شەتەلدە قازاق حالقىنىڭ تاريحى مەن مادەنيەتىن ناسيحاتتاپ جۇرگەن شىڭگىل مۇراجايى - شەتەلدەگى قازاق باسپا ءسوزى

نۇر- سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاق حالقىنىڭ تاريحى مەن مادەنيەتىن ناسيحاتتاپ جۇرگەن شىڭگىل مۇراجايى - «اعاجاي- التاي اقپارات» سايتى

قىتايدىڭ التاي ايماعىنا قاراستى شىڭگىل اۋدانىنداعى مۇراجاي كەشەنىن تاماشالاۋعا كەلگەن قوناقتار جەرگىلىكتى جەردىڭ سالت- داستۇرىمەن، زاتتىق جانە رۋحاني قۇندىلىقتارىمەن تانىسىپ ەرەكشە اسەر الىپ ءجۇر، دەپ جازادى kazakh.altxw.com سايتى.

«شىڭگىل اۋدانىنىڭ جاڭا مۇراجايى 2012 -جىلى سالىنعان. مۋزەي كەشەنى 3400 شارشى مەتر جەردى الىپ جاتىر، كورمەنىڭ جالپى كولەمى 2200 شارشى مەتر. مۇراجاي عيماراتىنىڭ ساۋلەتتىك ديزاينىنا جەرگىلىكتى قازاق ۇلتىنىڭ مادەني قۇندىلىقتارى پايدالانىلعان. مۇراجاي ەكى قاباتقا ورىنالاستىرىلعان. وندا گۋمانيتارلىق عىلىمدار جانە تاريح زالى، تابيعي ەكولوگيا زالى جانە ۇلتتىق ەتنوگرافيا زالى، فولكلور زالى، مەتەوريتتانۋ زالى، دامۋ جەتىستىكتەرى زالى سەكىلدى كورمە ورتالىقتارى بار. مۇراجايعا تاريحي مادەني مۇرالار، ۇلتتىق سالت- سانا بۇيىمدارى سياقتى 2800-دەن استام ءتۇرلى ماتەريالدىق جانە مادەني ەكسپوناتتار قويىلعان. بۇل جادىگەرلەر شىڭگىل اۋدانىنىڭ تاريحى مەن مادەنيەتىن جانە دامۋ بارىسىن جان- جاقتى، جۇيەلى تۇردە كورسەتىپ بەرەدى»، - دەپ جازادى «اعاجاي- التاي» سايتى.

ايتا كەتەيىك، قىتايدىڭ ىلە قازاق اۆتونوميالىق وبلىسىنىڭ التاي ايماعىنا قاراستى شىڭگىل اۋدانىنىڭ اتى ونىڭ اۋماعىندا اعىپ جاتقان ەكى شىڭگىل (ۇلكەن جانە كىشى شىڭگىل وزەندەرى) وزەنىنىڭ اتاۋىننان الىنعان. بۇل «شىڭگىل» ءسوزى ادەمى جانە ءمولدىر وزەن دەگەن ۇعىمداردى بىلدىرەدى.

ءور التايدىڭ شىڭگىل جەرى قازاق حالقىنىڭ اتا قونىسى. سونىڭ ىشىندەگى كەرەي رۋىنىڭ بايىرعى قونىستارىنىڭ ءبىرى. 13 - عاسىردىڭ باسىندا شىڭعىس حان جورىقتارى اسەرىنەن سىر بويىنا دەيىن بارىپ، قالعان بولىگى 1723 «اقتابان شۇبىرىندى، القاكول سۇلاما» جىلدارى اتامەكەنىننەن اۋعان ەل 1770 -جىلدارى ەر جانىبەك باتىردىڭ باستاۋىمەن ءوز مەكەندەرىنە قايتادان تۋ تىگە باستادى. قازىرگى ەۋروپا قازاقتارىن قۇراپ وتىرعان قانداستارىمىزدىڭ نەگىزگى بولىگى وسى ءور التايدىڭ شىڭگىل- كوكتوعاي وڭىرلەرىنىڭ تۋمالارى.

بايان- ولگەيدە الامان ايتىس ءوتتى - KAZNEWS

موڭعوليا مەملەكەتتىك ۇلى حۋرال دەپۋتاتى اۋباكىر تىلەۋحان ۇلىنىڭ باستاماسىمەن قۇرمانحان اتىنداعى مۋزىكالى دراما تەاترىندا «ەل ەسىندەگى ەسىمدەر» اتتى الامان ايتىس ءوتتى، دەپ حابارلايدى موڭعوليانىڭ Kaznews اقپاراتتىق پورتالى.

«بۇل الامان ايتىس ۇلىستىڭ ۇلى كۇنى «ناۋرىز» مەيرامىنا وراي جانە 2022 -جىلعى «ەلدىڭ ۇزدىك اقىنىن» انىقتاۋ ماقساتىندا وتكىزىلدى. سۋىرىپ سالما ايتىسكەرلەردەن 20 اقىن ءسوز دوداسىنا قاتىستى. ايتىس قورىتىندىسى بويىنشا ايدوس راشات ۇلى باس جۇلدەگە لايىق دەپ تانىلىپ، 3 ميلليون توگروگ جۇلدەگە يە بولدى. جۇلدە قورىنداعى 2 ميلليون توگروگ ءبىرىنشى ورىن زويا مۇراتبەك قىزىنا بۇيىردى. ەكىنشى ورىندى يەلەنگەن التاي سۇمىندىق اقىن ىڭكاربەك ءادىلحان ۇلى 1 ميلليون توگروگكە قول جەتكىزدى. ءۇشىنشى ورىن جەڭىمپازدارى امانجول قۋانتحان ۇلى مەن ەرگەن لەنحان ۇلى 500 مىڭ توگروگكە تاعايىندالعان جۇلدەنى قاناعات تۇتتى»، - دەپ جازدى Kaznews.

اتالعان ب ا ق- تىڭ جازۋىنشا، ايتىسقا موڭعولياعا «ەڭبەك سىڭىرگەن مادەنيەت قايراتكەرى» وسەرحان راحىم ۇلى، تاريحشى، قوعام قايراتكەرى قابساتور ومار ۇلى، «ءبىلىم» ينستيتۋتىنىڭ قازاق بالالارىنىڭ ءبىلىم سەكتورىنىڭ عىلىمي قىزمەتكەرى ءزۇلميرا جاۋباي قىزى جانە ايماقتىق قازاق راديوسى ديرەكتورىنىڭ ورىنباسارى، اقىن امانبەك قاناي ۇلى قازىلىق جاساعان.

م ۇ ح دەپۋتاتى اۋباكىر تىلەۋحان ۇلى 10 ميلليون توگروگ، قازاقستان رەسپۋبليكاسىنان كاسىپكەر كەنشىلىك امانتاي 500,0 تەڭگە قارجىلاي دەمەۋشىلىك كورسەتكەن.

ابدۋلازيز كاميلوۆ پەن مۇحتار تىلەۋبەردى كەزدەسۋ وتكىزدى - «ءوزا» اقپاراتتىق اگەنتتىگى

2022 -جىلعى 3 - ناۋرىزدا وزبەكستان رەسپۋبليكاسىنىڭ سىرتقى ىستەر ءمينيسترى ابدۋلازيز كاميلوۆ تاشكەنت قالاسىندا قازاقستان رەسپۋبليكاسى پرەمەر- ءمينيسترىنىڭ ورىنباسارى، سىرتقى ىستەر ءمينيسترى مۇحتار تىلەۋبەردىمەن كەزدەستى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«تاراپتار ساياسي، ساۋدا- ەكونوميكالىق، كولىك- ترانزيتتىك، گيدروەنەرگەتيكا، مادەني- گۋمانيتارلىق سالالارداعى وزبەكستان - قازاقستان وداقتاستىق قاتىناستارىنىڭ وزەكتى ماسەلەلەرىن تالقىلادى. كەزدەسۋدە جوعارى دەڭگەيدەگى كەزدەسۋلەر ناتيجەسىندە قول جەتكىزىلگەن ۋاعدالاستىقتاردى دەر كەزىندە جانە تولىق جۇزەگە اسىرۋ ماڭىزدى ەكەنى ايتىلدى. سونىمەن قاتار، ەكى ەل اراسىنداعى ديپلوماتيالىق قاتىناستىڭ 30 جىلدىعىن مەرەكەلەۋ شەڭبەرىندە (1992 -جىلعى 23 -قاراشا) وتەتىن ءىس- شارالاردىڭ كەستەسى قارالىپ، حالىقارالىق كۇن ءتارتىبى تۋرالى پىكىر الماسىلدى»، - دەپ جازادى «ءوزا» اقپارات اگەنتتىگى.

قانداسىمىز زەينەپ ءازىمباي قىزى بوكستان موڭعوليا چەمپيونى اتاندى - KAZNEWS

بۋلگان ايماعىندا وتكەن قىزدار اراسىندا بوكستان موڭعوليا چەمپيوناتى اياقتالدى، دەپ حابارلايدى موڭعوليانىڭ Kaznews اقپاراتتىق پورتالى.

«75 كەلى سالماقتا ونەر كورسەتكەن «الدار» سپورت كلۋبى، بايان- ولگەي ايماعىنىڭ سپورتشىسى قانداسىمىز زەينەپ ءازىمباي قىزى بارلىق قارسىلاستارىنان باسىم ءتۇسىپ، ەل چەمپيونى اتاندى»، - دەپ جازدى Kaznews.

ت ر ۆيتسە- پرەزيدەنتى فۋات وكتاي تۇركىستاندا- TRT

ت ر ۆيتسە- پرەزيدەنتى تۇركىستان ساپارى اياسىندا تۇركىستان وبلىسىنىڭ اكىمى ءومىرزاق ەستاي ۇلى شوكەيەۆ جانە قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتى وكىلەتتى كەڭەس ءتوراعاسى، پروفەسسور مۋحيتتين شيمشەكپەن كەزدەستى، دەپ حابارلايدى تۇركيا راديو تەلەۆيزيا پورتالى.

«قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ ستۋدەنتتەرىنە ءۇن قاتقان فۋات وكتايعا ۋنيۆەرسيتەت سەناتىنىڭ شەشىمىمەن ءبىلىم مەن عىلىمنىڭ دامۋىنا قوسقان ۇلەسى ءۇشىن «قۇرمەتتى پروفەسسور» اكادەميالىق اتاعى تابىس ەتىلدى. وكتاي: «سىزدەردىڭ ۋنيۆەرسيتەتتەرىڭىزدىڭ «قۇرمەتتى پروفەسسورى» اتاندىم. ۋنيۆەرسيتەت قالاشىعىنا اعاش وتىرعىزدىم. مەن دە بۇل ۋنيۆەرسيتەت ۇجىمىنىڭ ءبىر مۇشەسى بولدىم» - دەدى. ت ر ۆيتسە- پرەزيدەنتى وكتاي قاسيەتتى قوجا احمەت ياساۋي كەسەنەسىنە بارىپ، دۇعا وقىدى. سونداي- اق وكتاي قازاقستان تاريحىن باياندايتىن 8د «التىن سامۇرىق» تەاترىنا دا باردى»، - دەپ جازادى TRT.

قازاقستاننىڭ باس كونسۋلى سولتۇستىك حوراسان وبلىسىنىڭ كاسىپكەرلەرىن ەلگە ينۆەستيتسيا سالۋعا شاقىردى - فارس

قازاقستاننىڭ گورگانداعى باس كونسۋلى ەربول احمەتوۆ جەكسەنبى كۇنى بودجنۋرد قالاسىنداعى ساۋدا، كەن، ونەركاسىپ جانە اۋىل شارۋاشىلىعى پالاتاسىندا سولتۇستىك حوراسان وبلىسىنىڭ ينۆەستورلارىمەن كەزدەستى، دەپ حابارلايدى يراننىڭ Parstoday اقپارات اگەنتتىگى.

«قازاقستاننىڭ گۇلىستان وبلىسىنداعى باس كونسۋلى: «يراننىڭ سولتۇستىك- شىعىسىنداعى سولتۇستىك حوراسان وبلىسى كاسىپكەرلەرىنە قازاقستاندا جۇمىس ىستەۋگە جاقسى جاعداي جاسالعان. ءبىز حوراساندىق ينۆەستورلاردى قولدايمىز. ەكى ەلدىڭ حالقى ءبىر- ءبىرىنىڭ ەكونوميكالىق جانە مادەني- الەۋمەتتىك الەۋەتتەرىمەن تانىس. بۇل ءوزارا ەكونوميكالىق جانە مادەني بايلانىستاردىڭ دامۋىنا سەبەپ بولادى. الماتى قالاسى تۇرعىندار سانى جانە ەكونوميكالىق پوتەنسيالى تۇرعىسىنان ينۆەستيتسياعا قولايلى الەۋمەتتەرگە يە. سول سەبەپتى يراندىق ينۆەستورلاردى قولدايمىز»، - دەدى»، - دەپ جازادى Parstoday اقپارات اگەنتتىگى.

اۆتور: باقىتجول كاكەش