عالىمدار ۇزاق ءومىر ءسۇرۋ ءۇشىن كۇندە قانشا قادام جاياۋ ءجۇرۋ كەرەك ەكەنىن ەسەپتەدى

نۇر-سۇلتان. قازاقپارات - ا ق ش- تىڭ ماسساچۋسەتس ۋنيۆەرسيتەتىنىڭ عالىمدارى ۇزاق ءومىر ءسۇرۋ ءۇشىن كۇندە قانشا جاياۋ ءجۇرۋ كەرەك ەكەنىن ەسەپتەدى.

ساراپشىلار ءارتۇرلى ەلدەردەن كەلگەن 18 جانە ودان جوعارى جاستاعى 50000 ادامنىڭ دەرەكتەرىنە تالداۋ جاسادى. قاتىسۋشىلار ءتورت توپقا ءبولىندى: ءبىرىنشى توپ كۇنىنە 3,5 مىڭ قادام ءجۇردى، ەكىنشى توپ - 5,8 مىڭ، ءۇشىنشى توپ - 7,8 مىڭ، ءتورتىنشى توپ - 10,9 مىڭ قادام جاياۋ ءجۇردى. زەرتتەۋ ناتيجەلەرى Lancet Public Health جۋرنالىندا جاريالاندى.

ساراپشىلار كوپ جاياۋ جۇرگەن ءۇش توپتا بەلسەندىلىگى تومەن توپقا قاراعاندا ءولىم قاۋپى 40-53 پايىزعا تومەن ەكەنىن انىقتادى.

عالىمدار سونداي-اق 60 جاستان اسقان ادامدار ءولىم قاۋپى بىرتە-بىرتە ازايۋى ءۇشىن كۇنىنە 6-8 مىڭ قادام ءجۇرۋى كەرەك ەكەنىن انىقتادى. 60 جاسقا تولماعان ادامدارعا دەنساۋلىق پەن فيتنەستى ساقتاۋ ءۇشىن 8-12 مىڭ قادام ءجۇرۋ ۇسىنىلادى. سونىمەن قاتار، زەرتتەۋشىلەر جاياۋ ءجۇرۋدىڭ قارقىندىلىعى ماڭىزدى ەمەس ەكەنىن اتاپ ءوتتى.

بۇعان دەيىن ماسساچۋسەتس تەحنولوگيالىق ينستيتۋتىنىڭ (MIT) عالىمدارى ءارتۇرلى ەمدەۋ ادىستەرىمەن ناۋقاستىڭ اۋرۋىنىڭ اعىمىن بولجايتىن G- Net نەيروندىق جەلىسىن جاساعان بولاتىن.

massaget.kz