قاسىم- جومارت توقايەۆ «بايتەرەك» حولدينگىنىڭ باسشىسىن قابىلدادى

نۇر- سۇلتان. قازاقپارات - پرەزيدەنت قاسىم- جومارت توقايەۆ «بايتەرەك» حولدينگىنىڭ باسقارما ءتوراعاسى قانات شارلاپايەۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

قانات شارلاپايەۆتىڭ ايتۋىنشا، 2021 -جىلى 37 ءىرى جوباعا 533,2 ميلليارد تەڭگە كولەمىندە قولداۋ كورسەتىلگەن جانە 7 جوبا ىسكە قوسىلعان. 57,4 مىڭ شاعىن جانە ورتا بيزنەس سۋبەكتىسىنە 2,2 تريلليون تەڭگە كولەمىندە قارجىلاي كومەك بەرىلگەن. سونىمەن قاتار وتاندىق تاۋار ەكسپورتتاۋشىلاردى قولداۋ ءۇشىن 236,8 ميلليارد تەڭگە بولىنگەن.

پرەزيدەنتكە ۇسىنىلعان مالىمەتتەرگە سايكەس اگروونەركاسىپ كەشەنىن دامىتۋ باعدارلاماسى اياسىندا جالپى قۇنى 464,2 ميلليارد تەڭگە بولاتىن 26 مىڭنان استام قارىز بەرىلگەن.

قاسىم- جومارت توقايەۆقا 2021 -جىلى 130 مىڭعا جۋىق وتباسىنىڭ باسپانا ساتىپ العانى نەمەسە تۇرعىن ءۇي جاعدايلارىن جاقسارتقانى جونىندە باياندالدى. سونىمەن قاتار بيىلعى 1 - قاڭتارداعى مالىمەت بويىنشا 458 مىڭ سالىمشى 1,97 تريلليون تەڭگەدەن استام قارجى كولەمىندە ءبىرجولعى زەينەتاقى تولەمدەرىن پايدالانعان.

قانات شارلاپايەۆ مەملەكەت باسشىسىنىڭ «قازاقستان دامۋ بانكى» اكسيونەرلىك قوعامىن رەفورمالاۋ جانە ونىڭ مەنەدجمەنت قۇرامىن وزگەرتۋ جونىندە بەرگەن تاپسىرمالارىنىڭ جۇزەگە اسىرىلۋى تۋرالى ەگجەي- تەگجەيلى باياندادى.

بۇدان بولەك قاسىم- جومارت توقايەۆقا ميكرو جانە شاعىن كاسىپكەرلىكتى دامىتۋ، حالىقتىڭ الەۋمەتتىك جاعدايى تومەن توپتارى ءۇشىن پاتەر جالداۋ اقىسىنىڭ ءبىر بولىگىن سۋبسيديالاۋ تەتىگىن ەنگىزۋ جونىندەگى حولدينگتىڭ بيىلعى جىلعا ارنالعان جوسپارى تۋرالى مالىمەت بەرىلدى. كەزدەسۋ بارىسىندا جۇمىس ورىندارىن اشۋعا باعىتتالعان مەملەكەتتىك قولداۋ شارالارىن كەڭەيتۋ ماسەلەسى دە تالقىلاندى.