قىتايدا كوروناۆيرۋس ءورشىدى، مەكتەپتەر جابىلىپ، اۆتوبۋستار توقتادى

بەيجىڭ. قازاقپارات - ءۇشىنشى كۇن قاتارىنان قىتايدا كوروناۆيرۋس جۇقتىرعاندار سانى كۇرت ارتۋدا، دەپ حابارلايدى قازاقپارات مەنشىكتى ءتىلشىسى.

سوڭعى كۇندەرى قىتايدا ۆيرۋس جۇقتىرۋدىڭ جەرگىلىكتى جاعدايلارى كۇرت ارتتى، ولاردىڭ باسىم بولىگى - سيمپتومسىز.

جەرگىلىكتى ب ا ق مالىمەتىنشە، ەلدە ۆيرۋستى جۇقتىرۋدىڭ تاۋلىكتىك جاعدايلارى 2020-جىلدىڭ باسىندا تىركەلگەن كورسەتكىشتەن اسادى. COVID-19 جۇقتىرۋ وشاقتارى كەم دەگەندە 17 پروۆينتسيا، اۆتونوميالىق اۋدان مەن ورتالىققا باعىناتىن قالادا ورنالاسقان. ولاردىڭ قاتارىندا بەيجىڭ، شانحاي جانە گۋانجوۋ مەگاپوليستەرى بار.

9 ميلليون تۇرعىنى بار چانچۋن قالاسىندا (تسزيلين سولتۇستىك-شىعىس پروۆينتسياسىنىڭ اكىمشىلىك ورتالىعى) تولىق وقشاۋلاۋ رەجيمى ەنگىزىلدى. بارلىق ءبىلىم بەرۋ مەكەمەلەرى، ساۋدا ورىندارى (سۋپەرماركەتتەردىڭ شەكتەۋلى سانى مەن ءدارىحانالار جۇمىسىن جالعاستىرادى) مەن قوعامدىق تاماقتانۋ ورىندارى جابىلىپ، قالالىق قوعامدىق كولىك جۇمىسى تولىعىمەن توقتادى.

جاپپاي كوروناۆيرۋسقا تەست تاپسىرۋدىڭ ەكىنشى كەزەڭى باستالدى. قىتايدىڭ دەنساۋلىق ساقتاۋ ىستەرى جونىندەگى مەملەكەتتىك كوميتەتتىڭ دەرەكتەرىنە ساي، وتكەن تاۋلىكتە قىتايدا كوروناۆيرۋس جۇقتىرۋدىڭ 476 جاعدايى، 1048 سيمپتومسىز جاعداي تىركەلگەن.