بۇگىن - كورىسۋ كۇنى

نۇر- سۇلتان. قازاقپارات - بۇگىن قازاقستاننىڭ بىرنەشە ءوڭىرى كورىسۋ كۇنىن اتاپ وتەدى، دەپ حابارلايدى قازاقپارات ءتىلشىسى.

نەگىزىنەن ەلىمىزدىڭ باتىس بولىگىندە اتاپ وتىلەتىن كورىسۋ كۇنى كەيىنگى جىلدارى اقپاراتتىق ناسيحاتتىڭ اسەرىنەن اۋقىمىن كەڭەيتىپ كەلەدى. مادەنيەت تانۋشىلار مەن ەتنوگرافتاردىڭ ايتۋىنشا، بۇل كۇن نەگىزى باتىس قازاقستان، اتىراۋ وبلىستارىندا جانە اقتوبەنىڭ كەيبىر اۋداندارىندا، رەسەيدىڭ كورشىلەس استراحان، ساراتوۆ، ورىنبور وڭىرلەرىندە، قاراقالپاقستاندا اتالىپ وتەدى. ال ماڭعىستاۋ ءوڭىرىنىڭ جۇرتى ونى امال مەرەكەسى دەپ تە اتايدى.

ۇلىستىڭ ۇلى كۇنى ناۋرىز مەرەكەسىنىڭ اۋقىمىن كەڭەيتۋ ءۇشىن ءتول جاڭا جىلدى كۇن مەن ءتۇن تەڭەلەردەن 10 كۇن بۇرىن باستاۋ ادەتكە اينالىپ كەلەدى. ون كۇندىك دۋماندى مازمۇندى ەتۋ اياسىندا كورىسۋ كۇنى رەسمي شارالاردىڭ قاتارىنا قوسىلىپ، بۇگىندە بۇكل قازاق بىلەتىن ايتۋلى كۇنگە اينالىپ وتىر. اتى ايتىپ تۇرعانداي، بۇل كۇن كوشپەلى حالىقتىڭ قىستان امان شىققاندا ءبىر- ءبىرىنىڭ اماندىعىن سۇراپ، ءجۇز كورىسەتىن كۇنى بولسا كەرەك. سول ەسكى ادەتپەن قازىر دە كورىسۋ سالتىنىڭ يشاراتتارى جاڭعىرا باستادى. ءتىپتى كەي وڭىرلەردە بۇل كۇندى تويلاۋ عۇرىپتارى جاراپازان ايتىپ ەسكە سالادى.

ءۇي- ءۇيدى قىدىرىپ جۇرگەندە كىشكەنتاي بالالارعا انالارى شاعىن دوربا ۇستاتىپ قويادى. بالا قاي ۇيگە كورىسۋگە كىرسە، سول ءۇيدىڭ داستارحانىنان اۋىز ءتيىپ، باۋىرساق، تاتتىلەردەن سالىپ الادى. بۇل جورالعى جىل بويى بالالارىمىز توق ءجۇرسىن، داستارحانىمىز ارالاس بولسىن، قارىم- قاتىناسىمىزعا سىزات تۇسپەسىن دەگەن نيەتتەن تۋعان دەپ تۇسىندىرىلەدى. ءبىر ەرەكشەلىگى - كورىسۋ ءبىر كۇنمەن شەكتەلەتىن مەرەكە ەمەس، ول ناۋرىزدىڭ 14 ىنەن باستالىپ، ايدىڭ سوڭىنا دەيىن جالعاسا بەرەدى.