الماتىدا بايشەشەك گۇلدەپ جاتىر

الماتى. قازاقپارات - الماتى ماڭى مەن تاۋ بوكتەرىندە بايشەشەك گۇلدەپ جاتىر. قازاقپارات فوتوتىلشىسى كوكتەم گۇلىن سۋرەتكە ءتۇسىردى.

بايشەشەكتىڭ لاتىنشا اتاۋى «گالانتۋس». ول گرەكتىڭ «گالا» - ءسۇت جانە «انتۋس» - گۇل دەگەن سوزىنەن شىققان، ياعني قازاقشا ءسۇت تامشىسى دەگەن ماعىنا بەرەدى. بايشەشەكتىڭ اپپاق قاۋىزى شىن مانىندە دە، قاتىپ قالعان ءسۇت تامشىسىنا ۇقسايدى.

بايشەشەكتىڭ كوكتەمدە شىعاتىنىنا قاراماستان، ول 10 گرادۋس ايازعا دا توزە الادى. وعان مۇنداي ايازعا توتەپ بەرۋىنە نەگىزى ساباعىنداعى جۇقا تۇكتەردەن تۇراتىن وزىنە ءتان قابىعى كومەكتەسەدى. تابيعاتتا بايشەشەكتىڭ 18-20 ءتۇرى بار. قازاقستاننىڭ قىزىل كىتابىنا ەنگىزىلگەن بايشەشەك، ونى الاتاۋ جاۋقازىنى دەپ تە اتايدى.

قازاقستان ۇلتتىق ەنتسيكلوپەدياسىنىڭ 2- تومىنداعى مالىمەتكە سايكەس، بايشەشەك - قۇرتقاشاشتار تۇقىمداسىنا جاتاتىن كوپ جىلدىق تامىر تۇينەكتى وسىمدىك. قازاقستاندا ىلە، جەتىسۋ (جوڭعار)، كۇنگەي الاتاۋلارىندا، كەتپەن جوتاسىندا، قاراتاۋدا وسەدى. بايشەشەكتىڭ الاتاۋ بايشەشەگى جانە كورولكوۆ بايشەشەگى دەگەن تۇرلەرى بار. بيىكتىگى - 10-30 س م. تامىر تۇينەكتەرى ۇزىنشا نەمەسە شار ءتارىزدى دومالاق بولادى. شوعىرلانىپ بىتكەن تاسپا جاپىراقتارىنىڭ سانى 6-9، ۇزىندىعى - 10-12 س م. بۇل گۇلدەردى جۇلۋعا بولمايدى.