توقايەۆ قازاقستانداعى زاڭسىز ماينينگ ماسەلەسىن تۇبەگەيلى شەشۋدى تاپسىردى

نۇر-سۇلتان. قازاقپارات - مەملەكەت باسشىسى ەنەرگەتيكا جانە ينجەنەرلىك ينفراقۇرىلىمدى دامىتۋ ماسەلەلەرى جونىندە كەڭەس وتكىزدى، دەپ حابارلايدى اقوردا.

جيىنعا پرەمەر-مينيستر ءاليحان سمايىلوۆ، ۇكىمەت مۇشەلەرى، مەملەكەتتىك ورگاندار مەن ۇلتتىق كومپانيالاردىڭ باسشىلارى، وڭىرلەردىڭ اكىمدەرى قاتىستى.

كەڭەسكە قاتىسۋشىلار قازاقستانداعى ەلەكتر ەنەرگەتيكاسى سالاسى مەن اتوم ونەركاسىبىن دامىتۋدىڭ پەرسپەكتيۆالارىن، ەنەرگيا تيىمدىلىگىن ارتتىرۋ جانە ەلەكتر ەنەرگياسى تاپشىلىعىن شەشۋ ماسەلەلەرىن قاراستىردى.

سونىمەن قاتار تەڭگەرىمدى تاريف ساياساتىن ەنگىزۋدىڭ ناقتى اسپەكتىلەرى مەن ەلەكتر ەنەرگەتيكاسى جانە تۇرعىن-ءۇي كوممۋنالدىق شارۋاشىلىعى سالالارىنداعى ءىرى جوبالاردى ىسكە اسىرۋ بارىسى تالقىلاندى.

قاسىم-جومارت توقايەۆ تۇرعىن-ءۇي كوممۋنالدىق شارۋاشىلىعىن جانە قۋات ءوندىرۋشى ستانتسيالاردى جاڭعىرتۋ، جاڭا تەحنولوگيالاردى ەنگىزۋ جانە سالانى سيفرلاندىرۋ، ەلەكتر جەلىلەرىندەگى اپاتتاردى ازايتۋ جونىندە ءبىرقاتار تاپسىرما بەردى. مەملەكەت باسشىسى ەنەرگەتيكا مينيسترلىگى مەن قارجى مونيتورينگى اگەنتتىگىنە قازاقستانداعى زاڭسىز ماينينگ ماسەلەسىن تۇبەگەيلى شەشۋدى تاپسىردى.

جيىن بارىسىندا ەنەرگەتيكا ءمينيسترى بولات اقشولاقوۆ، «سامۇرىق-قازىنا» اكسيونەرلىك قوعامىنىڭ باسقارما ءتوراعاسى الماسادام ساتقاليەۆ، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ، ۇلتتىق ەكونوميكا ءمينيسترى الىبەك قۋانتىروۆ، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين جانە باسقالار بايانداما جاسادى.