جاۋاپكەرشىلىكتى پرەزيدەنتكە يتەرە بەرمەي، ءبارىمىز تەڭ ءبولىسۋىمىز كەرەك - جاناربەك ءاشىمجان
ءماجىلىستىڭ جالپى وتىرىسىندا بەرىلگەن جاۋاپتارعا دەپۋتات جاناربەك ءاشىمجان پىكىر ءبىلدىردى، دەپ حابارلايدى قازاقپارات ءتىلشىسى.
«وتكەن اپتادا جاريالانعان دەپۋتاتتىق ساۋالىمىزعا بايلانىستى بۇگىن باس پروكۋرور، ىشكى ىستەر ءمينيسترى، سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى، باسقا دا كۇش قۇرىلىمىنىڭ باسشىلارى بايانداما جاسادى. دەپۋتاتتاردىڭ تاراپىنان كوپتەگەن سۇراقتار قويىلدى. اشىعىن ايتقان كەزدە بارلىق بايانداماشىلاردان گورى قۇقىق قورعاۋشىلار ابزال قۇسپان مەن ايمان وماروۆانىڭ بايانداماسىندا كوپ نارسە ايتىلعانداي كورىندى. وسى ساۋالدى جولداعان دەپۋتات رەتىندە ايتسام، كۇش قۇرىلىمدارى باسشىلارىنىڭ باياندامالارىندا كەلتىرىلگەن دەرەكتەر كوڭىلىمنەن تولىق شىققان جوق. قوعام تاراپىنان قويىلعان سۇراقتارعا تولىق جاۋاپ بەرىلدى دەپ ايتا المايمىن. ءبىراق سول كۇش قۇرىلىمىنىڭ باسشىلارى، مەملەكەتتىك ورگاننىڭ جەتەكشىلەرى قازىرگى كۇنى تەرگەۋ امالدارى ءجۇرىپ جاتقانىن، سوعان بايلانىستى كوپ ماسەلە قۇپيا جاعدايدا ءجۇرىپ جاتقانىن ەسكەرتتى. «سول سەبەپتى كوپ جاعدايدى ازىرگە قوعامعا اشىق ايتا المايمىز. تەرگەۋ امالدارى تولىق بىتكەن سوڭ بارلىق جاعدايدى حالىققا ءتيىستى دەڭگەيدە جەتكىزەمىز» دەدى. وسى تاراپتان العان كەزدە مەن جاۋاپتارعا جارتىلاي قاناعاتتاندىم دەپ ايتۋعا بولادى»، - دەيدى دەپۋتات.
ونىڭ پايىمىنشا، مەملەكەتتىك ورگاندار باسشىلارىنىڭ باياندامالارىندا كەلتىرىلگەن دەرەك- دايەكتەردىڭ ءبىرازى وسى كۇنگە دەيىن دە ايتىلعان.
«سول كۇندەرى قانشا عيماراتقا قانشا ادام شابۋىل جاسادى، قانشا ادام قايتىس بولدى، اسكەري ادامداردان قانشا ادام زارداپ شەكتى، بيزنەس نىساندارى قالاي قيرادى دەگەن سەكىلدى سۇراقتارعا ب ا ق- تا شەتپۇشپاقتاپ ءبىراز مالىمەت شىققان. سول مالىمەتتەر جاڭارتىلىپتى، تولىقتىرىلعان دەرەكتەر تىڭدادىق دەپ ايتۋعا بولادى. ال قوعام تاراپىنان «بۇل وقيعانى كىمدەر ۇيىمداستىردى، كريمينالدىق توپتاردىڭ جەتەكشىلەرى كىمدەر، ولارعا ىقپال ەتىپ وتىرعان لاۋازىمدى تۇلعالار كىمدەر» دەگەن سياقتى ساياسي ماندەگى سۇراقتار كوپ قويىلىپ جاتىر. سولارعا جاۋاپ مولىراق بەرىلمەدى. الداعى ۋاقىتتا وسىعان تولىق جاۋاپ الامىز عوي دەپ ويلايمىن»، - دەدى ءماجىلىس وكىلى.
سونداي-اق، ول قاڭتار وقيعاسىنان دۇرىس قورىتىندى شىعارىلۋىنا بۇكىل قازاقستان قوعامى مۇددەلى ەكەنىن ەسكە سالدى.
«ەڭ نەگىزگىسى، 4,5,6,7,8- قاڭتار كۇندەرى ءبىرىنشى بولىپ، مەملەكەت باسشىسى رەتىندە قاسىم-جومارت توقايەۆ ۇلكەن جاۋاپكەرشىلىكتى موينىنا الدى. ارادا ەكى ايدان ارتىق ۋاقىت ءوتتى. جاۋاپكەرشىلىك پرەزيدەنتتىڭ عانا موينىندا بولماۋى كەرەك. ءتيىستى سالالىق ۇكىمەت مۇشەلەرىنىڭ دە، وڭىردەگى اكىمدەردىڭ دە، جالپى كۇش قۇرىلىمى باسشىلارىنىڭ، سول سالادا قىزمەت ەتەتىن ءتيىستى لاۋازىمدى تۇلعالاردىڭ دا جاۋاپكەرشىلىگى بولۋعا ءتيىس.
سول سەبەپتى ءبارى ءوز سالاسى بويىنشا، اشىق، قانىق جانە ناقتى اقپارات بەرۋى كەرەك.
رەسمي اقپارات الماعان جەردە الەۋمەتتىك جەلىدە ءتۇرلى الىپقاشپا اڭگىمەلەر تۋىندايدى. ول حالىقتىڭ كوڭىل كۇيىنە دە ءتۇرلى اسەر ەتەدى. سوندىقتان جاۋاپكەرشىلىكتى تەك پرەزيدەنتكە يتەرە بەرمەي، ءبارىمىز، قوعام دا، بيلىك تە، پارلامەنت تە، ۇكىمەت تە جاۋاپكەرشىلىكتى تەڭ ءبولىسىپ، حالىققا ناقتى، شىنايى اقپاراتتى قالايدا جەتكىزۋىمىز كەرەك»، - دەدى جاناربەك ءاشىمجان.
