الماتىدا «اقىن» فيلمىنىڭ تۇساۋكەسەرى ءوتتى - فوتو

None
None
الماتى. قازاقپارات - الماتىداعى Chaplin Mega Alma-Ata كينوتەاترىندا رەجيسسەر دارەجان ومىربايەۆ تۇسىرگەن «اقىن» فيلمىنىڭ تۇساۋكەسەرى ءوتتى، دەپ حابارلايدى قازاقپارات.

مادەني ءىس-شاراعا كينوستۋديا باسشىلىعى، فيلمنىڭ ءتۇسىرۋ توبى مەن ب ا ق وكىلدەرى قاتىستى. ءوزىنىڭ العى سوزىندە «قازاق فيلم» كينوستۋدياسىنىڭ پرەزيدەنتى اقان ساتايەۆ «اقىن» فيلمىنىڭ شىعارماشىلىق توبىن تۇساۋكەسەرمەن قۇتتىقتاپ، كارتينانىڭ العاشقى كورسەتىلىمى توكيوداعى حالىقارالىق كينوفەستيۆال شەڭبەرىندە وتكەنىن جانە بۇل بايقاۋدا دارەجان ومىربايەۆ «ۇزدىك رەجيسسەر» جۇلدەسىمەن ماراپاتتالعانىن اتاپ ءوتتى.

سونىمەن قاتار اقان ساتايەۆ اتالعان كينوتۋىندى جاقىندا عانا وتكەن حالىقارالىق بەرلين كينوفەستۆالىنىڭ «فورۋم» باعدارلاماسىندا كورسەتىلگەنىن ەسكە سالىپ، فيلمنىڭ الار اسۋلارى ءالى الدا ەكەنىن ايتتى.


ەستەرىڭىزگە سالا كەتسەك، «اقىن» فيلمى تەحنولوگيالار دامىعان قازىرگى زاماندا ونەردىڭ قوعامدا الاتىن ورنى تۋرالى وي قوزعاپ، پوەزياعا سۇرانىس ازايعان داۋىردە اقىننىڭ كۇيىنىشى تۋرالى سىر شەرتەدى.

قازاق حالقىنىڭ XIX عاسىرداعى ەڭ كورنەكتى اقىندارىنىڭ ءبىرى ماحامبەت وتەمىس ۇلىنىڭ قيلى تاعدىرى جايىندا ويعا باتقان باستى كەيىپكەر نازىك جۇرەكتى اقىنداردىڭ ءومىرى قاشان دا قيىن بولعانىن تۇسىنەدى.

- نەمىس جازۋشىسى گەرمان گەسسەنىڭ «اۆتورلىق كەش» اتتى اڭگىمەسىن وقىعان سوڭ فيلمنىڭ سەناريىن جازۋعا كىرىستىم. كەيىن قولىما قازاقتىڭ بەلگىلى اقىنى ماحامبەت وتەمىس ۇلىنىڭ ءومىرى مەن ءولىمى تۋرالى تىڭ دەرەكتەرمەن تولىقتىرىلعان كىتاپ ءتۇستى.

ونى وقىپ شىعىپ، فيلمنىڭ سەناريىنە قوستىم. وسىلايشا «اقىن» فيلم دۇنيەگە كەلدى، - دەدى رەجيسسەر دارەجان ومىربايەۆ.


فيلمدەگى باستى ءرولدى «جىگىتتەر» توبىنىڭ سوليسى ەردوس قانايەۆ سومدادى.

بەلگىلى ءانشى «جىگىتتەر» كۆارتەتىنە بيىل 20 جىل تولاتىنىن جانە وسى ۋاقىت ارالىعىندا كورەرمەندەرمەن العاش رەت كينواكتەر رەتىندە قاۋىشىپ وتىرعانىن ايتتى.

- باسىندا بۇل رولگە باسقا اكتەر بەكىتىلگەن بولاتىن. كەيىن كارانتين كەزىندە كاستينگ- ديرەكتور ەردوس قانايەۆتىڭ كانديداتۋراسىن ۇسىندى. بىرنەشە رەت كامەراعا ءتۇسىرىپ كوردىك تە، ناتيجەسىندە ەردوستى تاڭدادىق. ونى ءانشى بولعانى ءۇشىن تاڭداعانىمىز جوق. دەگەنمەن كەيبىر ساحنالاردى تۇسىرگەندە ونىڭ شىعارماشىلىققا جاقىن بولعانى كومەك بولدى، - دەدى رەجيسسەر. سونىمەن قاتار دارەجان ومىربايەۆ «اقىن» فيلمى جاقىن بولاشاقتا باسقا دا حالىقارالىق بەدەلدى كينوفەستيۆالدەر شەڭبەرىندە كورسەتىلەتىنىن حابارلادى.


ايتا كەتسەك، فيلمنىڭ ءتۇسىرۋ جۇمىستارى 2020 -جىلى باستالدى. نەگىزگى تۇسىرىلىمدەر الماتى جانە الماتى وبلىسىندا، سونداي-اق اتىراۋ وبلىسىندا جۇرگىزىلدى.

ەستەرىڭىزگە سالا كەتسەك، اتالعان كينوتۋىندى ق ر مادەنيەت جانە سپورت مينيسترلىگى تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى قولداۋىمەن» ش. ايمانوۆ اتىنداعى قازاق فيلم» كينوستۋدياسى تۇسىرگەن.

سوڭعى جاڭالىقتار