مەملەكەت باسشىسى نۇر- سۇلتان قالاسىنىڭ اكىمى التاي كولگىنوۆتى قابىلدادى

نۇر- سۇلتان. قازاقپارات - قاسىم- جومارت توقايەۆقا ەلوردانىڭ الەۋمەتتىك- ەكونوميكالىق جانە ينفراقۇرىلىمدىق دامۋى جونىندە مالىمەت بەرىلدى، دەپ حابارلايدى اقوردا.

پرەزيدەنتكە بيىل 28500 جۇمىس ورنىن اشۋ جوسپارلانىپ وتىرعانى باياندالدى. ونىڭ 24 مىڭى تۇراقتى جۇمىس ورنى بولماق. سونىمەن قاتار ينجەنەرلىك جەلىلەردى جاڭعىرتۋ، كوپىرلەر مەن جولداردىڭ قۇرىلىسى، تۇرمىسى تومەن ازاماتتارعا الەۋمەتتىك كومەك كورسەتۋ، شاعىن جانە ورتا بيزنەستى قولداۋ ماسەلەلەرى تۋرالى ايتىلدى.

قالا اكىمىنىڭ ايتۋىنشا، مەملەكەت باسشىسىنىڭ تاپسىرماسىنا سايكەس تۇرعىن ۇيلەر جاعدايىن جاقسارتۋ بويىنشا جۇيەلى جۇمىستار جۇرگىزىلىپ جاتىر. اتاپ ايتقاندا كەزەكتە تۇرعان ازاماتتارعا الەۋمەتتىك پاتەرلەر سالىنۋدا. بۇدان بولەك، بيىل 300-دەن استام وتباسى اپاتتى جاعدايداعى توزىعى جەتكەن تۇرعىن ۇيلەردەن كوشىرىلەدى. 16 مىڭ ۇلەسكەردىڭ 13 مىڭىنىڭ ماسەلەسى شەشىلىپ، قۇرىلىسى ۇزاققا سوزىلعان نىسانداردىڭ جۇمىسىن اياقتاۋعا ينۆەستورلاردىڭ جەكە قاراجاتى تارتىلعان.

سونىمەن قاتار ءبىلىم بەرۋ ورىندارى، مەديتسينالىق ورتالىقتار جانە باسقا دا الەۋمەتتىك نىساندار سالىنادى. قاسىم- جومارت توقايەۆ اكىمدىكتىڭ جۇمىسىن ماقۇلداپ، ەلوردانى دامىتۋ مەن اباتتاندىرۋ جونىندە ءبىرقاتار تاپسىرما بەردى.