ۇكىمەت ينتەرنەتتە ماكروەكونوميكالىق احۋال تۋرالى اقپاراتتىڭ كوبەيۋىنە بايلانىستى مالىمدەمە جاسادى

نۇر- سۇلتان. قازاقپارات – ق ر ۇكىمەتى ينتەرنەتتە تەرىس سىرتقى ماكروەكونوميكالىق جاعدايلارعا بايلانىستى تۋىندايتىن پروبلەمالار تۋرالى حابارلامالاردىڭ جيىلەۋىنە بايلانىستى رەسمي مالىمدەمە جاسادى، دەپ حابارلايدى قازاقپارات.

«تەرىس سىرتقى ەكونوميكالىق قۇبىلىستارعا جەدەل دەن قويۋ شەڭبەرىندە ۇكىمەت پەن ۇلتتىق بانك بىرلەسكەن ءىس- قيمىلدار جوسپارىن ىسكە اسىرۋدا. اتاپ ايتقاندا، قارجى نارىعىنىڭ ورنىقتىلىعىن جانە تەڭگەلىك دەپوزيتتەردىڭ تارتىمدىلىعىن قامتاماسىز ەتۋ ماقساتىندا ۇكىمەت ۇلتتىق بانكپەن بىرلەسىپ، مەملەكەتتىك بيۋدجەت ەسەبىنەن حالىقتىڭ دەپوزيتتەرى بويىنشا سىيلىقاقى ەسەپتەۋدى كوزدەيتىن تەڭگەلىك سالىمداردى قورعاۋ باعدارلاماسىن ازىرلەدى» دەلىنگەن حابارلامادا.

ۇكىمەت مالىمدەمەسىندەگى دەرەك بويىنشا، ەكىنشى دەڭگەيدەگى بانكتەردە 2022 -جىلعى 12 -ناۋرىزداعى جاعداي بويىنشا شامامەن 15,3 تريلليون تەڭگە نەمەسە اكتيۆتەردىڭ %40 قۇرايتىن وتىمدىلىگى جوعارى اكتيۆتەردىڭ ءبىرشاما قورى بار. ەركىن وتىمدىلىكتىڭ بولۋى بانكتەرگە ءوز مىندەتتەمەلەرىنە ۋاقتىلى جانە تولىق كولەمدە قىزمەت كورسەتۋگە مۇمكىندىك بەرەدى.

بانكتەردىڭ وتىمدىلىك بويىنشا پرۋدەنتسيالىق نورماتيۆتەرى رەتتەۋشىنىڭ ەڭ تومەنگى تالاپتارىنان ءتورت ەسەدەن استام ارتىق. زاڭدا بەلگىلەنگەن شەكتە جەكە تۇلعالاردىڭ دەپوزيتتەرىنە مەملەكەت كەپىلدىك بەرەدى. اعىمداعى جىلعى قاڭتاردا حالىقتىڭ تەڭگەلىك جيناق دەپوزيتتەرى بويىنشا كەپىلدىك سوماسى 20 ميلليون تەڭگەگە دەيىن، سونداي- اق تۇرلەرى مەن ۆاليۋتا بويىنشا ءارتۇرلى دەپوزيتتەرگە كەپىلدىك بەرۋدىڭ ەڭ جوعارى جيىنتىق سوماسى «قازاقستاننىڭ دەپوزيتتەرگە كەپىلدىك بەرۋ قورى» ا ق تاراپىنان ۇلعايتىلدى.

بۇدان باسقا، باعانىڭ ءوسۋىن تەجەۋ ماقساتىندا ۇكىمەت ينفلياتسيانى باقىلاۋ جانە تومەندەتۋ بويىنشا شارالار كەشەنىن ىسكە اسىرۋدا.

«ول ءونىم ءوندىرۋ كولەمىن ۇلعايتۋعا، ساقتاۋ مەن لوگيستيكاعا، بولشەك ساۋداعا، باعا بەلگىلەۋدى باقىلاۋعا، مونوپولياعا قارسى جانە سىرتقى ساۋدانى رەتتەۋگە باعىتتالعان جەدەل جانە ورتا مەرزىمدى سيپاتتاعى ءىس- شارالاردان تۇرادى. جالپى، ۇكىمەت، ۇلتتىق بانك جانە قارجى نارىعىن رەتتەۋ جانە دامىتۋ اگەنتتىگى جاعدايدى باقىلاۋدا ۇستاۋدا. بۇل ءۇشىن كۇن سايىن داعدارىسقا قارسى شارالار جونىندەگى جەدەل شتاب وتىرىستارى وتكىزىلەدى. ونىڭ شەڭبەرىندە ەكونوميكالىق جاعدايدىڭ دامۋىنىڭ ءارتۇرلى سەناريلەرى بويىنشا شەشىمدەر پىسىقتالادى»، - دەپ جازىلعان حابارلامادا.

ق ر ۇكىمەتى حالىقتى ۇرەيلەنبەۋگە جانە رەسمي اقپارات كوزدەرىنە عانا سەنۋگە شاقىردى. ارانداتۋشىلىق سيپاتتاعى انىق ەمەس جانە جالعان اقپارات تاراتقانى ءۇشىن قازاقستان رەسپۋبليكاسىنىڭ زاڭدارىنا سايكەس جاۋاپكەرشىلىك كوزدەلگەنىن اتاپ ءوتتى.