بەرليندە وقۋشىلار ۋكرايناداعى سوعىستى توقتاتۋدى تالاپ ەتتى
نارازىلىق شاراسىنا 5 مىڭ ادام جينالعان. دەنى - وقۋشىلار. ولاردى وسى اكسياعا قاتىسۋ ءۇشىن ءتىپتى ساباقتان بوساتقان. وقۋشىلارعا ستۋدەنتتەر، قوعامدىق ۇيىم وكىلدەرى مەن قالا تۇرعىندارى قولداۋ كورسەتتى.
ەرەۋىلشىلەردىڭ كوبى قولىنا ۋكراينا تۋى مەن ارنايى پلاكاتتار ۇستاپ العان. شەرۋگە شىققانداردىڭ اراسىندا جاقىن- جۋىعى وق استىندا قالعان ۋكراينالىقتار دا بار.
بۋندەستاگ الدىنا جينالعاندار ساياساتكەرلەرگە ۋكرايناداعى جاعدايعا ارالاسۋ جانە رەسەيدىڭ مۇناي- گاز كومپانيالارىمەن بىرگە جۇمىس ىستەۋدەن باس تارتۋ تۋرالى شارت قويدى. جالپى بەيبىتشىلىكتى قولداعان مۇنداي شارالار گەرمانيانىڭ 40 قالاسىندا ءوتىپ، ولارعا 170 مىڭ ادام قاتىسقان.
يۋليان، وقۋشى:
- ۋكراينادا سۇمدىق بولىپ جاتىر. قازىر وندا قانشاما ادام قىرىلۋدا. ويلاۋدىڭ ءوزى قورقىنىشتى. ۋكراينالىقتاردى وتانىنان، ۇيىنەن بوسىپ كەتۋگە ماجبۇرلەۋ دۇرىس ەمەس.
ساشا، وقۋشى: - ءدال قازىر قانشاما ادام ۇرەي قۇشاعىندا ءجۇر. ۇيلەرىنەن بەزىپ جاتىر. وسىنىڭ ءبارى بەيبىتشىلىكتى جاقتاعان ەۋروپادا بولىپ جاتىر. ءبىز گەرمانيادا تۇرىپ، كومەكتەسكىمىز كەلەدى. انام ەكەۋىمىز ۋكراينالىقتاردى ۇيىمىزگە الساق دەيمىز. ساداقا دا بەرەمىز.
