قازاقستاندىق سپورتشىلار سەمسەرلەسۋدەن ازيا بىرىنشىلىگىندە ۇزدىك ۇشتىككە ەندى

نۇر- سۇلتان. قازاقپارات - وزبەكستان استاناسى تاشكەنتتە سەمسەرلەسۋدەن جاسوسپىرىمدەر مەن كادەتتەر اراسىنداعى ازيا بىرىنشىلىگى اياقتالدى، دەپ حابارلايدى قازاقپارات Olympic.kz كە سىلتەمە جاساپ.

سارى قۇرلىق چەمپيوناتىندا سپورتشىلار ءۇش قارۋ تۇرىنەن سىنعا ءتۇستى. اتاپ ايتار بولساق، راپيرا، سابليا جانە شپاگامەن سەمسەرلەسۋدەن ازيا ۇزدىكتەرى انىقتالدى. قازاقستان كومانداسىنىڭ سپورتشىلارى ءبىر التىن، ەكى كۇمىس جانە ءۇش قولا مەدال جەڭىپ الدى.

شپاگادان كادەتتەر اراسىنداعى سىندا بوگدان لۋكين توپ جارسا، جاسوسپىرىمدەر اراسىنداعى سىندا الەكساندر فەدوتوۆ كۇمىسكە قول جەتكىزدى. جالپى كوماندالىق ەسەپتە گونكونگ پەن وزبەكستاندى العا جىبەرگەن قازاقستان قۇراماسى ءۇشىنشى ورىنعا تابان تىرەدى.

ايتا كەتەلىك، تۋرنيرگە قۇرلىقتىڭ 20 مەملەكەتىنەن 300 دەن اسا سپورتشى قاتىستى.