قاڭتار وقيعاسى كاسىپوداقتاردىڭ پارمەنسىزدىگىن كورسەتتى - ساراپشى
ق ر پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ ءبولىم جەتەكشىسى قازاقپاراتتىڭ سۇحبات الاڭىندا وسىنداي وي ايتتى، - دەپ حابارلايدى قازاقپارات ءتىلشىسى.
«بۇگىندە ءبىز دەموكراتيالىق قوعامدا ءومىر سۇرۋگە تىرىسىپ جاتىرمىز. ءبارىن دە دەموكراتيالىق پرينتسيپتەرمەن قۇرعىمىز كەلەدى. ءبىراق قوعام تاراپىنان جاسالىپ جاتقان ءبىراز ارەكەتتەر دەموكراتياعا ەمەس، وحلوكراتياعا جاقىنداۋ بولىپ تۇر. سەبەبى، دەموكراتيا دەگەنىمىز - وكىلدىك ءپرينتسيپتىڭ ساقتالۋى. ال وحلوكراتيا - ادامداردىڭ تىكەلەي شىعىپ، توبىر رەتىندە بيلىك ورناتۋى. ەكەۋى ۇقساس نەگىزى. باستى ايىرماشىلىعى - دەموكراتيادا وكىلدىك پرينتسيپتىڭ بولۋى. قازىر ازاماتتار قالاۋىن مەملەكەتكە تىكەلەي ايتىپ جاتىر. سەبەبى ەكى ورتاداعى وكىلدى ورگانداردىڭ جۇمىسى دۇرىس رەتتەلمەگەن. وكىلدى ورگان رەتىندە نە ءماسليحات دەپۋتاتتارى، نە كاسىپوداقتار شىعۋى كەرەك. وسى ەكى ينستيتۋت مىندەتىن دۇرىس اتقارسا، ەڭبەك ۇجىمدارىنا بۇگىنگىدەي توپتاسىپ الىپ، مەملەكەتكە تىكەلەي تالاپ جولداۋدىڭ قاجەتى دە بولمايتىن ەدى. ءار ۇيىمنىڭ كاسىپوداعى بولۋى كەرەك. كاسىپوداق سول ۇيىمنىڭ باسشىلىعىمەن كەلىسسوز جۇرگىزىپ، جۇمىسشىلاردىڭ قۇقىعىن قورعاۋى كەرەك»، - دەدى ساراپشى.
زەرتتەۋشى ەلىمىزدە كاسىپوداقتاردىڭ ۇلكەن ساياسي ينستيتۋتقا اينالۋى ۇدەرىسى ءالى اياقتالىپ بولعان جوق دەپ ەسەپتەيدى.
«كاسىپوداقتار بار، ءبىراق ءوزىنىڭ باستاپقى فۋنكسياسىن تولىققاندى اتقارماي وتىر. كاسىپوداق دەگەن تەك تۋعان كۇندەر مەن مەرەكەلىك قۇتتىقتاۋ وتكىزەتىن ۇيىم بولىپ قالماۋى كەرەك. مىسالى، قاڭتارداعى وقيعا كەزىندە جەزقازعانداعى جۇمىسشىلاردىڭ قويعان تالابى 15 تارماقتان تۇردى. ەڭبەكاقى مولشەرى، قوسىمشا تولەنەتىن ۇستەمەاقى كولەمى، دەنساۋلىق ساقتاۋ شارالارى مەن ەڭبەك جاعدايى دەگەن سياقتى كاسىپوداقپەن بىرلەسىپ رەتتەيتىن ماسەلەلەردى قامتىدى. ونىڭ بارىنە مەملەكەت تىكەلەي ارالاسپاۋى كەرەك. دەموكراتيالىق قوعامدى تولىققاندى قۇرعىمىز كەلسە، سوعان ساي ساياسي ينستيتۋتتاردىڭ تولىققاندى فۋنكسيونالدى جۇمىس ىستەۋىنە مۇمكىندىك بەرۋىمىز كەرەك»، - دەدى ينديرا رىستينا.
