بايلانىس ورناتىپ، اقىلعا شاقىرۋ ارەكەتتەرى كوپ جاعدايدا ناتيجە بەرمەيدى. بۇل جاعدايدى شەشۋدىڭ جالعىز ءارى ءتيىمدى ءادىسى - الەۋمەتتىك جەلىلەردىڭ وزدەرىنە جۇگىنۋ. اقپاراتتى 24 ساعاتتان ارتىق ساقتاۋ، ءسىز تۇسىنگەندەي، مالىمەتتىڭ وزەكتىلىگىن جوعالتۋىنا نەمەسە زياندى سالدارعا اكەلۋى مۇمكىن» دەيدى مينيستر.
ونىڭ ايتۋىنشا، 24 ساعات ىشىندە الەۋمەتتىك جەلىلەردەگى كونتەنتتى جويۋدى/بۇعاتتاۋدى تالاپ ەتەتىن زاڭدار ءبىرقاتار دامىعان ەلدەردە بار. مىسالى، گەرمانيادا 2017 -جىلدان باستاپ «الەۋمەتتىك جەلىلەر پايدالانۋشىلارىنىڭ قۇقىقتارىن قورعاۋ تۋرالى» زاڭ قولدانىستا بار.
«ۇشىنشىدەن، مونيتورينگ پەن ستاتيستيكا. بۇگىنگى كۇنى قازاقستان رەسپۋبليكاسىنىڭ اۋماعىندا كيبەربۋللينگ فاكتىلەرىن ايقىنداۋ جانە تىركەۋ تەتىگى زاڭنامالىق تۇرعىدان ءالى رەتتەلمەگەندىكتەن تىكەلەي ستاتيستيكا جوق. الايدا، قازاقستان رەسپۋبليكاسى زاڭناماسىنىڭ تالاپتارىن ساقتاۋدى باقىلاۋ شەڭبەرىندە مينيسترلىك تۇراقتى تۇردە بۇقارالىق اقپارات قۇرالدارىنىڭ، ونىڭ ىشىندە ينتەرنەت جەلىسىنىڭ ونىمدەرىنە مونيتورينگ جاسايدى. جالپى، 2021 -جىلى ينتەرنەت- رەسۋرستاردىڭ مەنشىك يەلەرى مەن اكىمشىلىكتەرىنىڭ زاڭ بۇزۋشىلىقتارىن جويۋ تۋرالى ۋاكىلەتتى ورگاننىڭ ۇسىنىمدارى بويىنشا شامامەن 222453 قۇقىققا قارسى ماتەريالداردى جويۋ بويىنشا شارالار قابىلداندى. بۇدان باسقا، 2021 -جىلى «بايلانىس تۋرالى» زاڭدا كوزدەلگەن تارتىپپەن ۋاكىلەتتى ورگان قازاقستان رەسپۋبليكاسىنىڭ اۋماعىنداعى پايدالانۋشىلار ءۇشىن كيبەربۋللينگكە قاتىسى بار 10578-دەن استام ماتەريالدىڭ تارالۋىن شەكتەدى. جالپى، ۇسىنىلىپ وتىرعان جاڭا نورمالار اياسىندا مينيسترلىككە الەۋمەتتىك جەلىلەر مەن مەسسەندجەرلەردىڭ ەركىن قىزمەتىنە كەدەرگى كەلتىرەتىن جانە پىكىر ءبىلدىرۋ بوستاندىعىن شەكتەيتىن قۇزىرەت بەرىلمەيتىنىن اتاپ وتكىم كەلەدى» دەپ قورىتىندىلادى اسقار ۋماروۆ.
