قازاقستاندا ازىق- تۇلىك تاپشىلىعىنا ەش نەگىز جوق - ا ش م

نۇر- سۇلتان. قازاقپارات - ق ر اۋىل شارۋاشىلىعى ۆيتسە- ءمينيسترى جەڭىس وسەرباي الەۋمەتتىك ماڭىزى بار ازىق- تۇلىك قورى تۋرالى ايتىپ بەردى، دەپ حابارلايدى قازاقپارات ءتىلشىسى.

«مينيسترلىك اپتا سايىن ىشكى نارىقتى ازىق- تۇلىك تاۋارلارىمەن قامتاماسىز ەتۋ مونيتورينگىن جۇرگىزەدى. اكىمدىكتەردىڭ جەدەل دەرەكتەرىنە سايكەس، 12- ناۋرىزداعى جاعداي بويىنشا رەسپۋبليكادا بارلىعى 1,3 ميلليون توننا الەۋمەتتىك ماڭىزى بار ازىق- تۇلىك بار، ونىڭ ىشىندە ۇن - 144 مىڭ توننا، قانت - 90 مىڭ توننا، كۇرىش - 39,3 مىڭ توننا، ماكارون - 21 مىڭ توننا جانە شامامەن 900 مىڭ توننا كوكونىس ونىمدەرى جانە باسقالارى بار. ازىق- تۇلىك قورى جاڭارتىلادى جانە قاجەتتىلىگىنە قاراي كۇن سايىن تولىقتىرىلادى»، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن بىرگە ج. وسەرباي رەسپۋبليكادا جارما، ۇن جانە باسقا دا تاۋارلار ءوندىرۋ ءۇشىن شيكىزات، ەت جانە ءسۇت ونىمدەرىن ءوندىرۋ ءۇشىن مال باسى جەتكىلىكتى ەكەنىن اتاپ ءوتتى.

«ازىق- تۇلىك تاۋارلارىنىڭ بارلىق دەرلىك ءتۇرى بويىنشا حالىق قاجەتتىلىگى ءوز ءوندىرىسى ەسەبىنەن قامتاماسىز ەتىلەدى، ال كەيبىرىندە ءوندىرىس قاجەتتىلىكتەن ايتارلىقتاي اسادى. مىسالى، جىل سايىن ورتا ەسەپپەن 3 ميلليون توننادان استام ۇن وندىرىلەدى، ال تۇتىنۋ كولەمى - 1,6 ميلليون توننا، كۇرىش ءوندىرىسى دە 200 مىڭ توننانى قۇرايدى، ال قاجەتتىلىك - 95 مىڭ توننا. وسىلايشا، ءوندىرىستىڭ قازىرگى قارقىنى ساقتالسا جانە تۇتىنۋدىڭ ءداستۇرلى كولەمدەرىن ەسكەرە وتىرىپ، ەلدە ازىق- تۇلىك تاپشىلىعىنىڭ تۋىنداۋى ءۇشىن نەگىز جوق ەكەنىن حابارلايمىز»، - دەدى جەڭىس وسەرباي.

اۆتور: ايجان سەرىكجان قىزى