كوزى اشىق، كوڭىلى وياۋ ادام مەملەكەتتى حاوسقا جىبەرمەگەن باسشىسىن باعالاۋى ءتيىس - ەدىل جاڭبىرشين
ءماجىلىستىڭ جالپى وتىرىسىندا دەپۋتات ەدىل جاڭبىرشين وسىنداي پايىم ايتتى، دەپ حابارلايدى قازاقپارات ءتىلشىسى.
«وكىنىشكە قاراي، الماتى وبلىسى، الماتى، تاراز، جانە باسقا دا قالالاردا بەيبىت شەرۋلەر ارانداتۋشىلاردىڭ كەسىرىنەن جاپپاي بۇزاقىلىق پەن قانتوگىسكە ۇلاستى. قانشاما بەيبىت ازاماتتار مەن قارۋسىز قۇقىق قورعاۋ قىزمەتكەرلەرى جارالاندى، قازا تاپتى. مەملەكەتتىك جانە كاسىپكەرلىك نىساندار قيرادى. بۇل ادەيى ۇيىمداستىرىلعان ارەكەت دەپ ەسەپتەيمىن. ويتكەنى پرەزيدەنت توقايەۆتىڭ ىسكە اسىرا باستاعان ساياسي جانە ەكونوميكالىق رەفورمالارىنا قارسى توپتار وسىنداي قاتىگەزدىككە باردى. ءيا، ەلدە قوردالانىپ قالعان الەۋمەتتىك- ەكونوميكالىق ماسەلەلەر بار. ول جاسىرىن ەمەس. وسى جاعدايدى ۇتىمدى پايدالانعىسى كەلگەن بيلىكقۇمار ارامزالار حالىقتىڭ اتىن جامىلىپ، وزدەرىنىڭ ارام پيعىلدارىن ىسكە اسىرعىلارى كەلدى. تىكە ايتقاندا ولاردىڭ ويلارى مەملەكەتتە توڭكەرىس جاساۋ ەدى»، - دەدى ءماجىلىس دەپۋتاتى.
ەدىل جاڭبىرشين وسىنداي سىن ساعاتتا پرەزيدەنت بۇلىكتى ۇيىمداستىرۋشىلار كۇتپەگەن قادامعا بارعانىن ايتادى.
«قانتوگىستى ۇيىمداستىرۋشىلار مەملەكەت باسشىسى بۇكىل وڭىرلەر كوتەرىلگەندە ەلدەن كەتىپ قالادى نەمەسە ءوز ورىنىن بوساتادى، بيلىكتى وڭاي بەرە سالادى دەپ ويلاعان بولۋى كەرەك. مۇنداي جاعدايلار بۇلىك شىققان مەملەكەتتەردە بولعانىن جاقسى بىلەمىز. شىنىندا دا ەلدە اۋىر جاعداي ورىن الدى. بيلىك قىل ۇستىندە تۇردى. الايدا، قاسىم- جومارت كەمەل ۇلىنىڭ تاباندى پوزيتسياسى، وتكىر شەشىمدەرى جانە قازاقستان حالقىنا قايتا- قايتا جاساعان ۇندەۋلەرى كوڭىلگە سەنىم ۇيالاتىپ، قاسكويلەردىڭ ارام ويلارىن ىسكە اسىرۋعا مۇمكىندىك بەرمەدى. مەملەكەتتى حاوسقا جىبەرمەگەن باسشىنى كوزى اشىق، كوڭىلى وياۋ ادام باعالاي ءبىلۋى كەرەك»، - دەدى دەپۋتات.
اۆتور: ەسىمجان ناقتىباي
