قانداسىمىز توعىزقۇمالاق فەدەراتسياسىنىڭ پرەزيدەنتى بولدى - شەتەلدەگى قازاق باسپا سوزىنە شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

مىرزا ۇلىقبەك پاتشالىعى تۇسىندا سوعىلعان مىس تەڭگەلەر تابىلدى - «ءو ز ا»

2022-جىلدىڭ 2- ناۋرىزىندا سۇرحانداريا وبلىسىنىڭ «ساريوسيە» اۋدانىنان وتەتىن توپالانگ وزەنىنىڭ جاعاسىنان جەرگىلىكتى تۇرعىندار مىس تەڭگەلەردى تاپقان، دەپ جازادى «ءو ز ا» مەملەكەتتىك اقپارات اگەنتتىگى.

اتالعان ب ا ق- تىڭ مالىمەتىنە سۇيەنسەك، 3- ناۋرىزدا وزبەكستاننىڭ مادەني مۇرا اگەنتتىگى، مەملەكەتتىك ونەر مۇراجايى، تەرمەز ارحەولوگيالىق مۇراجايىنىڭ وكىلدەرى تاراپىنان جەرگىلىكتى تۇرعىنداردان 512 مىس تەڭگەنى قابىلداپ الىپ، تەرمەز قالاسىنداعى ارحەولوگيالىق مۇراجاي قورىنا تاپسىرعان.

وزبەكستاننىڭ پروكۋراتۋرا ورگاندارى سالا وكىلدەرىمەن بىرلەسىپ جۇرگىزگەن زەرتتەۋ بارىسىندا ءوز ەركىمەن قوسىمشا 620 مىس مونەتا مەن 1 دانا شاحمات فيگۋراسى الىنىپ، مۇراجاي قورىنا وتكىزىلگەن. سونىمەن قاتار، وبلىستىق پروكۋراتۋرا، مادەني مۇرا باسقارماسى جانە ارحەولوگيا مۇراجايى قىزمەتكەرلەرىنەن قۇرالعان ارنايى ەكسپەديتسيا ۇيىمداستىرىلىپ، قازبا جۇمىستارىن جۇرگىزۋ بارىسىندا ەكسپەديتسيا وكىلدەرى تاعى دا مىس تەڭگەلەر تاپقان.

«ارحەولوگتاردىڭ الدىن الا قورىتىندىلارى بويىنشا بۇل جادىگەرلەر مىرزا ۇلىقبەك پاتشالىعى تۇسىندا (XV ع.) سوعىلعان، بۇگىنگى كۇنگە دەيىن تابىلعان ەڭ ءىرى جانە ەڭ جاقسى ساقتالعان مادەني مۇرا قازىناسى بولىپ تابىلادى»، دەپ جازادى «ءو ز ا» مەملەكەتتىك اقپارات اگەنتتىگى.

ۇلانباتىر قالاسىندا «بۇركىتشىلەر فەستيۆالى» وتۋدە - Kaznews

موڭعوليا-كۋۆەيت قورشاعان ورتانى قورعاۋ ورتالىعى مەملەكەتتىك حازىناداعى كاسىپورىنعا قاراستى اۋماقتا «بۇركىتشىلەر فەستيۆالى-2022» وتۋدە. ءىس-شاراعا بايان-ولگەي ايماعىنان 10 بۇركىتشى، ءتوۆ ايماعىنان 1 بۇركىتشى قاتىسۋدا، دەپ حابارلايدى Kaznews اقپارات پورتالى.

موڭعوليالىق ب ا ق- تىڭ كەلتىرگەن دەرەگىنە سۇيەنسەك، فەستيۆالدىڭ اشىلۋ راسىمىنە موڭعوليانىڭ پارلامەنت دەپۋتاتى، بايان-ولگەي ايماعىنىڭ جەرلەستەر كەڭەسىنىڭ ءتوراعاسى اۋباكىر تىلەۋحان ۇلى، تابيعات، قورشاعان ورتا جانە تۋريزم مينيسترلىگىنىڭ مەملەكەتتىك حاتشىسى ە. باتتۋلگا، پارلامەنت دەپۋتاتى گ. ءامارتۇۆشين، ح. گانحۋياگ، تس. اناندبازار، ەنەرگەتيكانى رەتتەۋ كوميتەتىنىڭ ءتوراعاسى تىلەيحان المالىك ۇلى قاتارلى لاۋازىم وكىلدەرى قاتىستى.

گەرمانيا، تۇركيا، كۋۆەيت، فرانسيا، رەسەي، پولشا، كورەيا رەسپۋبليكاسى، ا ق ش، جاپونيا، قازاقستان جانە ءۇندىستاننىڭ موڭعولياداعى ەلشىلەرى مەن دەلەگاتسيالارى بۇركىتشىلەر مەرەكەسىن ارنايى تاماشالاۋدا.

ايتا كەتەيىك، «بۇركىتشىلەر فەستيۆالى» بايان- ولگەي ايماعىندا 1999-جىلدان، ۇلانباتىر قالاسىندا 2010 -جىلدان باستاپ ۇيىمداستىرىلىپ كەلەدى. «بايان- ولگەي ايماعىنان ش. جەكەن (نوگووننۋۋر)، وركەن، ب. كەنجەبەك (تولبو)، ب. دالايحان (التاي)، س. باشاحان، ى. باعلان (ۋلاانحۋس)، ر. نۋرگايۆ (التانتسوگتس)، س. تىلەۋبەردى (دەلۇۇن)، ج. حايرىم (ولگي)، ر. جەڭىسبەك (ساگساي)، ءتوۆ ايماعىنان ە. باتبيلەگ قاتارلى بۇركىتشىلەر قاتىسىپ جاتىر»، دەپ جازادى Kaznews.

دۇنيەنىڭ جوتاسىنداعى ەڭ كونە ۇلى قىتاي قورعانى - «حالىق گازەتى»

قىتايدىڭ شينحاي ولكەسىندەگى مين پاتشالىعى سالعان ۇلى قىتاي قورعانى مين اۋلەتى ءداۋىرىنىڭ ورتا مەزگىلىندە سالىنعان. ونىڭ جالپى ۇزىندىعى شامامەن 363 شاقىرىم بولعان قۇرىلىس ولكەنىڭ 12 اۋدانى مەن ايماعىنا تارالعان، دەپ حابارلايدى قىتايدىڭ «حالىق گازەتى».

مين داۋىرىندەگى اسكەري قورعانىس ءۇشىن سالىنعان بۇل ۇلى قىتاي قورعانى الەمدەگى ەڭ كونە تاريحي قۇرىلىس ەكەن.

«شينحاي ولكەسىنە تيەسىلى مين ۇلى قىتاي قورعانى ماڭىزدى تاريحي، مادەني، عىلىمي زەرتتەۋ، كورمەلىك جانە پايدالانۋ قۇندىلىقتارىنا يە. مين اۋلەتى كەزىندە سالىنعان بۇل ۇلى قىتاي قورعانى الەمدەگى تەڭىز دەڭگەيىنەن ەڭ بيىك ءھام كونە تاريحي نىسان بولىپ تابالادى»، دەپ جازادى قىتايدىڭ «حالىق گازەتى» اقپارات پورتالى.

موڭعوليالىق قانداسىمىز توعىزقۇمالاق فەدەراتسياسىنىڭ پرەزيدەنتى بولىپ سايلاندى - Kaznews

موڭعوليا توعىزقۇمالاق فەدەراتسياسىنىڭ باسشىلىق قۇرامىنا وزگەرىستەر ەندى. فەدەراتسيا پرەزيدەنتى بولىپ كاسىپكەر نۇربەك جىرعاۋ ۇلى تاعايىندالدى، دەپ حابارلايدى Kaznews اقپارات اگەنتتىگى.

موڭعوليالىق ب ا ق- تىڭ كەلتىرگەن مالىمەتىنە سۇيەنسەك، بايان-ولگەي ايماعىنىڭ ورتالىق كىتاپحاناسىندا فەدەراتسيا پرەزيدەنتىن تاعايىنداۋ راسىمىنە وراي توعىزقۇمالاقتان سايىس ءوتىپ، جەڭىمپازدار ماراپاتتالعان.

سايىستا 80 گە جۋىق سپورتشى باق سىنادى. جيىندا فەدەراتسيامەن ورتالىق كىتاپحانا اراسىنداعى ىنتىماقتاستىق، توعىزقۇمالاقتان ەل چەمپيوناتىن وتكىزۋ جانە دە تاعى باسقا ماسەلەلەر قارالدى.

ايتا كەتەيىك، موڭعوليادا 2022-جىلى 37 سپورت تۇرىنەن ەل بىرىنشىلىگى وتەدى دەپ بەلگىلەنگەن.

ولاردىڭ اراسىندا قازاقتىڭ ۇلتتىق ينتەللەكتۋالدىق ويىنى توعىزقۇمالاق بار. 2022-جىلى شىلدە ايىنىڭ 7- كۇنى توعىزقۇمالاق ويىنىنان ەل بىرىنشىلىگى بايان-ولگەي ايماعىندا وتپەك.

ەستەرىڭىزگە سالساق، 2018-جىلى بايان-ولگەي ايماعىندا توعىزقۇمالاق ويىنىنان ازيا چەمپيوناتى وتكەن بولاتىن.

قازاقستان مەن ەۋرازيالىق وداق اراسىندا تاۋار اينالىمى ارتتى - Parstoday

قازاقستاننىڭ ەۋرازيالىق ەكونوميكالىق وداقپەن تاۋار اينالىمى 2020-جىلمەن سالىستىرعاندا 2021-جىلى 28 پايىزعا ارتىپ، 26 ميلليارد دوللاردان استى، دەپ حابارلايدى Parstoday اقپارات اگەنتتىگى.

اتالعان ب ا ق- تىڭ مالىمەتىنشە، قازاقستاننىڭ ەۋرازيالىق ەكونوميكالىق وداقپەن ساۋدا كولەمىنىڭ بارلىعى دەرلىك تەك رەسەيگە تيەسىلى.

«قازاقستان مەن رەسەيدىڭ تاۋار اينالىمى وتكەن جىلى 1,29 پايىزعا ءوسىپ، 2,24 ميلليارد دوللاردى قۇرادى. ا ق ش پەن ەۋروپانىڭ رەسەي مەن بەلارۋسكە قارسى سانكتسيالارىنان كەيىن بيىل ەۋرازيالىق ەكونوميكالىق وداق ەلدەرىنەن تاۋار اعىنى ايتارلىقتاي ارتۋى مۇمكىن»، دەپ جازدى يراندىق ب ا ق.

اۆتور: بەيسەن سۇلتان