اسكەريلەردىڭ باسپانا ماسەلەسىن شەشۋگە باعىتتالعان زاڭ قابىلداندى
«پارلامەنت ءماجىلىسى اتالعان زاڭ جوباسىن 2021 -جىلدىڭ 29-جەلتوقسانىندا ماقۇلداعان بولاتىن. بيىلعى 3-ناۋرىزدا سەنات جالپى وتىرىس وتكىزىپ، سەنتورلار وسى زاڭ جوباسىنا كەلەسى ەكى وزگەرىستى ەنگىزدى: ءبىرىنشى - اسكەري قىزمەتشىلەردىڭ قارۋ قولدانۋىن بەلگىلەيتىن «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭنىڭ 6-بابى 2-تارماعىنىڭ قولدانىستاعى رەداكسياسىنىڭ ساقتالۋىن، ەكىنشى - زاڭ جوباسىنا ءماجىلىس تاراپىنان جاڭادان كىرگىزگەن 6,1-بابىنىڭ اسكەري قىزمەتشىلەردىڭ دەنە كۇشىن، جاۋىنگەرلىك كۇرەس تاسىلدەرىن، ارنايى قۇرالدار مەن قارۋدى قولداناتىنىن بەلگىلەيتىن «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭ جوباسىنان الىنىپ تاستالۋىن. بۇل وزگەرىستەر اسكەري قىزمەتشىلەردىڭ قۇقىقتارىن رەتتەۋ ماسەلەلەرىندە كەشەندى تۇرعىدا كەلۋدە قامتاماسىز ەتۋ قاجەتتىگىنە بايلانىستى. سەنات ەنگىزگەن تۇزەتۋلەر ءماجىلىس ماقۇلداعان زاڭ جوباسىنىڭ تۇجىرىمداماسىن وزگەرتپەيدى»، - دەدى ءماجىلىس دەپۋتاتى ەرلىك تايجانوۆ.
وسى ورايدا ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتى زاڭ جوباسىنا سەنات ەنگىزگەن وزگەرىستەرمەن كەلىسۋدى ۇسىندى. قۇجاتتى قاراۋ كەزىندە پالاتا دەپۋتاتتارى بۇل ۇسىنىسقا قولداۋ ءبىلدىردى.
بۇدان بۇرىن حابارلانعانداي، وتكەن اپتادا سەنات دەپۋتاتتارى زاڭ جوباسىن تالقىلاۋ بارىسىندا اسكەري قىزمەتشىلەردىڭ قۇقىقتارىن رەتتەۋ ماسەلەلەرىندە كەشەندى كوزقاراستى قامتاماسىز ەتۋ قاجەتتىلىگىنە بايلانىستى، «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭنىڭ 6-بابى 2-تارماعىنىڭ قولدانىستاعى رەداكسياسىن ساقتاۋ بولىگىندە وزگەرىستەر ەنگىزۋ قاجەتتىلىگى تۋىندادى. وسى ورايدا قۇجاتتى تالقىلاۋدان كەيىن، سەنات ەنگىزگەن تۇزەتۋمەن زاڭ جوباسى ماجىلىسكە قايتارىلدى.
