گەرمانيا جۇرتى ۋكراينا بوسقىندارىن ءوز ۇيىندە تەگىن تۇرعىزۋعا دايىن
ولار نەگىزىنەن پولشا، چەحيا، رۋمىنيا مەن گەرمانياعا بەت العان. نەمىس بيلىگى مۇقتاج جانداردى ازىق- تۇلىك جانە باسپانامەن قامتۋدىڭ قامىنا كىرىستى. قاراپايىم تۇرعىندار دا تىس قالعان جوق. كوبى بوسقىنداردى ءوز ۇيلەرىندە تەگىن ورنالاستىرۋعا دايىن.
كۇن سايىن بەرلينگە ۋكراينادان 10 مىڭنان اسا بوسقىن كەلىپ جاتىر. تۇگەلى ايەل، بالا مەن ەگدە جاستاعى كىسىلەر. گەرمانيا ولاردى جەڭىلدەتىلگەن جۇيە بويىنشا قابىلداپ وتىر. ياعني بارلىعى باسپانا مەن مەديتسينالىق ساقتاندىرۋمەن قامتىلادى. ال كەيىن جۇمىس ىستەۋگە دە مۇمكىندىك الادى.
ولگا، بوسقىن:
- وسىدان 11 كۇن بۇرىن جولعا شىقتىق. ءتورت كۇن ۋكراينا اۋماعىمەن ءجۇرىپ ۆارشاۆاعا جەتتىك. وندا 7 كۇن تۇردىق. ەندى ءۇش بالامەن گەرمانياعا كەلدىك. ءبىز تاڭقالدىق. الدىمەن پولياكتار، ال ەندى وسىندا ءبىزدى قۇشاق جايىپ قارسى الدى. جالعىز قالدىرمايدى. اداسىپ قالامىز با دەپ، قايدان كومەك سۇراۋىن ويلادىق. ءار ادام ءبىزدى ەرتىپ، قالاعان جەرىمىزگە جەتكىزىپ، قاجەت زاتتارمەن قامتيدى. قازىر بىزدە ءبارى بار، كەرەگى جوق دەيتىن بولدىم. وعان قاراماستان بەرە بەرەدى. العىسىمىز شەكسىز.
وسى كۇندەرى گەرمانياعا ۋكراينادان 80 مىڭنان اسا بوسقىن بارعان. سانى كوپ بولعاندىقتان نەمىس بيلىگى قوسىمشا پويىز جىبەرگەن. بوسقىنداردىڭ كوبى ۇيلەرىنەن تۇك الماي شىققان. ال بەرليننىڭ ورتالىق ۆوكزالىندا ولارعا قاجەتتىنىڭ ءبارى بار. تاماعى مەن ءدارى- دارمەكتەن باستاپ جىلى كيىمگە دەيىن دايىن.
بەرلين قالاسىنىڭ بالالارى ۋكراينالىق قۇرداستارىنا ءوز ويىنشىقتارىن تابىستاپ جاتىر. كوپتەگەن ورتالىق لىق تولعان. قاراپايىم حالىق تا كومەگىن ۇسىنىپ وتىر. ۆوكزالدا جينالعان جۇزدەگەن ادامدى ءوز ۇيلەرىندە تەگىن ورنالاستىرۋعا دايىن.
مارگوت، بەرلين تۇرعىنى:
- ەكىنشى دۇنيەجۇزىلىك سوعىس كەزىندە انام دا باس ساۋعالاپ، ونى مەيىرىمدى ادامدار قابىلداعان ەدى. ەندى مەن دە سوعىستان قاشقان ادامدارعا كومەكتەسكىم كەلەدى. بوس پاتەرىم بار، وندا شاعىن وتباسى جايعاسا الادى. بالاسى بار ايەلگە كومەكتەسكىم كەلەدى. سونداي- اق ءتىل مەڭگەرۋگە كومەكتەسە الامىن. زەينەتكە دەيىن فرانسۋز جانە اعىلشىن ءتىلىنىڭ مۇعالىمى بولعانمىن.
كەيبىر بوسقىندار ءۇشىن بەرلين ەكىنشى ۇيىنىە اينالادى. ال ءارى قاراي بارعىسى كەلەتىندەرگە بارلىق جول اشىق. كۇن سايىن قالادان پاريج، امستەردام جانە كوپەنگاگەنگە تەگىن اۆتوبۋس قاتىنايدى.
www.24.kz
