نەگە جىلاعانىمدى ءوزىم دە بىلمەيمىن - ق ر پرەزيدەنتىنىڭ جولداۋىن وقىعان قىتايلىق جەلى قولدانۋشى

نۇر- سۇلتان. قازاقپارات – ق ر پرەزيدەنتىنىڭ حالىققا جولداۋىن قىتايلىق جەلى قولدانۋشىلارى دا تالقىلاپ، تالداپ جاتىر.

قىتاي قوعامدىق عىلىمدار اكادەمياسىنىڭ اعا عىلىمي قىزمەتكەرى جاڭ نين جولداۋدىڭ قىتاي تىلىندەگى اۋدارماسىنىڭ تولىق ءماتىنىن ءوز پاراقشاسىنا سالعاننان كەيىن، پوستقا 123 كوممەنتاري جازىلعان. كوپشىلىگى قازاقستان حالقىنا ىزگى تىلەك ايتىپ، ساياسي رەفورمالاردىڭ تابىستى بولاتىنىنا سەنىم ءبىلدىرىپتى.

«قازاقستان دەموكراتيا جولىندا نىق قادام باستى»، «وزىنە ءوزى ريەۆوليۋتسيا جاساۋ ارقىلى دامۋدى العا ىلگەرىلەتكەن ەل باقىتتى»، «ورتالىق ازياداعى وڭ وزگەرىس تاريحي مانگە يە»، «مەنىڭ دە بۇگىن باقىتتى بولعىم كەلەدى»، «قازاقستاندى جارقىن بولاشاق كۇتىپ تۇر»، «قازاقستاننىڭ دەموكراتيالى، ەركىن، باي- باقۋاتتى ەل رەتىندە قالىپتاسۋىنا تىلەكتەسپىن»، «الەم ەلدەرىنىڭ بارىنە توقايەۆتەي باسشى بۇيىرسىن» دەپ جالعاسا بەرەدى. ارينە، الاڭداۋشىلىق بىلدىرگەن ءبىردى- ەكىلى پىكىر دە جوق ەمەس، «باتىستانىپ بارا جاتىر»، «ءتۇرلى- ءتۇستى ريەۆوليۋتسيا» دەگەن سەكىلدى، ءبىراق، ەلەۋسىز قالعان.

قىتاي قوعامدىق عىلىمدار اكادەمياسىنىڭ اعا عىلىمي قىزمەتكەرى ياڭ جين «قازاقستان جاڭا دامۋ كەزەڭىنىڭ بوساعاسىندا تۇر» دەگەن جازباسىندا قازاقستاننىڭ ىشكى- سىرتقى ساياساتى مەن ەكونوميكاسىن ەلەۋلى وزگەرىستەر كۇتىپ تۇرعانىن ايتا كەلىپ، «بۇل وزگەرىستەر بۇكىل ورتالىق ازيانىڭ گەوساياسي جاعدايىنا ماڭىزدى ىقپال جاسايتىن بولادى» دەپ تۇيىندەپتى.

قىتايلىق جەلى قولدانۋشىلارىنىڭ ءبىرى «وقىپ وتىرىپ جىلادىم. نەگە جىلاعانىمدى ءوزىم دە بىلمەيمىن، بىلمەيمىن سەبەبىن! باقىتتى ۇلت، باقىتتى ەل ەكەن» دەپ تولقىپتى.

. . .

ەرلان مازاننىڭ Facebook پاراقشاسىنان الىندى