قورعانىس مينيسترلىگى ارى-بەرى جوڭكىلگەن اسكەري تەحنيكا قوزعالىسىنا تۇسىنىك بەردى

نۇر-سۇلتان. قازاقپارات - قورعانىس مينيسترلىگى اسكەري تەحنيكانىڭ اسكەرلەردىڭ جاۋىنگەرلىك دايارلىق شەڭبەرىندەگى قوزعالىسىنا تۇسىنىك بەردى، دەپ حابارلايدى قازاقپارات.

قازاقستاننىڭ قارۋلى كۇشتەرىندە جەكە قۇرامنىڭ ورنىن اۋىستىرۋعا، وقىتۋعا، جاتتىقتىرۋعا بايلانىستى اسكەرلەردىڭ جاۋىنگەرلىك ازىرلىگى مەن جاۋىنگەرلىك دايارلىعىن ارتتىرۋ شارالارى جوسپارلى تۇردە وتكىزىلەدى.

وسى كۇندەرى قورعانىس مينيسترلىگى اسكەري كوللەدجىنىڭ وقۋشىلارىنا پراكتيكالىق ساباقتار وتكىزۋ ءۇشىن سەمەي گارنيزونىنان شۋچينسك قالاسىنا اسكەري تەحنيكا جونەلتىلدى. 25- اقپان مەن 3- ناۋرىز ارالىعىندا قاراعاندىدان گۆاردەيسك گارنيزونىنا، سونداي-اق الماتىدان اقتاۋ گارنيزونىنا اسكەري تەحنيكا جىبەرىلدى.

1-4- ناۋرىز ارالىعىندا شىمكەنتتەن تارازعا، تۇركىستانعا، «ايشا-ءبيبى» پوليگونىنا جانە كەرى باعىتتا قارۋلى كۇشتەرگە تيەسىلى تەحنيكالاردىڭ قوزعالىسى جوسپارلانىپ وتىر.

اتالعان كەزەڭدە جوندەۋ جۇمىستارىن جۇرگىزۋ ءۇشىن اسكەري تەحنيكالاردى تەمىر جول كولىگىمەن باتىس قازاقستاننان ەلدىڭ وڭتۇستىك بولىگىنە جوسپارلى تۇردە جەتكىزۋ ىسكە اسىرىلۋ ۇستىندە.