ق ر پرەزيدەنتى: حالقىمىز قاشاندا بەرەكە-بىرلىككە، ىرىس-ىنتىماققا باسا ءمان بەرگەن
مەملەكەت باسشىسى ءوز سوزىندە سالتاناتتى جيىنعا قاتىسۋشىلاردى ۇلىستىڭ ۇلى كۇنىمەن قۇتتىقتاپ، بۇل مەيرامنىڭ تاريحى تەرەڭ ءتول مەرەكەمىز ەكەنىن اتاپ ءوتتى.
- ءاز ناۋرىز تابيعاتتى تۇلەتىپ، تىرشىلىككە ءنار بەرەدى، جاڭارۋ مەن جاڭعىرۋعا ۇندەيدى. مەن كۇنى كەشە عانا حالىققا جولداۋىمدى جاريالاپ، جاڭا قازاقستاندى قۇرۋعا جول اشاتىن ماڭىزدى باستامالار ۇسىندىم. مۇنىڭ ءبارى - ەلىمىزدە جۇزەگە اسىرىلىپ جاتقان ساياسي رەفورمالاردىڭ زاڭدى جالعاسى.
ءبىزدىڭ ماقساتىمىز - ءتيىمدى مەملەكەت جانە ءادىل قوعام قۇرۋ. سونداي-اق حالقىمىزدىڭ ءال- اۋقاتىن ارتتىرىپ، تۇرمىس ساپاسىن جاقسارتۋ. ەڭ باستىسى، قاستەرلى تاۋەلسىزدىگىمىزدى قورعاپ، قازاقستاندى مىقتى مەملەكەتكە اينالدىرۋ، - دەدى پرەزيدەنت. مەملەكەت باسشىسى قوعامنىڭ بارلىق سالاسىندا تۇبەگەيلى وزگەرىس جاساۋعا كىرىسە وتىرىپ، ەلىمىزدى دامىتۋدىڭ مۇلدە جاڭا كەزەڭىنە قادام باساتىنىمىزعا نازار اۋداردى. ونىڭ پىكىرىنشە، جاڭا قازاقستان - ابستراكتى يدەيا ەمەس، كەلەشەكتىڭ جارقىن كورىنىسى.
- سىزدەردىڭ ءارقايسىلارىڭىز ىنتىماق پەن بىرلىك قۇندىلىقتارىنا ادالدىعىن ءىس جۇزىندە دالەلدەگەن ناعىز پاتريوتسىزدار. وزدەرىڭىزدىڭ قاجىرلى ەڭبەكتەرىڭىزبەن، كومەك قولىن سوزۋعا دەگەن شىنايى نيەتتەرىڭىزبەن بارشا وتانداسىمىزعا ۇلگى-ونەگە كورسەتەسىزدەر. ءبىز قازاقستاندى رەفورمالاۋ ۇدەرىسىن باستادىق. جاڭا مۇمكىندىكتەر مەن دامۋعا ۇمتىلعان جاڭا قازاقستاندى بىرگە قۇرامىز، - دەدى قاسىم-جومارت توقايەۆ.
پرەزيدەنت جولداۋداعى ءاربىر باستامانى وسى ماقساتقا جەتۋ جولىنداعى ناقتى قادام دەپ سانايدى.
ونى تابىستى جۇزەگە اسىرۋ - بارشامىزدىڭ ورتاق مىندەتىمىز.
- قازىر اۋمالى-توكپەلى كەزەڭ بولىپ تۇر. گەوساياسي احۋال كۇننەن كۇنگە ۋشىعا تۇسۋدە. ونىڭ سالقىنى بەلگىلى سەبەپتەرگە بايلانىستى قازاقستانعا دا تيەدى. ءبىراق، ءبىز باعدارىمىزدان اينىماي، كوزدەگەن ماقساتىمىزعا قالايدا جەتەمىز. سول ءۇشىن ءبىر جاعادان باس، ءبىر جەڭنەن قول شىعارىپ، جۇمىلا جۇمىس ىستەۋىمىز كەرەك، - دەدى مەملەكەت باسشىسى.
قاسىم-جومارت توقايەۆتىڭ ايتۋىنشا، بۇگىندە ءاربىر وتانداسىمىز ەگەمەن ەلىمىزدى وركەندەتۋگە ءوز ۇلەسىن قوسۋدا. حالقىمىز قاشاندا بەرەكە-بىرلىككە، ىرىس-ىنتىماققا باسا ءمان بەرگەن، ءوزارا جاناشىرلىق پەن قامقورلىقتى بارىنشا دارىپتەگەن.
- ەل ىشىندە بەيبىت كۇندە ەڭبەگىمەن، قيىن ساتتە ەرلىگىمەن كوزگە تۇسكەن جاندار از ەمەس. كەشەگى دۇربەلەڭ كەزىندە قانشاما ازاماتىمىز جۇرتتى سابىرعا شاقىرىپ، ساليقالى ءسوز ايتتى. ولار ءوز باسىن قاتەرگە تىگىپ، اينالاسىنداعى ادامدارعا كومەكتەستى. جاۋاپتى ساتتە جۇرتىنا قورعان بولىپ، ەلدىكتىڭ ناعىز ۇلگىسىن كورسەتتى. وسىنداي وتانشىل تۇلعالارىمىز - جاس ۇرپاققا ونەگە. حالقىمىز «ەر - ەڭبەگىمەن قادىرلى» دەپ بەكەر ايتپاعان. ەلگە ەڭبەگى سىڭگەن جاندارعا ۇلىستىڭ ۇلى كۇنىندە قۇرمەت كورسەتۋدىڭ زور سيمۆولدىق ءمانى بار، - دەدى پرەزيدەنت.
قاسىم-جومارت توقايەۆ ءسوزىن قورىتىندىلاي كەلە، ناۋرىز مەرەكەسى قارساڭىندا ءبىر توپ قايراتكەرگە مەملەكەتتىك ناگرادا تاپسىرۋ جونىندە شەشىم قابىلداعانىن جەتكىزدى. سونداي-اق بۇل ءىس-شارانى وسى مەيرامعا وراي وتكىزۋ يگى داستۇرگە اينالاتىنىن ايتتى.
